Read Khoekhoegowab Job 36 Bible Online

Job 36 - Khoekhoegowab bible

Job 36

¹Tsî Elihub ge ǃaruǀî ge mî:

²ǂKharirose ǃâu te, î ta ǁgau tsi ganupe di ti mîde Eloba hâba ǃkhaisa.

³Tita ge ti ǂansa ǃnūseba xu nî ūhā; tsî ta ge ti Kuru-aoba ǂhanu-aisiba nî dī-ū.

⁴Ama, amase di ge ti mîde ǂkhabase ī tide xui-ao; ǀguib ǂans ǃnâ ǀoasab ge sa tawa hâ.

⁵Mû, Elob ge a ǀgaisa, xaweb ge ǃharaxū tama hâ; ǁîb ge a ǁkhā, ǁnâuǃāb di ǀgaib ǃnâ.

⁶ǁÎb ge eloxoresaba ûi kai tama hâ, tsî ǀkhomǀkhomsabenab ra ǂhanub âna mā.

⁷ǁÎb ge mûra âba ūǁnâ tama hâ ǂhanu-aina xu, tsîn ge gao-aogu ǀkha ǁîgu di trons ai hâ; ǁnāpab ra ǁîna ǂnûi ǀamos kōse, tsîn ra ǀgapiǀgapihe.

⁸Tsî ǁkhamgu ǀkha ǃgaehe hâǃân ga ǃgae-ūdadi ǃgomsigu didi ǀkha ǃkhōǁapoheo,

⁹ob ge ǁîba dīb âna ǁîna ra ǂanǂan, tsî ǁîn di ǃûǂamde, ǁîn ra ǀgapiǀgapisen amaga.

¹⁰Tsîb ge ǁîba ǁîna ǂgaedi ǃnâ ǂgōǀausa ra ǂhaiǂhai tsî ra mî, în ǃhobasen ǂhanuoǃnâsigu âna xu.

¹¹ǁNâu tsîn ga ǁîba ǃoabao, on ge tsēdi âna ǃgâib ǃnâ nîra hâtoa tsî kurigu âna ǀnamǀnamsasigu ǃnâ.

¹²Xawe ǁnâuǀnam taman ga io, on ra gôaba xu ǁō tsîn ra ǂans ose kā.

¹³Tsî hînaxaǃnâ ǂgaogu â-in ge ǁaiba ra ǀhaoǀhaobasen, ǁîn ge ǀkhomabasen tama hâ, ǁîb xan ra ǃgaeheo.

¹⁴On ge ǂkhamsis ǃnâ nîra ǁō, tsî ûib ân ge taotaosase nî ǀam.

¹⁵ǁÎb ge ǀkhomǀkhomsabeba ǀkhomǀkhomsasib âba xu nîra ǃnoraǃnora; tsî ǁgâiǀāb ǃnâb ge ǁîn di ǂgaesa ra ǁkhowa-am.

¹⁶ǁNās ǁkhās xaseb ra ǁkhāti satsa ǂōǂōb di amsa xu hara ǃkhaibǀî nana, ǁîb ǃnâ i ǂōǂō-i xare-e hâ tamaba, tsî ǂûn sa tāb dinab ra kausasib xa ǀoa kai.

¹⁷Xawe sats ge eloxoresab di ǀgoraǃgâsa ge ǀoaǀoa; ǀgoraǃgâs tsî ǁkharab tsîra ra ǃkhō tsi.

¹⁸ǁGôasib hâ xuige ǂan, îb tā ǀnîsi ǀgui ǂhās ǀguis ǀkha ǂhāxu tsi, oremarib kaib ǀnîsi ǂgaeǂhapu tsi tidese.

¹⁹ǁÎba sa huiǂgaisa ǃgôab nî, ǂōǂōsib ǃnâts sī tidega, ǀgaib ǀkhats ga ǀgaiǀgaisen xawe?

²⁰Tā ǁkhore ǁnā tsuxub, ǁîb ǃnâ di ǁaede nîra ūbēheba ǁîdi di ǃkhaisa xu.

²¹ǂAnbasen îts tā ǂhanuoǃnâsib ǃoa ǂnan, ǁîbats ra taniǀnamxasib xa ǂgao xuige.

²²Mû, Elob ra ǀgapiǀgapi ǀgaib âb ǀkha. Tariba ǁîb khami ī ǁkhāǁkhā-aoba?

²³Tari-e daob âba ge ǁgaumâiba bi, tsî tari-e: Sats ge ǂkhabase ge dī? ti ge mî-e.

²⁴ǂÂi îts sîsenni âba kaikai, khoen ra ǁîb xa ǁnaeba.

²⁵Khoen hoan ra ǁîba kōǀî; khoeb ra ǁîba ǃnūseba xu mû.

²⁶Mû, Elob ge a ǀgapi, xawe ta ge ǃkhā tama hâ, tsî ǃgôab ǁîb di kurigu dib ge a hōǂuiheǁoasa.

²⁷ǁÎb ra ǁgamrodi ǁgammi dide ǂgaeǁare, ǃhūb âb ǃnâ ǀapiba ra ǁhō kaide;

²⁸tūǀnanude ra ǁhōǂuiba, tsî khoeb ǂama ǀoasase ra ǂnâǁgôaba kaiba.

²⁹ǁNâuǃā ǁkhāts a xare, sats khoetsa, ǃâudi di ǁhaosa, tsî ǂkhupib ǁîb di oms diba?

³⁰Mû, ǁîb ra ǁîb ǂnamipe ǃnâba khoraǂui, tsî ǃnomagu hurib digab ra ǃgū-ai.

³¹ǁÎb ra ǁî ǃkhais ǀkha ǁaede ǀgoraǃgâ; ǁîb ra ǃnāsase ǂûmā.

³²ǃOmkha âbab ra ǁîba ǃnâb ǀkha ǃgū-ai, tsîb ra ǁîba mîmā mâǃoa-aogu ǃoa-ai.

³³ǁÎdi ǃgurub ra ǁîba ǂhôa; tsî ǀgoan tsî ǃapa ra ǃnūb ona.