Read Khoekhoegowab Job 18 Bible Online

Job 18 - Khoekhoegowab bible

Job 18

¹ǃNubaib ge Bildab Suhiǁîba ǃeream tsî ge mî:

²Matikōsesa kha mîdi di ǀamsa go hō ǁoasa? ǃGaoǃgâ aibe î ge ǁnās khaoǃgâ ǃhoa.

³Tare xū-i ǃaromasa ǀgoan ǀkha ge ǀguiti-īse ra ūhâhesa, tsî sago mûǁae ge a gâresa?

⁴Okha sats, ǁaib ǃnâ ra ǀkhauǃāsents, sats ǃaromab kha ǃhūbaiba nî ǀkhaiǃnâ tsî ǃhaoba, ǂnûiǃkhuniheb nî ǁîb di ǃkhaisa xu?

⁵Ā, ǃnâb eloxoresan dib ge nîra ǀarihe; tsî ǁhabub ǁîb ǀaes dib ge nani tide.

⁶ǃNâb ge tentoms âb ǃnâ nîra ǃkhae; tsî ǃamamǀaes âb ge ǁîb ǂamǃnâ nîra ǀari.

⁷Dāǃharodi ǁîb di ǀgaib didi ge nî ǂōǂōhe; ǁîb di ǀapes ǂhanis ǁîba nîra ǁnā kai xui-ao.

⁸ǂAira âb xab ge ǂhams ǃnâ nîra aoǂgāhe xui-ao, tsîb ge āb ai ǁguisa ǀûis ai nîra ǃgû.

⁹Tsurib ge ǁîba ǃnôara tawa nîra ǃkhō; ǃnuis ge ǁîba nîra ǃkhōǀgara.

¹⁰ǁÎb ge tsuriba ǃhūb ǃnâ sâubahe hâ; tsî ǁnoab âba daob ǃnâ.

¹¹Gongonaidi ge ǁîba nîra ǃhuriǃhuriǂnamipe tsî ǂaira âb ai nîra sauru bi.

¹²Tsūǃgâb âb ǃoab ge ǃâ hâ; tsî kāǁōb âb ge ǁîb di ǁnāsa ǂhomisenba hâse ǃâumâ.

¹³ǂGuroǃnaesabeb ǁōb dib ge ǃâdi ǁîb soros dide nîra hapu, ǁîb di uniǁaedeb ge nîra hapu.

¹⁴ǁÎb ge tentoms ǂgomaiǂnûib hâsa xu nîra tsubuǂuihe, ǁî ǃkhais ge ǁîba gao-aob ǃhuriǃhuridi dib ǁga nîra sī-ū.

¹⁵ǁÎb di tentoms ǃnân ge ǁîb di tamana nîra ǁan; ǁanǃkhais âb ge swabeli ǀkha nîra tsoro-aihe.

¹⁶ǃNagaba xu gu ge ǃnomagu âba nîra ǂnâ, tsî ǀgapiseba xub ge ǁnâub âba nîra ǂnâ.

¹⁷ǂÂiǂâisens âb ge nîra kā ǃhūbaiba xu; tsîb ge ǀon-i xare-e ūhâ tide ǃgangu ai.

¹⁸ǁÎn ge ǁîba nîra ǂhāǂui, ǃnâba xu ǃkhaenab ǃnâ, tsîn ge ǁîba ǃhūbaiba xu nîra ǃhaebē.

¹⁹ǁÎb ge ǀgôab xareb kas, ǁnurisab xareb kas hoasa ūhâ tide ǁaes âb ǃnâ, tsî khoe-i xare-i ge ǁanǃkhaidi âb ǃnâ ǃgau tide.

²⁰ǁÎb di tsēs ǂaman ge huriǂoas di khoena nîra burugâ; tsî aiǂoas di khoen ge ǃhurib xa nîra ǃkhōhe.

²¹Amase, ǁnāti ī xūdi ge ǁanǃkhaidi ǂkhaban dide; tsî nēs ge ǃkhais ǁnāb Eloba ǂan tamab disa.