Read Khoekhoegowab Job 21 Bible Online

Job 21 - Khoekhoegowab bible

Job 21

¹Ob ge Joba ǃeream tsî ge mî:

²ǁNâuǃāxase ǃgâ re ti mîsa; îs ǁîsa sago ǁkhaeǂgaos di amǃnâs ai hâ.

³Taniǀnam te re, î ta ǃhoa, tsî ǃhoatoa ta kao ǁnâi ǃhō re.

⁴Tita ra ǃgae ǃgaesa, khoe-i ǂamasa? Tsî ti i ga ī xawe, tarexas kha ǁnâi ti gagasa ǃoa tide?

⁵Kōǀî te, î go burugâ tsî amde ǃkhō.

⁶Ā, ǁîs xa ta ra ǂâi ǃnubai ta ge ra ǃhuri, tsî ǃaob ge ti ǁgansa ra ǃkhō.

⁷Tare xū-i ǃaromasa eloxoresan ra ûi tsî kaira tsî ǀgaisasa?

⁸Surib âb ge ǁîn ǀkha ais ân aiǃâ ra hâhâ, tsî ǂgonan ân ge ǁîn di mûdi aiǃâ hâ.

⁹ǁÎn di omdi ge ǂkhîba ūhâ ǃao-i ose; tsî ǀhamhais Elob dis ge ǁîn ai hâ tama hâ.

¹⁰ǁÎb di ǁgōb ge ra ǃapa tsî sā tama; ǁîb di gomas ge ra ǁora tsî ǂkham tama.

¹¹ǁÎb di ǂkham ǀgôaronan ra gūn xase sîǂui; tsî ǁîn di ôan ra ǂgam.

¹²ǁÎn ra ǁnae tromels tsî harps tsîra ǀkha; tsîn ra ǃgâiaǂgao ǂnunib di ǀōb ǂama.

¹³ǃGâib ǃnân ra tsēdi âna hâtoa, tsî mûsǀapiros ǃnân ra ǀhobas ǃnâ ǁgôa.

¹⁴Ti ī xawen ra Elob ǁga mî: ǂGōxū da re, ǂans sa daogu dis xa da ǃgâibahe tama xuige.

¹⁵Tariba Hoaǀgaixaba, o da ǁîba nî ǃoaba? Tsî mâ xū-e nî harebeba da, ǁîba da ga ǀgoreǀîo?

¹⁶Mû, xūn ân ge ǁîn ǃomǁae hâ tama hâ, ǀapes eloxoresan dis ge tita xu ǃnūse hâ.

¹⁷Matikō ǃnāde i ra ī, ǃamamǀaes eloxoresan dis ra ǀari ǃkhaisa, tsî kāǁōsib xan ra hāǂamhe ǃkhaisa, Elob ra ǁîna ǁaib âb ǃnâ tsûga ǀgoraǂuiba ǃkhaisa?

¹⁸ǂNâsa ǀgâb xasen ī ǂoab aiǃâ, tsî sareǂoas xa ra ǃgombēhe ǀapon khami.

¹⁹Elob ra ǀgaib âba ǀgôan âba ǁguibēba, ǁîbab ra mādawa-am hōǃâb ras kōse!

²⁰ǁÎb di mûdi ǂûdi ǀkhab ge tsūǃgâb âba nî mû, tsî Hoaǀgaixab di ǁgôasib xab ge nîra ā.

²¹Mâ tura-eb kha ǁnâi ǁîb khaoǃgâ oms âb ǃnâ nî ūhâ, ǁkhâgu âb di ǃgôab ga ǃgaoǁnâheo?

²²Eloba kha ǂansab nî ǁkhāǁkhāhe, ǁîb hîa ǀgapi khoega ra ǀgoraǃgâba?

²³Nēb ra ǁō ǀgaib ǂgausib âb dib ǃnâ, ǃnōsase tsî ǂkhîseb hâ hîa,

²⁴daixapab âb daib xa ǀoa hâ tsî ǂkhōgu âb di ǂgaeb a ǀâ hîa.

²⁵Xawe naub ra au ǀoms ǀkha ǁō, ǃgâiba ǂû tamaǃâ.

²⁶ǁÎkha ge ǀhûpe tsarab ǃnâ ǁgoe, tsî ǂunin ra ǁîkha ǃgū-ai.

²⁷Mû, tita ge sago di ǂâide a ǂan, tsî ǁnā ǂkhaba ǂâibasendi ǁîde go ra sîsenūsā tede.

²⁸Sago ge nî mî xui-ao: Mapab hâ gao-aob di omma, tsî mapas hâ tentoms eloxoresan disa?

²⁹Dî tama go ǁnâi hâ, daob ai ra ǃgû-īna? Tsî ǂan tama go ǁnâi hâ ǁîn di saode?

³⁰ǂKhabadī-aon ra ǁgaosib tsēs ai sâuhe ǃkhaisa, ǁgôasigu di tsēs ain ra ǂgaeǂguibēhe ǃkhaisa.

³¹Tari-e nî ǁîba ais ǃnâ daob âba ǁgau? Tsî xū-eb ga ǁîba dī o, tari-e nî ǁîba dīdawa-am?

³²ǀAms aib ra ǀhobadi ǃoa ūsīhe, tsî hugaǀgui ra ǃûihe ǃhūǃkhomas ase.

³³ǂGoaǀuidi ǃgoaǃnāb didi ge ǁîba a ǂkhonba; tsî khoen hoan ra ǁîb khaoǃgâ sao tsî ǁnān ǁîb aiǃâ hân ge ǃgôatoahe ǁoa ge i.

³⁴Mati go kha ǁnâi ǁausib ǀkha ra ǁkhaeǂgao te? ǃEreamdi âgo ǃnâs ra ǃûǂams ǀguisa ǃgau hîa!