Read Khoekhoegowab Job 3 Bible Online

Job 3 - Khoekhoegowab bible

Job 3

¹ǁNās khaoǃgâb ge Joba ams âba khowa tsî ǁîb ge ǃnae tsēsa ge ǀâxare.

²Tsî Job ge tsoatsoa tsî ge mî:

³As kā ǁnā tsēs ǁîs ai ta ge ǃnaes tsî ǁnā tsuxub ǁîb ǃnâ i ge: Aore khoerob ge go ǃnae! ti mîheba.

⁴ǁNā tsēsa as ǃkhae; îb Eloba ǁîs xa tā dî ǀgapiseba xu; îs ǃnâb di ǂkhaib xa tā ǀkhâuǂamhe.

⁵A kha ǃkhaenab tsî ǁōb di sommi tsîkha ǁîsa ūbasen; a di ǃâude ǁîsa ǃgū-ai; îb tsēs di ǃkhaenaba ǁîsa ǃhuriǃhuri.

⁶ǁNā tsuxub ǁkhāb ai ab ǃkhaenaba ǁîba ūbē; îb tā ǃgâiaǂgao tsēdi kurib didi ǃnâ, îb ǁkhâgu di ǃgôab ǃnâ tā sī.

⁷Ā, ǁnā tsuxub ǁkhāba ab ǃū-aisase ī; dâxa ǁnaeba ab tā ǁîb ǃnâ sī.

⁸A gu tsēs di ǀâxare-aoga ǁîba ǀâxare, ǁîgu Leviatanna ǂkhaiǂkhaikhâisa ǁkhāba ga.

⁹A di ǁgoaǂnobos âb di ǀgamirode ǃkhae; ab ǃnâba ǃâu, xaweb tā hā îb ǁgoas tsēs dis di ǀamekha tā mû,

¹⁰ti îs ǃnāb di dao-amdeb ge ǂganam tama tsî ǀhupubab ge ti mûra ǂganǃgâsaba kai tama i amaga.

¹¹Tare-i ǃaroma ta kha ǁō tama ge i ǃnaes ǃnâ? Tsî tare-i ǃaroma ta kha ǀomǀuni tama ge i, ǁgûsi ǃnāba xu ta ge ǀkhī ǃnubai.

¹²Tare-i ǃaroma di kha ǁgoade ge ǃoa te tsî tare-i ǃaroma samde, dai ta nîse?

¹³O ta ge nēsi ǁgoe tsî ga ǃnō hâ; o ta ge ga ǁom hâ, o ta ga sâb ǃnâ hâ hâ;

¹⁴gao-aogu tsî ǃhūbaib di ǀapemā-aogu tsîgu ǀkha ǃū-aisa ǃkhaide ge ǂnubibasenga,

¹⁵tsî gao-aogu ǃhuniǀuriba ge ūhâ gu ǀkha omdi âga ǀhaiǀurib ǀkha ge ǀoaǀoaga.

¹⁶O ta ge sâubēhe hâ i, ǁaeb aiǃâ ǃnae hâ i axase ga ī hâ, ǀgôaron hîa ǃnâba mû tama hân axase.

¹⁷ǁNāpan ra eloxoresana ǀû ǂkhupib ǀkha, tsî ǁnāpan ra sâ, ǀgaib ǂkhabu hâna.

¹⁸ǁNāpan ge ǃkhōsabena ǀhûpe sâb ǃnâ hâ; ǁîn ge doeǁga-aob di domma ǁnâu tama hâ.

¹⁹ǂKharin tsî kain tsîn ge ǁnāpa hâ, tsî ǃgāb ge a ǃnorasa ǀhonkhoeb âba xu.

²⁰Tare-i ǃaromab ra ǃnâba mā, tsî ûiba tsûaǂgao hâna,

²¹ǁnān hîa ǁōba ra ǁkhorena, xaweb a ǀkhai, tsîn ra ǁîba khaoǃgon, gaugauhe hâ ǁuigu ra khaoǃgonhes ǃgâ-ai;

²²ǁnān urikhâin nîs kōse ǃgâiaǂgao hân ǀhobasan ra hō ǃnubai ra ǃgâiaǂgaona.

²³Tare-i ǃaromab ra khoeb daob âb a ǂganǃgâsaba ǃnâba mā, khoeb Elob xa ǃnamiǂgāhe hâba?

²⁴Ti pereb khamis ra ti ǀhâimâinǀomsa hā xui-ao; tsî ti ǃgōs ge ǁgam-i xase ra ǁhōǂuisen.

²⁵ǃAo ta ge ǃkhai-i, ǁî-i ge hāǂam te xui-ao; tsî sau ta ge ǃkhai-i ge ti ai ge hā.

²⁶Sâ tama ta hâ, ǃnō tama ta hâ, ǁūse ta hâ tama, xawe ǃgomgu ge ra hāǂam te.