Read Khoekhoegowab Job 17 Bible Online

Job 17 - Khoekhoegowab bible

Job 17

¹Ti gagas ge a ǂkhabusa, ti tsēdi ra ǀari, ǀhobas ge ǃâu te hâ.

²Amase ta ge ǃhō-aon xa hâǂgāhe hâ; tsî ti mûs ge ausib ân ǃnâ ra hâǁgoa.

³Dītsâ îts mâba-ao-e mâiba te re sa tawa; tariba nî ǁî i, ǃommi âtab ǃnâ ǁî ǃkhaisa nî mā teba?

⁴ǂGaob ânats ge ǃgāsa ǁnâuǃāba ǂganǃgâsa kaiba hâ; ǁnā-amagats ge ǁîna ǀgapiǀgapi tide.

⁵Horesan âba ǁkhâuǁnâxūse ra ǀapexūb, ǁîb ôan di mûdi ge ǁkhāti nîra kā.

⁶Xawe ǁîb ge tita ǁaede ǂkhoamîse ge mâiba, o ta ge mâ-i hoa-i di ǂara-aixūse ge ī.

⁷ǁNā-amagas ge ti mûsa ǃoab xa ge ǃkhae; tsî ti uniǁaedi hoadi ge sommi khami ī.

⁸ǂHauǃnân ge ǁî ǃkhais xa nîra burugâ; tsî ǀhapiob ge hînaxaǃnâb ǂama nîra ǁaixa.

⁹Tsî ǂhanu-aib ge daob âba nîra ǃkhōǀgaipe, tsî ǃanu ǃomkha â-ib ge ǃaruǀîǀgui nîra ǀgai.

¹⁰Xawe sago hoatsama ǁkhawa hā re! Gā-aib xareba ta sago ǃnâ hō tide xuige.

¹¹Ti tsēdi ge ǃgôa-ī hâ, hîkākāhe di ge hâ ti ǀapede, ti ǂgaob di ǁkhoreba.

¹²Tsuxuban ra tsēs ǃnâ ǀkharaǀkhara; ǃnâb ge ǀgūse hâ ǃkhaenas tawa, tin ra mî.

¹³ǃÂubasen ta ka, os ge ǀhobasa ti omse nî ī, ǃkhaenab ǃnâ ta ge ti kharoba nî ǀgâi,

¹⁴āb ǁga ta ga: Ti îts ge satsa, ti ǂgaio, tsî ǂunin ǁga: Ti îse, ti ǃgâse, ti mîo.

¹⁵Mapas kha ǁnâi ti ǃâubasensa nî hâ, tsî ti ǃâubasensa, tari-e ǁîsa nî mû?

¹⁶ǁÎs ge ǀhobas ǃnâ nî ǁgôa ǀhûpem sima tsarab ǃnâ nîra sâ ǃnubai.