Read Khoekhoegowab Job 22 Bible Online

Job 22 - Khoekhoegowab bible

Job 22

¹ǃNubaib ge Elifab Temanǁîba ǃeream tsî ge mî:

²Xareb kha nē xūb khoeba Eloba nî harebeba? Hî-î, xaweb ra ǁnâuǃāxaba ǁî-aitsama harebebasen?

³Xare kha Hoaǀgaixaba harebeba i hâ sats a ǂhanu-ai ǃkhaisa? Hō-oa-ammi nî, sa daogats ra ǂhanuse ǃgû ǃkhais ǀkha?

⁴Sa ǃaoǃgâs ǃaromasa kha ǁnâi, ǁîb ra satsa ǁkharasa, sa ǀkhab ra ǀgoraǃgâs ǃnâ ǂgâsa?

⁵Sa ǂkhabasiba kai tamab hâ? Tsî sa ǂhanuoǃnâsiga ǀamo tama gu hâ?

⁶Sa ǃgâsagats ge ǁause mâiǁkhaexū-e ge ūǀhana; tsî saran ǀōǀkhā hân dinats ge ge ǂgaeǂui.

⁷ǀHupu hâbats ge ǁgam-e āsi tama hâ, tsî ǃâ hânats ge pere-e ge ǀgî.

⁸Xawe ǁnāb ǀgaib âb ǀkha ra gaosîsenni dib ge ǃhūba ge i, tsî ǃgôahesa aob ge ǁîb ǃnâ ge ǁan.

⁹ǃOataradets ge ǀkhaiǃomse ge sîbē, tsî ǁôagu ǃoaǀgôan diga ge ǂkhūǂkhū.

¹⁰ǁNā-amagats ge ǁnoagu xa hâǂgāhe hâ, tsî ǃhurib ra ǃhaese hāǂam tsi,

¹¹ǃkhaenaba mû tamats hâ, tsî ǁgam-i di ǀoasib ǃgū-ai tsi hâba?

¹²Eloba ǀhommi di ǀgapib ǃnâ hâ tamab hâ? Kōǀî re ǀgamirode matikōse di a ǀgapi ǃkhaisa!

¹³Ots ra satsa mî: Tare xū-eb kha Eloba a ǂan? ǃKhaenab ǃnâ-ū ǀgoraǃgâ ǁkhāb a?

¹⁴ǃÂudi ge ǁîba ǃgū-aixūse ība tsîb ge a mû ǁoa, tsîb ra ǁîba ǀhommi di ǃāǂuisaba ǃgûǃnâǃganu.

¹⁵Daob kaib aibekam ǁaeb diba ǃkhōǀgaipets nî, ǁîb ǂkhaba khoen ge ǃgû-aiba?

¹⁶ǁNān ǁae tamab ai ge ūbēhen; ǁîn di mâǃhūb dâubēhe hâna.

¹⁷ǁNān Elob ǃoa: ǂGōxū da! ti ra mîna, tsî: Tare xū-eb kha Hoaǀgaixaba nî dīda?

¹⁸ǁÎb ge omdi âna ǃgâi xūn ǀkha ge ǀoaǀoa, xawes ge ǀapes eloxoresan disa tita xu ǃnūse hâ.

¹⁹ǂHanu-ain ge ǁîsa mû tsî ge ǃgâiaǂgao; tsî ǀhapiob ge ǁîna ge ǃhō, tsî ra mî:

²⁰Sida di mâǃoasaben ge hîǀhuruhe hâ, tsî ǀaes ge ǁîn ge ǃgauna ge ǂhubiǂui.

²¹ǁÎba ǁaeǁaesen re îts ǂkhîba ūhâ; ǁî ǃkhaisa xuts ge ǃgâib xa nîra hāǂamhe.

²²ǂHanuba ǃkhōǃoa re ams âba xu, îts mîdi âba sa ǂgaob ǃnâ ǁguibē.

²³Hoaǀgaixab ǃoats ga ǃhobaseno, ots ge nîra ǂnubihe; ǂkhababa ǃnūse ūbē sa tentomde xu,

²⁴ǃnubaits ge ǃhuniǀuriba tsarab ǃnâ nî ǁgui, tsî Ofiri di ǃhuniǀuriba ǃārogu di ǃhaogu tawa,

²⁵ob ge, Hoaǀgaixaba satsa ǃhuniǀurise nîra ība, tsî satsa ǀgaisa ǀhaiǀurise nîra ība.

²⁶Ā, Hoaǀgaixab ǃnâts ge nîra ǃgâiaǂgao tsîts ge ais âtsa Elobǀî nîra ūkhâi.

²⁷ǁÎb ǃoats ge nîra ǀgore, tsî ǁîb ge nîra ǁnâu-am tsi, tsî sats ge mîmâidi âtsa nîra matare.

²⁸Xū-ets ga ǂâibaseno, o i ge nîra ība tsi, tsî sa daogu aib ge ǃnâba nîra ǃnâ.

²⁹Khoe-i ga ǃgamǃgamheo, tsî sats ga: A-i ǀgapi! ti mîo, ob ge Eloba ǃgamǃgamsensa mûdi â-i-e nîra sâu.

³⁰Ā, ǁîb ge ǁnā-i hîa ǀhapio-e nîra ǃnoraǃnora, ǃanusib sa ǃomkha diba xuts ge nîra ǃnoraǃnorahe xui-ao.