Read Khoekhoegowab Job 28 Bible Online

Job 28 - Khoekhoegowab bible

Job 28

¹Amase ǀhaiǀurib ge ǂoaxūb ra ǃkhai-e ūhâ, tsî ǃhuniǀurib hîa ra tsunitsuniheb ge ǃkhai-e ūhâ.

²ǂNūǀurib ge ǃhūba xu ra ūǂuihe, tsî ǂaib ge ǀuisa xu ra ǂnâhe.

³ǃKhaenab ra khoen xa ǀamǀamhe; tsî mâǀîs hoasan ra ôaǃnâǃganu ǀuis ǃkhaenab dis kas, sommi ǁōb dib kas hoasa.

⁴ǁÎn ra ā-e khaoǂui ǃnūse, ǁnān ǀgapise ǁan hâna xu; ǁîn ge khoen di ǂais ǀgapise hâs xa ǀuruhe hâ; ǃnūse ǁō ǁkhā khoena xu ǃhorosen hâna.

⁵ǃHūb ra pereba ūǀkhī, tsî ǃnagab ra ǀkharaǀkharahe ǀaes ǀkhas khami;

⁶ǁîb di ǀuidi ge a safirdi di ǃkhai, tsîb ge ǃhuniǀurib di tsararoba ūhâ.

⁷ǃAriǃkhās ge ǁnāǀî gau ǃganna ǂan tama, tsî mûs ǀaub dis ge ǁîba mû tama hâ.

⁸ǂNīsa ǀgurun ge ǁîba dā-ai tama hâ, tsî xammi ge ǁîba īǂam tama hâ.

⁹ǁGuruxaǃnâ ǃhaob tawab ǃommi âba ra ǁgui, ǃhomgab ǃgaosa xu ra dawaǃkhapu.

¹⁰ǃHaogu ǃnâb ǃgûdaoga ra ǁhāǂui; tsî mûs âb ǀgapiǃgôasa xūn hoana ra mû.

¹¹Dâugab ra ǂganam, ǁgamro-i xare-i ǀkhī tidega, tsîb ǂganǃgâsana ǃnâb ǃoa ra ūǀkhī.

¹²Xawe gā-aisiba, mapab ra ǁîba hōhe? Tsî mapas ǃkhais ǁnâuǃāb disa hâ?

¹³Khoeb ge ǁîb di ǀgausa a ǀū; tsîs ge ǃhūb ûitsaman dib ǃnâ hōhe tama hâ.

¹⁴ǃGammi ge: Ti ǃnâb ge a ǀkhai, ti ra mî, tsî hurib ge: Ti tawab ge a kā, ti ra mî.

¹⁵ǀKhaiǀkhaihesa ǃhuniǀurib ge ǁîb ama māhe tama hâ, tsî ǀhaiǀurib ǀkhas ge ǀgaus âba ǀnōǀoaǀoabahe ǁoa.

¹⁶ǃHuniǀurib Ofiri dib ǀkhab ge ǁîba ǀguitikōse ǃgôahe ǁoa, ǃgomǀgausa onikǀuis ǀkhas kas, Safirǀuis ǀkhas kas hoasa.

¹⁷ǃHuniǀurib tsî kristali tsîkha ge ǁîb ǀkha ǀguitikō ǀgause ǃgôahe ǁoa, tsîb ge ǁkhāti ǁamaǃkhunihe ǁoa ǃhuniǀurixū-i ama.

¹⁸Koral tsî kristal ǀuis tsîra xa i ge ǃhoahe ǁoa, gā-aisib koralǀuidi ǃnā hâ xui-ao.

¹⁹Topasǀuis Etiopiab dis ge ǁîb ǀkha ǀguitikō ǀgause ǃgôahe ǁoa; tsî ǀuise ǀkhaiǀkhaihesa ǃhuniǀurib ǀkhab ge ǀguiti-īse ūhâhe ǁoa.

²⁰ǁNā gā-aisiba mapa xub ra ǀkhī? Tsî mapas hâ ǁnâuǃāb di ǃkhaisa?

²¹ǁÎs ge ûitsaman hoan di mûǁaeba xu a sâusa, tsîs ge anin ǀhommi dina xu sâuhe hâ.

²²Kāǁōb tsî ǁōb tsîkha ra mî: ǁÎb di gomma khom ge sikhom di ǂgaedi ǀkha ge ǁnâu.

²³Elob ra daob âba ǁnâuǃā, tsî ǁîb ge ǃkhais âba a ǂan,

²⁴ǁîb ra ǃhūbaib di ǀkhâuǀamdi kōse kō xui-ao; ǁîb ra hoana mû ǀhommi ǃnaga.

²⁵ǂOabab ge ǃgommi âba dībao tsî ǁgamgab ge ǀnō-ūdab ǀkha ǀnō-o;

²⁶ǀapibab ge ǂhanuba ǂnûiǂgābao, tsî dao-eb ge ǃgurugu di napaba dībao,

²⁷ǁnāǃnubaib ge ǁîba ge mû tsî ǁîb xa ge ǃhoa; ǁîb ge ǁîba ge ǁāǁā tsîb ge ǁîba ge ǃâitsâ.

²⁸Xawe khoeb ǃoab ge ge mî: Mû, ǃaoǃgâb ǃKhūb dib ge a gā-aisi, tsî ǂkhababa xu ǂgōsens ge a ǁnâuǃā.