Read Khoekhoegowab Job 27 Bible Online

Job 27 - Khoekhoegowab bible

Job 27

¹Tsî Job ge ǃaruǀî ǂkhoamîs âba tsoatsoa tsî ge mî:

²Elob a ûitsama ǃkhais ao, ǂhanuba tita xu ge ūbēba, tsî Hoaǀgaixab, ti ǀomsa ge ǃoa kaiba,

³ganupeb ǀommi âba ti ǃnâ hâ, tsî ûib di ǂoab Elob dib ti ǂguis ǃnâ hâ,

⁴hîa kha ge ti amǁgaukha ǂkhaba xū-e ǃhoa tide, tsî ti nams ge gāxaǃnâsi-e ǃhoaǂui tide.

⁵Tita xu a-i ǃnūse hâ, sago ta nî ǂhanu-ai kai ǃkhaisa; ǁō ta nîs kōse ta ge ti ǂhauǃnâsiba tita xu sîsenbē tide.

⁶Ti ǂhanu-aisiba ta ra ǃkhōǀgaipe tsî ta ge ǁîba ǁnāxū tide; ti ǂgaob ge ti tsēdi di ǀguis xawesa ǃharaxū tide.

⁷Ti khākhoeba ab eloxoresab ase i, tsî ti mâǃoasabeba ǂkhaba dī-aose.

⁸Taresa ǃâubasens hînaxaǃnâb disa, ǃgaoǁnâheb kao, Elob ga ǀoms âba ūǂuio?

⁹Xare ǁnâub nî Eloba ǂgais âba, ǂōǂōsib xab ge hāǂamheo?

¹⁰ǃGâiǃgâisenni nî ǁîba Hoaǀgaixab ǃnâ? ǂGaiǀîb nî Eloba mâ ǁaeb hoaba?

¹¹Tita î ta ǁkhāǁkhā go Elob di ǃommi xa; Hoaǀgaixab di ǂâisa, î ta tā sâu.

¹²Mû, sago hoago kom ǁîsa ge mûo. Tsî tare xū-i ǃaromasa kha ǁnâi nētikōse go hoaragase a ǁausa?

¹³Nēs ge amǃnâs eloxoresa khoeb disa Elob tawa, tsî ǀumis ǁgâiǀā-aogu dis, Hoaǀgaixab ǃomǁaeba xu gu nî hōsa.

¹⁴ǁÎb di ôan ga ǂguio, on ra gôaba ǃnaeba; tsî ǀgôan âb ge pereb xa ǁâ tide.

¹⁵ǁÎb din xa ga ǃgaun ge ǂhīǁōb xa nîra ǁkhōhe, tsî ǃoataradi âb ge ā tidede.

¹⁶ǀHaiǀuribab ga tsarab axase ǀhaoǀhaobaseno, tsî sarana ǂgoab axase,

¹⁷ǁînab ga ǂhomi xaweb ge ǂhanu-aiba ǁîna nîra ǂgaeǂgā, tsî ǀhapiob ge ǀhaiǀuriba nîra ǀgora.

¹⁸ǁÎb ra ommi âba ǂnubi ǁgurib khami, tsî ǃûi-aob ra oms âba dī khami.

¹⁹ǃKhū hâseb ra ǁgoeǃgû xaweb ge ǁîsa ǁkhawa dī tama; kōkhâib kao, ob ge a ǀkhai.

²⁰ǃHurigu xab ge ǁgamgu khami nîra ǃkhōhe; tsuxubab ra sares xa ǃgombēhe.

²¹Aiǂoas di ǂoab ge ǁîba nîra ūǃgû, bēb ras kōse; tsîb ge ǁîba ǃkhais âba xu nîra ǃgombē.

²²Elob ge ǁîb ai ǀkhomoǃnâse nîra ǁgôaxa; ǁîb ǃomǁaeba xub ge ǃhaese nîra ǁhâ.

²³Mâ-i hoa-i ge ǁîb ǂama nîra ǁam, tsî ǁîba nîra ǃhō, ǃkhais âba xu.