Read Khoekhoegowab Job 31 Bible Online

Job 31 - Khoekhoegowab bible

Job 31

¹ǃGaeǀhao-e ta ge ti mûra ǀkha ge dī; mati ta kha ga ǂkhamkhoes ai ǃgaoǃgâ hâ?

²Tsî taresa ti amǃnâs Eloba xu ǀgapiseba xu hâsa, ǀumis Hoaǀgaixab disa ǀgapiseba xu?

³Kāǁōba sa ǂkhabab di amǃnâ tamaba, tsî tsūǀkhāba ǂhanuoǃnâse ra sîsenn di tamaba?

⁴ǁÎba mû tamab hâ ti daoga, tsî ǃgôa tamab hâ ti dāǃharodi hoade?

⁵ǁAusiba ta ga ǂharugu-ūo, tsî ti ǂais ga gāxaǃnâsib ǃoa ǃhaeo;

⁶ab ǁnâi ǂhanu ǀnō-ūxūs ai ǀnō te, ob ge Eloba ti ǂhauǃnâsiba nîra ǂan.

⁷Tsî ǃgûs ga daoba xu ǂgō hâo, tsî ti ǂgaob ga ti mûra saoǃgon hâo, tsî ǂnao-i ga ti ǃomkha tawa ǂae hâ,

⁸o ta ge nî tsoro, xawe naub ge nî ǂû, ob ge ti suriba nîra ǃhūǃnomahe.

⁹Ti ǂgaob ga tara-i xa nanakaisen hâo, ti ǀgūkhoeb di dao-ams tawa ta ga ǂgona hâ,

¹⁰os ge ti tarasa ǀkharaba nîra ǁkhamiba, o gu ge ǀkharaga ǁîs ǀkha nîra ǁgoe.

¹¹Taotaosa dīǃkhai-i ge a ǁî xui-ao, tsî i ge a dīsā ǂhanuǂhanu-aogu aiǃâ.

¹²ǀAes ge a ǁî xui-ao hîkākās kōse ra hapusa; tsî hōbasen ta gen hoana ra ǃhomǂuisa.

¹³ǂHanub ti ǃgāb dib kas, ti ǃgās dib kas hoasa ta ga ǃharaxū hâo, tita ǀkhan ra ǂnoagu hîa,

¹⁴tare-e ta kha ǁnâi nî dī Elob ga khâio, tsî ǁîb ga ôaǃnâsa dīo, tare-e ta kha ǁnâi nî ǃeream?

¹⁵ǁNāb tita ǃnāb ǃnâ ge kuruba, ǁîb ona kha kuru tamab hâ? Tsî ǀGuib ǀguiba kha sikhoma ǁgûs ǃnâ ǂnubi tama hâ?

¹⁶ǀGâsaba ta ga ǂgaob ra xū-e ǂkhā hâo, ǃoataras di mûra ta ga tsanaǁkhui kai hâo,

¹⁷tsî ti pere-e ta ga ǀguri ǂû hâo, ǃoaǀgôab ǁî-i xa ǂû tamase;

¹⁸ǂkhamsis âba xub ge tita xa ǁgûta ase ge kaikaihe tsî ti îs di ǃnāba xu ta ge ǁîsa ge ǂgaeǂgui xui-ao;

¹⁹khoe-i ra ǂkhôaǂgâ ǃkhaisa ta ga mû hâo, sara-e i ūhâ tama hâ amaga, tsî ǂhâ hâ-e anaxū-e i ūhâ tama hâ amaga,

²⁰kamanab âb ga ǀkhae te tama hâ io, ti ǁkhaon di khōgu xab ge ǃnaeǃnaehe ǃnubai,

²¹ti ǃomma ta ga ǃoaǀgôabǀî gongon hâo, ti huiba ta ge ǁāb ǃnâ mû amaga,

²²ab ǁnâi ti ǃhōba ǃhōǂkhōba xu ǁnā, îb ti ǁôaba ǂkhōb âba xu khôa.

²³Kāǁōb Eloba xu ra hāb ge tita tawa ǃhurise ge i xui-ao, tsî ǁîb di ǀgapisib xa ta ge ge ǁkhāoǃnâ.

²⁴ǃHuniǀuriba ta ga ti ǂgomaiǂnûise ū hâo, ǀui ǃhuniǀurib ǁga ta ga: Ti mûmâinǃgâts ge satsa, ti mî hâo,

²⁵ǃgâiaǂgao ta ga hâ io, ti xūxasib ge kai ǃkhais ǃaroma, tsî ti ǃommi ge kaise ǂgui xūna hō ǃkhais xa,

²⁶sores ǃnâba ta ga ǃgapaǀî hâo, ǃnâb ra khami, tsî ǁkhâba ǂkhaisaseb ra ǁhai khami,

²⁷tsî ti ǂgaob ga ǂganǃgâsib ǃnâ nanaǁnâhe hâo, ti ǃommi ge ams âtasa ǁoas kōse,

²⁸ǁî ǃkhaisa as ǁkhāti dīsāse ī, ǂhanuǂhanu-aob aiǃâ Elob ǀgapise hâba ta ga ǀūxū hâ xui-ao.

²⁹ǃGâiaǂgao ta ga hâ io ti ǁkhansaben di ǁgâiǀāb xa tsî kaise dâ hâ io, ǂkhabab xab ge hāǂamhe ǃnubai;

³⁰ti namǃhanab ona ta ge ǁoresa mā-am tama ge i, ǀâxare-i ǀkha ta nî ǀoms âba turasa.

³¹Aogu ti tentomdi digu ga mî tama hâ io: Mapab hâ ǀguib âge, ǁîb di ǁgans xa ǁâ tamaba?

³²ǃHaokhoeb ge daob ai hâǁgoa tama ge i, ti dao-amde ta ge ǃgûdaob ai hâba ge ǁkhowa-amba.

³³Adammi ge dī khami ta ga ti ǃûǂamsa ǃgū-ai hâ io, ti tîǂams ǃnâ ti dīsāsa ra gaugause.

³⁴Ama kai ǂguiba ta ge ǃao amaga, tsî ǃharaxūb ommi din dib ge ǃhuriǃhuriǃnâ te, ǃnō ta nîse tsî ta dao-amsa-ū ǂoa tides kōse.

³⁵Koma ta ga ǀguiba ūhâ, tita nî ǁnâuba! Kō nēs ge ǂgao ta hâsa: Ab Hoaǀgaixaba ǃeream te; îb ti mâǃoasabeba ǂkhani-e xoa.

³⁶ǁÎ-e ta kha ti ǃhōb ai tani tide! Amase ta ge ǁî-e krons axase nî ǀgapa.

³⁷O ta ga ǁîba ǃgôab ti dāǃharodi diba ǂanǂan; gao-aota ase ta ga ǁîba dāǀgū.

³⁸Ti ǃhanab ga ti ǃoagu ǂgaio tsî ǃgaoxūs di daogu ga ǀhûpe āo,

³⁹ǃgaos âba ta ga matare tamase ǂû hâo, tsî ǁōb ǁîb di sîsenaogu diba ta ga ǃaromaba hâo,

⁴⁰ab ǁnâi ǃhorob di amǃnâs ai ǀgamina ūǀkhība te, tsî gerstǃhorob di amǃnâs ai ǁîǁhaibena. Nēpa di ge mîdi Job dide ra ǀam.