Read Khoekhoegowab Job 20 Bible Online

Job 20 - Khoekhoegowab bible

Job 20

¹ǃNubaib ge Sofari, Naamaǁîba ǃeream tsî ge mî:

²ǁNā-amaga di ge ti ǂâide ra ǃeream kai te tsî ǁî ǃkhais ǂama ta ge ra ǃnoeaǂgao.

³ǂGōǀaus ǁgaiǁgaisase ība tesa ta ge go ǁnâu, xawes gagasa ti ǁnâuǃāba xu ra ǃeream te.

⁴Xare ǂants a nēsa ǀnaisa xu, Elob ge khoeba ǃhūbaib ai ǂnûisa xu,

⁵eloxoresan di dâb a ǃnubu ǃkhaisa, tsî ǃgâiaǂgaob hînaxaǃnâb dib ǃnubu ǁaerob ǀguib kōse ra hâ ǃkhaisa?

⁶ǀGapisib âb ga ǀhommi kōse ǃapa xawe, tsî danas âb ga ǃâudi kōse sī xawe,

⁷xaweb ge xaub âb khami ǀamosib kōse nîra kā; ǁnān ǁîba ge aibe gere mûn: Mapab hâ? ti nî mîs kōse.

⁸ǁÎb ge ǁhapo-i axase nîra bē, hōhe ǁoab nîs kōse, ǁîb ge tsuxub ai-i axase nîra ǃhaexūhe.

⁹ǁNā mûs ǁîba ge mûs ge ǁîba ǃaruǀî mû tide; tsî ǃkhais âb ge ǁîba ǃaruǀî ǃgapaǀî tide.

¹⁰ǁÎb ôan ge ǀgâsana ǃgâibasa nîra ôa-am, tsî ǁîb di ǃomkha ge xūn âba nîra mādawa.

¹¹ǂKhōn âb ge ǂkhamsis âb di ǀgaib xa ǀoa hâ, xaweb ge ǁîb ǀkha tsarab ǃnâ nîra ǁgoe.

¹²ǂKhabab ga ams âb ǃnâ ǂkhon xawe, nams âb ǃnagab ga ǁîba sâu xawe,

¹³ǁîbab ga sâu tsî ǁîbab ga ǁnāxū tama i, tsîb ga namǃhanab âb ǃnâ ǁîba ūǀgara,

¹⁴xaweb ge ǂûb âba ǃnāb âb ǃnâ nîra ǀkharaǀkharahe; ǀaon di tsaba kaib ge nîra ǃnāb âb ǃnâ.

¹⁵ǃKhūsibab ge ge hara, xaweb ge ǁîba nîra ǀkhûiǂui; Elob ge ǁîna ǃnāb âba xu nîra doeǁgaǂui.

¹⁶ǃGāb ǀaon dibab ra ǁîba ǀgom; os ge nams ǀaob disa ǁîba nîra ǃgam.

¹⁷ǃĀgu tsî ǃārogu danib tsî ora ǁnuib tsîkha digab ge ǁîba mû tide.

¹⁸Xūrebab ge nî mādawa tsî ǁîba hara tide; xūxasib ī khamis ge ǀkharaǀkharasisa nîra ī, xui-aob ge ǃgâiaǂgao tide.

¹⁹ǁÎb ge ǁgâiǀā amaga, ǀgâsanab ge ǁnāxū amaga; tsî oms hîab ǂnubi tamasab ge ǃnariǀhana amaga.

²⁰Sâ-i xare-eb ge ǃnāb âb ǃnâ ǀū ge i amagab ge ǃgomǀgausa xūn âb ǀkha ûiǂoa tide.

²¹Xū-i xare-i ge ǂûb kas khaoǃgâ ǃgau tide; ǁnā-amagab ge ǃgâiǃgâb âba hâhâ tide.

²²ǃNāǂamsasib âb ga ǀoao, ob ge nîra ǃao; mâ ǃommi ǀkhomǀkhomsabeb dib hoab ge ǁîb ai nîra hā.

²³ǁÎb ǃnābab nî ǀoaǀoagab ge Eloba ǁîba ama ǀgamsib ǁîb di ǁaib diba nî sîba, îb ǁîb ǂama ǀapi, ǁîb ǂû-i ase.

²⁴ǂNūǀuriǀāxūnab ga ǁhâxū xawes ge ǂaiǀurikhāsa ǁîba nîra ǁkhâuǃganu.

²⁵Gôaban ge nîra ǂgaeǂui, ob ge sorosa xu tsî tsabab âba xu napa rase nîra ǀkhī; ǃhuriǃhurisigu ge ǁîb ǂama nîra hâ.

²⁶ǃKhaenab hoabab ge ǁîba ǁuise sâubahe hâ. ǀAe-i khaurihe tama-i, ǁî-i ge ǁîba nîra hapu, naun ǁîb tentoms din ge nîra tsūbahe.

²⁷ǀHommi ge ǂhanuoǃnâsib âba nîra ǂhaiǂhai; tsî ǃhūbaib ge ǁîb ǃoagu nîra khâi.

²⁸Ūǀkhīn ǁîb oms din ge nîra ūǃgûbēhe, hoan ge ǁaib âb di tsēs ai nîra dâubēhe.

²⁹Nēs ge amǃnâs eloxoresa khoeb ǂama Eloba xu nîra hāsa, tsî ǀumis Elob xab mîǁguibahe hâsa.