Read Khoekhoegowab Job 30 Bible Online

Job 30 - Khoekhoegowab bible

Job 30

¹Xawe nēsi gu ge ra âiǂui te, ǁnāgu tita xa a ǀoro tsēdi â-igu, ǁgûgu âga ta ga ti gūn di arigu tawa ǁaeǁaesensa ǂkhā hâga.

²Mâ xū-eb kha harebeba te hâ ǁîgu ǃommi di ǀgaiba? ǀGaib ge ǁîgu ǃnâ kairasiba xu ge kā.

³ǁNāgu tôasib tsî ǃâs tsîra xa ǂkhabu hâgu, ǂnâsa ǃkhaidi ǃoa ra ǁhâgu, ǃkhae tsî ǀkhaiǃnâ tsî hîǀhuruhesa ǃkhaidi ǃoa.

⁴ǁNāgu, hîa ǂōxa ǁhaona hain ǃnâ ra ǃoragu, tsî ǀnabuhais ǃnomaba ǂûse ūhâga.

⁵ǁÎgu ge khoen ǁaeguba xu ge doeǁgaǂuihe, khoen ge ǁîgu ǂama ge ǃau, ǃnari-ao-i ǂamas axase.

⁶ǃGoaǃnāgu di ǁhāgu ǃnâ gu nî ǁanga, ǃhūb tsî ǃhaogu di āgu ǃnâ.

⁷Hain ǁaeguba xun ge ge ǃau, tsî ǁkhūdi ǃnân ge ge ǀhao.

⁸ǁÎgu ge gâren ôa tsî xū tama ǀgôa ge i, o gu ge ǃhūba xu ge ǂnauǂuihe.

⁹Xawe nēsi ta ge tita ǁîgu di ǀkhōxū kai; tsî ta ge ǁîga ge ǃhoaxū kaiba.

¹⁰Tita gu ra uixa xui-ao gu ge tita xu ǃnūse ge bē; ā, tsî gu ge ǁaetamase tita gu ga mûo ra ǂara.

¹¹ǁÎb ge ti tsuriba xore tsî ge ǁgâiǀā te, ǁnā-amaga gu ge ǂgā-amǃnâba ti ais aiǃâ ge tobosa kai.

¹²Ti amǀkhāb ain ra ǂkhamkhoena khâi tsî ra ǂhābē ti ǂaira tsî tiǀî ǁîn di tsūǃōxa daoga unu.

¹³ǁÎn ra ti ǃganna khôakhâi; ǁîn ra ti ǀkhomǀkhomsasiba ǃhaeǃhae; ǁîn hîa hui-ao-e ūhâ tamana.

¹⁴ǁÎn ra hā hara ǂgoab di khôaǃkhai-e ūs khami; hîǀhurusa ǃkhaib ǃnân ra gabasenǂgâxa.

¹⁵ǃHuriǃhuridi ǀkhan ge ti ǃoagu ge oa; mâ-i hoa-i ge ǂoa-i axase ti ǃgôasiba ra ǃgôaǃgon, ob ge ti ǃgâiǃgâba ǀnanu-i axase ge ǃgôa-ī.

¹⁶ǁNā-amagas ge ti ǀomsa ti ǃnâ ra ǁhōǂuisen; tsēdi ǁgâiǀāb didi ge tita ra ǃkhōǀgara.

¹⁷Tsuxub ra ti ǂkhōga ti ǃnâ doroǃnam; tsî tita ra hāba tsûb ge mâ tama hâ.

¹⁸Hoaǀgaixasib ǀkhab ge ti saraba ra ǀgaruǀgaru; ǁîb ra ǃgaeǂnami te, ti sarab di ǃaob ǀkhas khami.

¹⁹ǁÎb ge tita ǂgoab ǃnâ ge aoǂgā, tsî ta ge tsarab tsî tsaob tsîkha ǀkha ge ǀguiti-ī.

²⁰Tita ge satsa ra ǂgaiǀî, xawets ge oe-am te tama hâ; mâ ta hâ, xawets ge ra kō te.

²¹Sats ge tiǀî ǀkhomoǃnâse ge ǀkhara; ǀgaib sa ǃommi dib ǀkhats ra ǁkhanxase mâǃoa te.

²²ǁGaoǂoab aits ra ūkhâi te, sats ra ǁîb ai ǃgapi kai te; tsî sats ra ǁgaoǂoab ǃnâ kāǁō kai te.

²³Tita a ǂan xui-ao, ǁōb ǁgats nî ūsī te ǃkhaisa, tsî ommi ûitsaman hoan dib ǁga.

²⁴Xawe sats khoetsa ǁnāts kao, ǃomma ǀhōǂui tamats hâ, tsî kāts kao, ǃauts tide?

²⁵Ā tama ta ge i, ǁnāb karosa tsēde ūhâb ǂama? Ti ǀomsa ǂhansen tamas ge i ǂhâ hâb ǂama?

²⁶Ti ī xawe ta ra ǃgâiba ǃâu hîab ge ǂkhababa ge hā; ǃnâba ta ra ǃâu hîab ge ǃkhaenaba ge hā.

²⁷Ti ǃnāxūn ge ra ǁhuruǀû tamase hâ; tsēdi ǁgâiǀāb didi xa ta ge hāǂamhe hâ.

²⁸Tita ge ǂnūse ra ǃgû, xawe soresa xu tama; khâi tsî ta ge ǀhaohâb ǃnâ ra huiǂgai.

²⁹Tita ge ǀgirigu di ǃgâsa kai tsî ǂkham ǀamigu di horesa kai hâ.

³⁰Ti khōb ge ti ai ge ǂnū tsî tita xu ra ǁnā; ti ǂkhōgu ge ǀgammi xa ra khau.

³¹ǁNā-amagas ge ti harpsa go ǃoab di ǃgae-am kai, tsî ti ǂnunib ge ā ran di dommi ase go i.