Read Khoekhoegowab Job 23 Bible Online

Job 23 - Khoekhoegowab bible

Job 23

¹Ob ge Joba ǃeream tsî ge mî:

²Nētsēs on ais ge ti ǃgaesa a au; ti ǃommi ge ti ǃgomse hâ ǀhâimâinǀom ta ra xawe.

³ǂAn ta ka, ǁîba ta nî hō ǃkhaisao; o ta ge ga trons âb tawa sī!

⁴O ta ge ga ǂhanuba ais âb aiǃâ ǁguiǃāba bi, o ta ge ga ti amsa ǃereambasendi ǀkha ǀoaǀoa.

⁵O ta ge ga ǂan ǁnā mîǃkhaidi hîab tita nî ǃereamde, o ta ge ga ǁnâuǃā tare xū-eb nî oe-am te ǃkhaisa.

⁶ǁNâi tita ǀkha kaisib ǁîb dib ǃoa ǂnoagub nî? Hî-î, ǃgaoǃgâs ǀguisab ga hî te?

⁷ǁNāpab ge ǂhauǃnâba ǁîba nî ǂnoagu-ū, tsî tita ge ga ǀamosib kōse ti ǂhanuǂhanu-aoba xu ǃnoraǃnorasen.

⁸Kō, aiǃâb ǃoa ta ga ǃgû xaweb ge ǁîba a ǀkhai; tsî khaosǀî ta ga oa xawe ta ge ǁîba hō tama hâ.

⁹ǁAreǀkhābǀîb ga sîsen xawe ta ge ǁîba ǃgapaǀî tama hâ; amǀkhābǀîb ga ǃgamǃgâ xawe ta ge ǁîba mû tama hâ.

¹⁰Xaweb ge ǁîba ǁnā daob tita ra ǃgûba a ǂan; ǁîb ga ǃâitsâ te, o ta ge ǃhuniǀurib axase nîra ǀkhī.

¹¹ǁÎb di ǃgûs tawas ge ti ǂaisa ge sao; ǁîb di daoba ta ge ge sâu, tsî ta ge ǁnāǁgôa tama hâ.

¹²Mîmās amǁgaukha âb disa xu ta ge ǂgō tama hâ; mîdi ǁîb di ams dide ta ge ti ǂhanub ǃgâ-ai ge sâubasen.

¹³Xawe ǁîb ge ǀkharaǀkharasen ǁoa, tari-e ǁîba nî ǁkhaedawa? ǀOms âb ga tura xū-i, ǁnā-eb ra ǁîba dī.

¹⁴Ā, ǁîb ge nîra dīǀamǀam, ǂâibasenūhe ta hâ-i hoa-e, tsî ǁnāti ī xūn ge ǁîb tawa a ǂgui.

¹⁵ǁÎ ǃkhais ǃaroma ta ge ais âb aiǃâ ra ǀkhū; ǁîs xa ta ra ǂâiǂâiseno, o ta ge ǁîb aiǃâ ra ǃao.

¹⁶Elob ge ti ǂgaoba ge ǂkhabuǂâi kai; tsî Hoaǀgaixab ge tita ge gongonǃnâ.

¹⁷ǃKhaenab xa ta hîkākāhe tama hâ amaga, tsî ǃkhaenab ti aisa ǃgū-ai hâ amaga.