Read Khoekhoegowab Job 19 Bible Online

Job 19 - Khoekhoegowab bible

Job 19

¹Ob ge Joba ǃeream tsî ge mî:

²Matikōse go kha ti ǀomsa nî ǃoaǃoa tsî mîdi ǀkha ra ǂkhūǂkhū te?

³Disi ǃnādi kōses ge, tita go go ǃharaxūsa; sago ge tao tama hâ, tita tsūdīs xa.

⁴Tsî amase ta ge ǁhapu, xawes ge ǁhapusa ti ǀkha nîra hâhâ.

⁵Amase go ga ti ǃoagu ǀgapiǀgapiseno, tsî go ga ǃharaxū teo,

⁶ǁnâi ǂan, Elob ge tita gamagama, tsî ǂhams âb ǀkha ǃnamiǂgā te ǃkhaisa.

⁷Mû, tita ge: ǀGaidīs! ti ra ǂgai, xawe ta ge ǁnâu-amhe tama hâ; ǃau ta ra, xawe ǂhanu-i xare-i ge a ǀkhai.

⁸Ti daobab ge ǁîba ge ǁgâuǂgan, ǃgûǃganu ǁoa ta as kōse; tsî ti ǃgangu aib ge ǁîba ǃkhaenaba ge ǁgui.

⁹Ti ǃgôasibab ge ǁîba ge ūǀhana te, tsî ǀgapas ti danas disab ge ǁîba ge ūbē.

¹⁰ǁÎb ge hoa ǀkhāgu ai ra khôaǁnâ te, o ta ra toa tsî ti ǃâubasensab ge hai-i khami ge ǃhomǂui.

¹¹Tsîb ge ǁîba ǁaib âba ge ǂhubiǀî te; tsî khākhoen âb khami ge ū te.

¹²ǁÎb di ǂnubidi ge ǀhûpe ge hā; tsî di ge daob âde tiǀî ge unu tsî ti tentoms ǂnamipe ge ǁgoe.

¹³Ti ǃgâsagab ge ǃnūse tita xu ge ǃhaebē; tsî tita a ǂann ge amase ge ǀū te.

¹⁴Ti ǀgūkhoen ge tita xu ge ǂgaedawasen; tsî ti ǂansaben ge ǀuru te hâ.

¹⁵Ti oms din tsî ti ǃgādi tsîn ge ǃhaokhoese ra ū te; tita ge ǁîn mûǁae nau ǃhūǁîta ase ī.

¹⁶Tita ge ti ǃgāba ge ǂgai, xaweb ge ǃeream te tama ge i, ti ams ǂûs ǀkha ta ge ǁîba ge ǀkhoma.

¹⁷Ti ǀommi tsîn ge ti tarasa a tsūba; tsî ti ǁamaba ti îs di ôana.

¹⁸ǂKham ǀgôan on ge tita ra ǃharaxū; khâi ta ra, on ra ǃhoaǃoa te.

¹⁹Ti ǃgâi ǀhōsan hoan ge tita ra uixa; tsî ǀnam ta ge in ge ti ǃoagu ge dawaǂnûisen.

²⁰Ti ǂkhōn ge ti khōb tsî ti ǁgans tsîra ai ǂae hâ; tsî ti amǃnâ-arib di khōb ǀguib ǀkha ta ge ge ûiǂoa.

²¹ǀKhom te go re, ǀkhom te go re, ti khoego-e, ǃommi Elob dib ge tita ge tsâǀkhā xuige.

²²Tarexa go kha ǁnâi Elob khami ra ǃgôaǃgon te tsî ti ǁgans xa a ǁâ ǁoa?

²³Koma di ga ti mîde nēsi xoahe, koma di ga xoaǂgāhe ǂkhani-i ǃnâ,

²⁴koma di ga ǂnūǀurixoa-ūxū-i ǀkha tsî ǂgoaǀurib ǀkha, ǀamos kōse ǃhao-i ǃnâ ǁhāǂuihe!

²⁵Tsî tita ge a ǂan, ti Ore-aob a ûitsama ǃkhaisa, tsî ǁîb ge ǀams ai tsarab ǂama nîra khâi.

²⁶Tsî ti khōban ga ǀkhauǃā xawe ta ge tita ti ǁgansa xu Eloba nîra ǃgapaǀî;

²⁷tita ǂûta nîra ǃgapaǀîbasenni ge a ǁî, tsî ti mûra ǂhanira nîra mûba tsî ǃhaora tama i tsî. Ti ǃnaira ge ǁî ǃkhais xa kaise ra ǁkhore ti ǃnâ!

²⁸Amase go ga: Mati ge kha ǁîba nî ǃgôaǃgon, ti mîo, ǃnomab nē ǃkhais dib ti ǃnâ ra hōhe xawe,

²⁹î go ǁnâi ǃhuri gôab xa; ǁgôasib ge gôab di ǁkharaba ra hā-ū xuige, ǂan go nîga ǀgoraǃgâ-i hâ ǃkhaisa.