Read Khoekhoegowab Job 34 Bible Online

Job 34 - Khoekhoegowab bible

Job 34

¹ǃAruǀîb ge Elihuba ǃeream tsî ge mî:

²ǁNâu, gā-aigo, ti mîde, î tita ǃgâ, ǁnâuǃāxago.

³ǂGaes ra mîde ǃâitsâ, namǃhanab ra ǂûna tsâtsâ khami xuige.

⁴A da ǂhanu a-e ǁhûiǂuibasen; î da sada ǃnâ ǃgâi a-e ǂan.

⁵Job ge ge mî xui-ao: Tita ge a ǂhanu-ai, tsî Elob ge ti ǂhanuba ge ūbē.

⁶O ta ge tita ǂhanu ta a xawe ǂhumi-aose ra ǃgôahe, ti ǀhapidi ge a ǂgau ǁoa, ǀhapio ta a xawe.

⁷Mapab hâ Job khami ī aoba, ǃhōmîde ǁgam-i axase ra āba?

⁸ǂKhabadī-aogu ǀkha ǀhû tsî eloxoresa khoegu ǀkha ra ǀnaremaba?

⁹ǁÎb ge: Aoba i ge harebeba tide Elob ǁîb xa a ǃgâibahe ǃkhaisa, ti ra mî.

¹⁰ǁNā-amaga, ǁnâuǃāb â-i aogo, tita ǃgâ re. Ab Eloba eloxoresasiba xu ǃnūse hâ, tsî Hoaǀgaixaba ǂkhababa xu.

¹¹ǁÎb ra khoeb di sîsenni ǃoa ǁîba mādawa-am; tsî mâb hoab di daob ǃoab ra ǁîba hōǃâ kai xuige.

¹²Tsî amase, Elob ge eloxoresase sîsen tama hâ, tsî Hoaǀgaixab ge ǂhanuba dawaǃkhuni tama hâ.

¹³Tari-e ǁîba ǃhūbaib ǂama ge mâi? Tsî tari-e ǃhūbaib hoaba ge ǁāǁā?

¹⁴ǁÎb ga ǂgaob âba ǁîb ǀguib ai ǂnûi-o gagas âb tsî ǀommi âbab ga ǁîb ǃnâ ǂgaedawao,

¹⁵os ga ǁgans hoasa ǀhûpe ǁō, ob ga khoeba tsarab ǃoa oa.

¹⁶Tsî ǁnâuǃāb ga sa ǃnâ hâo, ǁnâu ǁnâi nēsa, ǃgâ ǁnâi dommi ti mîdi diba.

¹⁷ǁNāb ǂhanuba ǁkhan hâba, gaosîsen ǁkhāb a? Tsî satsa ǀgoraǃgâts nî ǁnāb ǂhanu-ai tsî ǀgaisaba?

¹⁸Khoe-e kha gao-ao-i ǃoa: Xūtamats, tsî gaosagu ǃoa: Eloxoresago, ti mî ǁkhā-e?

¹⁹ǁNāb gaosagu di aisa ǃkhōǃoa tama tsî ǃkhū hâba ǀgâsab ǃgâ-ai ǂan tama hâba, hoan a ǃomkha âb di sîsen xui-ao?

²⁰ǀGui mûsǀapirob ǀguib ǃnân ra ǁō, tsuxuǃgâb ǃnâs ga i xawe; ǁaes ra gongonǃnâhe on ra kā; tsî ǀgaisab ra ūbēhe, khoe-i ǃommi ose.

²¹Mûdi âb ge mâb hoab di daob ai hâ xui-ao; tsî ǁîb ra mû ǁîb di dāǃharodi hoade.

²²ǃKhaena-i xare-i ge a ǀkhai, tsî ǁōb di sommi xareb a kā, ǁîb ǃnâ gu ǂkhabadī-aoga nî sâusen ǁkhāba.

²³Amaseb ge ǁîba khoeba ǃnā hâse ǁguiǂam tama hâ, ǀgoraǃgâs ǃnâb Elob ǀkha nî ǂgâ ǁkhāse.

²⁴ǁÎb ra ǃgari-aoga ǂkhūǂkhū, sats khoets ǁî ǃkhaisa a ôaǃnâ ǃganu ǁoas kōse, tsîb ra ǀnîga ǃkhais âgu ai mâi.

²⁵Sîsengu âgab a ǂan amagab ge ǁîba tsuxub ǃnâ ǁîga ra ǃkhomǃnâ, o gu ge ra ǂkhū.

²⁶ǁÎb ra ǁîna eloxoresan ase ǂnauǂkhūǂkhū, ǃkhai-i hoan a ǁî-e mû ǁkhā i tawa,

²⁷ǁÎb khaoǃgâba xun ge ǁnāǁgôa, tsî ǁîb di daogu hoagan ge ǁnâuǃā tama ge i amaga.

²⁸ǁÎb nî ǁîb ai ūhāga ǀgâsab di ǂgaisa, tsî ǂgais ǀkhomǀkhomsaben disab nî ǁnâu-amse.

²⁹ǁÎb ga ǃnō-o, tari-e nî ǀgoraǃgâ? ǁÎb ga aisa gaugauo, tari-e nî ǁîba kōǀî, ǁae-i ǂamas kas, ǀguiǀguiben ǂamas kas hoasa?

³⁰Hînaxaǃnâ khoeb ǃaruǀî gaosîsen tidega, tsî ǁnoagu ase gu ǁaesa hâba tidega.

³¹Ā, anus ge a Elob ǃoa mîsa: Tita ge sa ǁkharaba ge tani, tita ge ǃaruǀî mâǃoa tide.

³²Mû tama ta hâ-e ǁkhāǁkhā te re; ǂkhabase ta ga dī hâo, o ta ge ǃaruǀî dī tide.

³³Satsa xu i nî hā, matib nî ǁîba mādawa-am ǃkhaisa, ǁîbats ra ǃharaxū hîa? Satsa ǁhûiǂuibasents ga tsî tita tama? Tare-ets kha satsa a ǂan? ǃHoa!

³⁴ǁNâuǃāb â-i khoegu ge tita nî ǃkhō-am, tsî gā-ai aob ge tita nî ǁnâu:

³⁵Job ǂans ǀkha ǃhoa tama ǃkhaisa tsî mîdi âb ǀā ǁnâuǃāb ǀkha ge hâ tama hâ i ǃkhaisa.

³⁶Abotse, ab Joba ǃâitsâhe ǀams kōse, ǂkhaba khoen ǃnâb ra ǃeream xūn ǃaroma!

³⁷ǁOreb âbab ra dīsāsa ǁkhāti dīǀaroǃnâ xuige; ǁîb ge sida ǃnâ ra ǁapunǃom tsî mîdi âba ra ǂguiǂgui Elobǀî.