Read Khoekhoegowab Job 37 Bible Online

Job 37 - Khoekhoegowab bible

Job 37

¹ǁÎ ǃkhais ǃaromab ra ti ǂgaob ona ǀkhū, tsîb ra urikhâi ǃkhais âba xu.

²ǁNâuǃāxase ǃgâ ǀōb ǁîb di dommi dib ai, tsî ǀōb ams âba xu ra ǀkhība.

³ǁÎbab ra ǂhanuse ǀhommi ǃnaga sîǂui, tsî ǃnâb âba ǃhūbaib di ǀkhâuǀamdi kōse.

⁴ǁNās khaoǃgâb ra ǃgō dommi âba; ǁîb ra ǃguru ǀgapi dommi âb ǀkha. Tsîb ge napaba ǀhapeǀhape tama hâ, dommi âb ga ǁnâuheo.

⁵Elob ra buruburuxase dommi âb ǀkha ǃguru; ǁîb ra kai xūna dī, tsî sida ge ǁîna ǁnâuǃā tama hâ.

⁶ǁÎb ra mî tsamaros ǃoa: ǁNā ǃhūbaib ai, tsî ǀapib tūǀnanub ǃoa: ǀGaisa, ti.

⁷ǃNubaib ra ǁîba ǃommi mâ khoeb hoab diba ǂganamǀgaiǀgai, sîsenni âb khoen hoan xa nî ǂanhega.

⁸ǃNubain ra ǀguruna sâusenǃkhaidi ǃnâ ǂgâ; tsîn ra hâ ǁîn di ǁgoeǃkhaidi ǃnâ.

⁹ǃNā-omsa xub ra sareba ǀkhī, tsî ǃkhawagas ǂoaga xu ǃkhaiba.

¹⁰ǀOmmi âba xub ra Eloba ǃnareba mā, hara ǁgamgu ra karos kōse.

¹¹ǁÎb ra ǁkhāti ǀnanude ǁgamma ǃnao-ai; ǁîb ra ǃâudi ǃnâb âb dide ǀgaruǀgaru.

¹²Os ra ǁîsa gā-ai ǀapes âb ǀkha unusen tsî ra ǃgûma, ǁîb di mîmāsas nî dīse, ǃhūbaib hoaragab ǂama.

¹³ǂNauxūseb ga ǁîsa ǃhūba ǁāǁābas kas, ǃgâidīses kas hoasa.

¹⁴ǃGaoǃgâ, Jobtse; mâ îts Elob di buruxa dīna ǁnâuǃā.

¹⁵ǂAnts a xare satsa mâ ǁaeb aib ra Eloba ǁîna mîmā ǃkhaisa, tsî mâ ǁaeb aib ra ǃnâb ǃâus âb diba ǃnâǃnâ ǃkhaisa?

¹⁶ǂAnts a xare satsa ǃâude, mati di ra ǀnarema ǃkhaisa, tsî buruburuxa ǃkhaidi, ǁnāb ǂans xa ǀoa hâb dide?

¹⁷Matin ra sa sarana ǃnae ǃkhaisa ǃhūbab ga ǃkhawagas ǀkhāba xu ǃnōǃnō ǃnubai?

¹⁸Satsa kha ǁîtsa, ǀhomga ǁîba ge ǃāǂuihuitsa, hîa ǁapo hâga ǂnâhe hâ mûsenǃnâxūs axase?

¹⁹ǁGau ge re, î ge sige ǂan, tare-e ge ǁîba nî ǃeream ǃkhaisa; sige ge ǃkhaenab xa ǂhanuse mî ǁkhā tide xuige.

²⁰Mîbaheb nî ǁîba, tita ga ǃhoa ǂgao-o? Khoe-i ǁnāti ra ǂâi-i ge nî hapuhe.

²¹Tsî nēsisab ge mûhe tama hâ ǁnā ǃnâb ǃgāsase ǀhommi ai ra ǃnâba, ǂoab ga ǁîba ǃgomǃnâǃganu tsîb ga ǁîba ǃgāsa kaio.

²²ǀApasa xub ga ǃhuniǀuriba hā, xawe Elob tawa i ge ǃaoǃaosa anusi-e hâ.

²³Hoaǀgaixab, ǁîba ta ge a hōǂui ǁoa, ǁîb ge kai ǀgaib â-iba; xawe ǀgoraǃgâs tsî kai ǂhanu-aisiba xub ge ǁgâiǀā tama hâ.

²⁴ǁNā-amagan ra khoena ǁîba ǃao, ǁîb ge gā-ai dīsen ra-e kōǀî tama hâ.