Read Khoekhoegowab Job 38 Bible Online

Job 38 - Khoekhoegowab bible

Job 38

¹ǁNās khaoǃgâb ge ǃKhūba Joba ǀgaisa ǂoa-e xu ǃeream tsî ge mî:

²Tariba ǁnāb ǀapesa ǁnâuǃāoǃnâ mîdi ǀkha ra ǃkhaeǃkhaeba?

³Khâi îts ǁnâi aorekhoese kamanab âtsa ǃgae; î ta dî tsi, îts tita ǁguiǃāba.

⁴Mapats satsa ge hâ i tita ge ǃhūbaiba ǃgaoǃgao ǃnubai? ǁÎsa ǂanǂan te re, gā-aits kao.

⁵Tariba ǁnāb ǀnē-ūdadi âba ge ǂnûiba. ǁÎ ǃkhaisats kom a ǂano? Tsî tariba ǁnāb ǀnō-ūtsuriba ǁîb ǂama ge ǂgaeba?

⁶Mâ xū-i ǃnâb kha ǃgaoǃgaob âba mâiǂgāhe hâ, tsî tariba ǁnāb ǁhôaǀuis âba ge ǁguiba?

⁷ǁGoaǀgamirodi ge ǀhûpe dâxase ǁnae tsî Elob ôagu hoagu ge dâ ǃnubai.

⁸Tsî tariba ǁnāb hîa huriba, ǃkhopa tsîb ge ǁgûs di ǃnāba xu hā ǃnubai dao-amdi ǀkha ge ǂganamma?

⁹ǃÂusa ta ge tita sarab âb ase ǂnûi ǃnubai tsî ǃkhaenaba ǃgamiǃkhaib âb ase.

¹⁰ǁÎb ǂama ta ge tita ǀkhariba ǃkhopaǃganu ǃnubai, tsî ǂganamūxūn tsî dao-amde ta ge ǂnûiba bi ǃnubai,

¹¹mî rase: Nēs kōsets ge satsa hā ǁkhā, xawe ǃaruǀîts ge sī tide, tsî nēpa gu ge ǃgurixa ǃgabigu âtsa nî hā ǁgoe.

¹²Sa ûitsēsa xu xare satsa ǁgoasa mîmāts ge, xare ǁgoaǂnobosa ǁîs di ǃkhai-e ǁgauts ge?

¹³ǃHūbaib di ǀkhâuǀamdes nî ǃkhōǂgāse tsî eloxoresan ǁîsa xu nî ǃhaeǂuihese.

¹⁴ǀKharaǀkharahes nîse saoǂnûiǂgoa-i xase, tsî sara-i xases nî īse.

¹⁵Tsî eloxoresana xub ǃnâb âba nî ǁkhaehese, tsî ǀgapi ǁôab nî khôahese.

¹⁶Sīts ge xare satsa hurib di tsoatsoaǃkhaidi kōse, tsî ǀnaremats ge xare ǃgamsib di hoan xa ǃgam ǃkhaidi ǃnâ?

¹⁷Dao-amdi ǁōb dide xare ǂhaiǂhaibahets ge? Tsî mûts ge xare ǁāgu ǁōb sommi diga?

¹⁸Sa ǁnâuǃāb ǀkha xare sīts ge ǃhūbaib di ǂhabasib kōse? ǂAnǂan ǁnâi re, nēn hoanats ga ǂano.

¹⁹Mapab hâ ǁnā daob, ǃnâb ǁanǃkhais diba? Tsî ǃkhaenaba, mapas ǁîb ǃkhaisa hâ?

²⁰ǁÎrats nî ǀkharib âra tawa ūsīga, ǁîra ommi di daogats nî ǂanga?

²¹Sats ge ǁî ǃkhaisa a ǂan, ǁnāǃnubaits ge xawe ǃnae xui-ao, tsî sa tsēdi a ǂgui xui-ao.

²²Sīts ge xare satsa ǁui-omgu tsamaros digu tawa, tsî mûts ge xare satsa ǃnareb di ǁui-omga,

²³ǁnā ǂōǂōsib di ǁaeba ta sâuba hâ tsēs ǃkhammi dis tsî torob dis ǁga?

²⁴Mapab hâ ǁnā daob, ǃnâb ra ǁîb ai ǀgoraheba, tsî aiǂoas di ǂoaba, ǃhūbaib ai ra ǀgaruba?

²⁵Tariba ǁnāba ǁhō ra ǀapiba dâudao-e ra ǀgorababa, tsî ǃgurugu di napaba dao-e,

²⁶ǀapi i nîse ǁnā ǃhūb hîa khoe-ob ai, tsî ǁnā ǃgaroǃhūb, khoe-i a ǀkhaiǃnâb ai,

²⁷ǃū-aisa ǃkhaidi tsî ǃgaroǃkhaidi tsîdeb nî ǁâǁâse, tsî ǃam ǀgâbab nî ǀkhī kaise?

²⁸ǀApiba, ǁgûba ūb hâ? Tsî tarisa ǁnās ǀaub di ǁgamrode ra ǁorasa?

²⁹Tarisa, ǃnāb âsa xub ra ǃgomma ǀkhīsa? Tarisa, ǀhommi di ǃgomrona ra ǁorasa?

³⁰ǀUi-i xase gu ge ǁgamga ra karo, tsî ǁgamaib ǃgamǃkhais dib ge ǃkhoa hâ.

³¹ǃGae ǁkhāts a xare satsa ǀkhûsedi di tsôaga? Tsî ore ǁkhāts a Orionni di tsuriga?

³²Masarotǀgamirode, ǁîde ūǀkhī ǁkhāts a xare ǁaeb âdi ai? Tsî ǂgaeǂgui ǁkhāts a xare Bērsa ǂkhamron âs ǀkha?

³³ǂAnts a xare ǀhommi di ǂhanuga? Tsî ǃhūbaib ai dī-unu ǁkhāts a xare gaosis âga?

³⁴Sa domma ūkhâi ǁkhāts a xare ǃâudi kōse, ǃnāǂamsasets nî ǀapib xa hāǂamhega?

³⁵Napaga ǂoa kai ǁkhāts a xare ǃgû gu nîga tsî mû, nēge ge hâ ti gu nî mîǀî tsiga?

³⁶Tariba ǁnāb gā-aisiba ǃâudi ǃnâ ge ǂnûiba, tsî tariba ǁnāb ǁnâuǃāba ǂâisa ge māba?

³⁷Tariba ǁnāb ǀnanude gā-aisib ǀkha a ǃgôa ǁkhāba? Tsî tariba ǁnāb ǀhommi di ǃgapaga a ǁhōǂuiǁkhāba?

³⁸Tsarab ga ǂae tsî ǁapo tsî karo-o tsî ǃhūdadi ga ǂaeǁaeo.