Read Khoekhoegowab Job 32 Bible Online

Job 32 - Khoekhoegowab bible

Job 32

¹ǃNubai gu ge ǁnā ǃnona aoga Joba ge ǃereamǀû, ǁîb mûǁaeb a ǂhanu-ai amaga.

²ǃNubaib ge Elihub, Baraxeeli ôab, Busiǁîb, Rammi ǃhaos dib di ǁaiba ge khâi. Jobǀîb ge ǁîb di ǁaiba ge khâi, ǁîb ge Elob aiǃâ ǂhanu-aikaisen amaga.

³ǁAib âb ge ǁkhāti ǃnona horesagu âb ǃoagu ge khâi, ǃereamsa gu hō tama xawe gu ge Joba ǀgoraǃgâ amaga.

⁴Tsî Elihub ge mîdi âb ǀkha Joba ge ǃâu, ǁîgu ge ǁîba kaiba i amaga.

⁵Tsî Elihub ge ǁnā ǃnona aogu di ams ǃnâ ǃeream-i xare-i hâ tama ǃkhaisa mûo, ob ge ǁaib âba ge khâi

⁶ǁÎ ǃkhais xab ge Elihub, Baraxeeli ôab, Busiǁîba, ǃeream tsî ge mî: Tita ge kurin ǃnâ a ǂkham, xawe sago ge kaise kaira hâ; ǁnā-amaga ta ge go sau tsî go ǃao, ti ǂâisa ta nî sago ǂanǂansa.

⁷Tita ge nēti ge mî: A di tsēde ǃhoa; îb kurigu di ǂguiba gā-aisiba ǂanǂan.

⁸Amase, Gagab khoeb ǃnâ hâb, tsî ǀoms Hoaǀgaixab dis ge ǁîna ra ǁnâuǃāxa kaisa.

⁹Kaigu ge gā-ai tama hâ, tsî kairagu ge ǂhanuba ǁnâuǃā tama hâ.

¹⁰ǁNā-amaga ta ge tita ra mî: Tita ǃgâ re; î ta ǁkhāti tita ti ǂâisa ǂanǂan.

¹¹Mû, tita ge sago di mîde ge ǃgâ, tita ge ti ǂgaesa sago di ǂandiǀî ge ǂō; mîde go nî hōǂuis kōse.

¹²Tsî sago ta ge ǃgâo, mû, ǀguib xareb ge ǀkhai ge i, Joba nî ǃhoadanna; ǀguib sago xu ǁîb di mîde ge ǃereamma.

¹³Sago: Sige ge gā-aisiba go hō, ti mî tidega; Elob ǀguib kom ǃeream bi ǁkhāo, tsî khoe-i xare-e tama.

¹⁴Titab ge mî-i xare-e mîǀî tama hâ, xawe ta ge sago di mîdi ǀkha ǃeream bi tide.

¹⁵ǁÎgu ǃhuri hâ ǃkhais xa gu ge ǃaruǀî ǃeream tama hâ; mîdi ge ǁîga xu kā hâ.

¹⁶O ta ge ǁnâi ge ǃâu, xawe gu ge ǃhoa tama ge i, ǃnōsase mâ tsî gu ge ǃaruǀî ǃeream tama i xui-ao.

¹⁷Tita on ge ti ǃnāsa ǃeream ǂgao hâ; tita on ge ti ǂâisa nî ǂanǂan.

¹⁸Mîdi xa ta ǀoa hâ xui-ao; gagas ti ǃnāb dis ra ǁgari te;

¹⁹mû, ti ǃnāb ge ǂauxûib hîa ǁkhowa-amhe tama hâb khami ī, ǀasa ǁhōgu khamib ra ǂari ǁga.

²⁰Tita ge nî ǃhoa, î ta ǀom-am-e hō; tita ge ti amǁgaukha nî khowa tsî nî ǃeream;

²¹î ta ga tā khoe-i di aisa ǃkhōǃoa, î ta ga tā khoe-i tawa ǃgâiǃgâibasen;

²²ǃgâiǃgâibasene ta a ǀū xui-ao; ǀnîsib ge ti Kuru-aoba ǃhaese nî ūbē te.