Read Khoekhoegowab Job 24 Bible Online

Job 24 - Khoekhoegowab bible

Job 24

¹Tare xū-i ǃaromab kha ǁnâi ǁaegu ǀgoraǃgâs diga Hoaǀgaixaba ūhâ tama hâ? Tsîn ǁîba a ǂanna tsēdi âba mû tama hâ?

²ǃHūb di ǀkharigan ra tsâǀkhā; gūden ra ǃnariǀhana tsî ǁîde ra ǃûi.

³ǃOaǀgôan di eselan ra doeǁgabē, gomab ǃoataras diban ra mâiǁkhaexūse ū.

⁴ǂHâ hânan ra daoba xu ǂgō kai, ǀhûpen ra ǀkhomǀkhomsan ǃhūb dina gaugausen.

⁵Mû, ǁîn ge ǃgoren ǃgaroǃhūb din khami ī, ǁîn ra ǂoa sîsenni ân ǁga, ǃnauǁgoaga ra khâiǃâ, ǂûn nî xū-en nî ôaga ǃgarob ǃnâ ǁîn tsî ǀgôan ân on ǃaroma.

⁶ǃGarob ain ra ǂûn âna ǀhaoǀhao tsî ǂauxûiǂûǃhanab eloxoresan diban ra ǃoratoa.

⁷ǀŌǀkhāsen ge ra hâǁgoa sara-i ose tsîn ge ǃgūǀkhāsenxū-e ūhâ tama hâ ǃkhaib ǃoagu.

⁸ǁGamdâub ǃhomgu dib xan ra ǀâ, tsî hâǃkhaio khoen a amagan ra ǃhaoga ǁnam.

⁹ǃOaǀgôaro-en ra samma xu tsubuǁnâ tsî ǀgâsab di ǀkhāb ai hâ xū-en ra mâiǁkhaexūse ū.

¹⁰ǁÎn ge ǀōǀkhāse ra ǃgû saran ose tsî ǃâ hâsen ge ǃhoroǃgaeǀkhādade ra tani.

¹¹ǂNubiǂgoagu ân ǁaegun ra oliba ǀāǂui; dāǃnâǃoreban ra dāǃnâ xawen ge ǁgâ hâ.

¹²ǃĀsa xūn ra khoena ǀhâimâinǀom, tsî ǀoms ǀhapiǂnûihe hân dis ra huiǂgai. Xawe Elob ge ǁîna ǃgâ tama hâ.

¹³ǁÎn ge mâǃoa-aon ǃnâb din ǁaegu hâ, ǁîn ge daogu âba ǂan tama hâ tsîn ge ǃgangu âb ai hâ tama hâ.

¹⁴ǁGoaǂnobos ǀkhab ra ǃgamaoba khâi, tsîb ra ǃgam ǀgâsab tsî ǂhâ hâb tsîkha; tsî tsuxubab ge ǃnari-aose ī.

¹⁵ǁKhātis ge mûs ǃgamekhôa-aob disa ǃkhaeǁaeba a ǂan: Mû-i xare-i ge mû te tide, ti mî tsi; tsîb ra ǃgū-aixū-e ais âb ai ǁgui.

¹⁶ǃKhaenab ǃnâb ra omga khôaǃkhopa, ǁîn tsēa ǂganamsen tsî ǃnâba a ǀūna.

¹⁷ǁGoaǁaeb ge ǁîn hoana ǁōb di sommi khami ība xui-ao; ǁîn ǃhuriǃhuridi ǃkhaenas dide a ǂan amaga.

¹⁸ǁÎb ge dâugaru ǁgamgu ai ra dâu-ī; ǁîn di amǃnâs ge ǃhūbaib ai ǀâxarexuhe hâ, ǁîn ge ǂauxûiǂûǃhanab di daoba-ū ī tama hâ.

¹⁹ǀKhurub tsî ǀgammi tsîkha ge tsamaros di ǁgamga ra ūbē, ǁnās ǁkhās xases ra ǀhobasa dī, ǁnān hîa ge ǁorena.

²⁰ǁGûs di ǃnāb ra ǁîba ǀuru, ǁîb xab ge ǂuniba a ǁkhoaxabahe; ǁîb xan ge ǃaruǀî ǂâi tama hâ, ǂkhabasib ra haib axase khôahe.

²¹ǀGôaos hîa ǁora tamas, ǁîsab ra ǃnariǀhana, tsî ǃoatarasab ge ǃgâi xū-e dī-ū tama hâ.

²²ǁKhātib ra ǀgaisana ǂomxa kuriga ûi kai ǀgaib âb ǀkha; khâib kao, ots ge sats khoetsa ûib âtsa nî ǂan.

²³Elob ga ǃûiǃgâ bio, ob ra ǁî ǃkhais ai ǂgomaiǂnûi, tsî ti ī xawe ra ge mûra âba ǁîn daogu ai hâ.

²⁴ǂKhari ǁaerob ǀguib kōsen ra ǀgapiǀgapihe, ǁnās khaoǃgâ i ge ǁî-e a ǀkhai; ǁîn ra ǃgamǃgamhe, naun hoan ra ǁō khamin ra ǁō; tsî ǀams ǃhoroǃnurub dis ra ǃgaoǁnâhe khamin ra ǃgaoǁnâhe.

²⁵Tsî ǁnāti i ga ī tama io, tari-e nî ǂhumiǂhumi te tsî ti mîsa nî ǁauǁau?