Read Khoekhoegowab Job 2 Bible Online

Job 2 - Khoekhoegowab bible

Job 2

¹ǁKhawa i ge ǀnîtsē ge ī Elob ôagu ge hā ǃkhaisa, ǃKhūb aiǃâ gu nî mâisense, tsî Satanni on ge ǁîgu ǁaegu ge hā, ǃKhūb aiǃâb nî mâisense.

²ǃNubaib ge ǃKhūba Satanni ǃoa ge mî: Mapa xuts ra satsa hā? Ob ge Satanna ǃKhūba ǃeream tsî ge mî: ǃHūbaib ai ǃgûma tsî ǁîba ǃgûǃnâǃganusa xu.

³Ob ge ǃKhūba Satanni ǃoa ge mî: Xare ti ǃgāb Joba ǃgaoǃgâts gere? ǀNî khoeb ǁîb khami īb xareb ǃhūbaib ai hâ tama hâ xui-ao, aob ǂhanu-ai tsî ǂhauǃnâ tsî eloǃaoǃgâxa tsî ǂkhababa ra ǂgōsenna, tsîb ge ganupe ǂhanu-aisib âba ra ǃkhōǀgaipe sats ge tita ǁîb ǃoagu khâikhâiǃnâ xawe, ǀhapiǃkhai-i ose ta ǁîba nî hapuse.

⁴ǁGoasib ge Satanna ǃKhūba ǃeream tsî ge mî: Khōba khōb ama! Tsî mâ xū-i khoe-i ūhâ-i hoa-e i ge ra mā ǁî-i di ûib ǃaroma.

⁵Nēsi ǃommi âtsa ǀhōǂui îts ǁîb di ǂkhōn tsî ǁîb di ǁgans tsîna tsâǀkhā, ob ge ais âts ǃnâ nîra ǀâxare tsi.

⁶Ob ge ǃKhūba Satanni ǃoa ge mî: Mû, ab sa ǃomǁae hâ, xawe ǁîb di ûiba sâu.

⁷ǃNubaib ge Satanna ǃKhūb di aisa xu ǂoa tsî Joba tsū ūǀhapin ǀkha ge ǂnau, ǂaiǃnāb âba xu ǂamǃnâs âb kōse.

⁸Ob ge ǂgoasūǃâro-e ge ū, ǁî-i ǀkhab nî xoasenga, tsîb ge tsaob ǃnâ ge ǂnû.

⁹ǃNubais ge taras âba ǁîb ǃoa ge mî: Gorosets kha sa ǂhanu-aisiba ra ǃkhōǀgaipe? Eloba ǀâxare îts ǁō!

¹⁰Xaweb ge ǁîs ǃoa ge mî: Gâre khoedi di ǀguis ǁkhās xases ra sasa ǃhoa. Sama kha Eloba xu ǃgâib ǀguiba nî ǃkhōǃoa tsî tsūba ǃkhōǃoa tide? Nēn hoan ǃnâb ge Joba amǁgaukha âb ǀkha ǁore tama ge i.

¹¹Tsî Job di ǃnona horesagu ge ǁîb ǂama ge hā ǂkhabab xa ǁnâuo, o gu ge mâb hoab âga ǁîb di ǃāsa xu ge hā, Elifab Temanǁîb tsî Bildab Suhiǁîb tsî Sofari Naamaǁîb tsîga, tsî gu ge ge ǀguisī, ǁîba tsâbaǁhao tsî gu nî ǁkhaeǂgaose.

¹²Tsî ǃnūseba xu gu ge kōkhâio, o gu ge ǁîba mûhō tama ge i, o gu ge dommi âga ūkhâi tsî ge ā, tsî gu ge mâb hoab âga ǂamsarab âba ǀkhau tsî tsaraba ǁîgu di danadi ai ǀhommiǀî ge tsoro.

¹³Nēti gu ge ǁîb ǀkha hû tsēdi tsî hû tsuxugu kōse ǃhūb ai ge ǂnû, ǀguib xaweb mî-i xare-e mîǀî bi tamase, tsûb kaise a kai ǃkhaisa gu ge mû amaga.