Read Khoekhoegowab Job 39 Bible Online

Job 39 - Khoekhoegowab bible

Job 39

¹Xamma kha xamarina ǃaubats nî tsî ǃâs ǂkham xamgu disa ǁâǁâts nî,

²ǃgamǃgâ gu kao ǁhoagu ǃnâ, āb ǃnâ ǂnû tsî gu ga ǂui ǃnubai?

³Tariba ǁnāb goraba ǂûna ra ǁāǁābaba, ǁîb di ǂkhamron ra Elob ǃoa ǂgaio, ǁhapuman kao ǂûxū-i xare-i a ǀkhai amaga?

⁴ǂAnts a xare satsa, ǃarina di ôaǁaeba? ǃGaoǃgâts ge xare ǁkhamadi di ǁoraba?

⁵ǃGôats ra xare satsa ǁîdi di ǁkhâgu hîa nî ǀoaga, tsî ǂants a xare ǁîdi di ôaǁaeba?

⁶ǂNû tsî di ga ǂkhamron âde ūǀkhīo, tsî tsûgu âde xu di ga ǃnorao.

⁷ǁÎdi di ǂkhamron ra ǁui, hara ǃaub ǃnân ra kai, ǁîn ra ǂoa tsîn ǁîde ǃoa ǁkhawa oa tama hâ.

⁸Tariba ǁnāb ǃgoreba ǃnorasase ge ǃgû kaiba? Tsî tariba ǁnāb ǃgoreb di ǃhâuga ge xoreba?

⁹ǁNāb, ǃgaroǃhūba ta ge ǁanǃkhaise māba, tsî ǀūǃhūba ǁîb di hâǃkhaise.

¹⁰ǁÎb ra ǂkhupib ǃās diba âiǂui, tsîb ge ǀōb doeǁga-aob diba ǁnâu tama hâ.

¹¹ǃHomgu aib ra hōǂui xūn ge a ǁîb di ǃû-ai, tsîb ra ǃam xūn hoana ôama.

¹²ǃGarogomaba kha ǃoaba tsib nî? Hâǁgoab nî sa ǁgorob tawa?

¹³ǃGarogomaba kha ǃgaets nî tsurib âb ǀkha ǃhūǃgaodaob ǃnâ, xareb kha sa khaoǃgâ ǃgoaga nî ǂgaeǂhauǂhau?

¹⁴ǂGomaiǂnûi bits nîra xare, ǀgaib âb a kai amaga? Tsî hâ kaits nî xare sa sîsenna ǁîb ai?

¹⁵ǂGom bits nî xare, sa ǃkhommab nî ǁkhawa ūhā tsî dāǃnâǃkhais âts ai ǀhaoǀhao ǃkhaisa?

¹⁶ǀAmis ra ǁgabokha âsa ǂnīsase gongon. Nēga tsaura ǁgabokha tsî ǃamga?

¹⁷Hî-î, ǃupudi âsas ra ǃhūba ǁnāxūba, tsarab ǃnâ di nî ǃnaese.

¹⁸Tsîs ra ǀuru, ǂais ǁîde ǁgâikhôa, tsîn ǀgurun ǃaub dina ǁîde dāǂkhūǂkhū ǁkhā ǃkhaisa.

¹⁹Karosases ra ǂkhamn âsa sîsenū, ǁîs di taman axase; sîsenni âs ga ǁau, xawes ge ǃao tama hâ.

²⁰Elob ge ǁîsa gā-aisiba ge ūǀhana, tsî ǁnâuǃā-e ǁîsa mā tama hâ.

²¹Khâi tsîs ra ǀgapiǀgapisen ǃnubais ra hāb tsî ǃgapi-aob tsîkha âiǂui.

²²Xarets ra satsa hāba ǀgai-e mā? Satsa ǁkhāts a xare ǃaob âba ǀgareb ǀkha anasa?

²³Satsa kha ǁîba uri kai ǁkhāts a, ǂhommi khami? ǃHaras âb ge a îsa tsî a ǃhuriǃhurisa.

²⁴ǁÎb ra xora ǃhūb ǃnâ tsîb a ǃgâiaǂgaoxa ǀgaib âb ǃnâ, tsîb ra ǂoa ǁâtanisen hâb ǁga.

²⁵ǁÎb ra ǃaoba âiǂui tsî ǃhuri tama tsî oa tama gôab xa.

²⁶ǃGuruǁhōb ra ǁîba ǀōǀî, ǀaexa ǀurigôab tsî ǁhâigôab tsîkha diba.

²⁷ǃGapi tsî ǂkhupi raseb ra ǃhūba hara; tsî mâ tama hâ ǀgapadas di ǀōb xa.

²⁸ǀGapadas ra ǃgāsase ǀō hîab ra: Aha, ti mî tsî toroba ǃnūseba xu ra ǃkhao, ǃguruǀōb gao-aogu tsî ǃaub tsîn diba.

²⁹ǀAuba kha sa ǁnâuǃāba ǁkhanaǃganub ra, tsî ǁgabokha âba ǃkhawagas ǃoa ǃāǂuib ra?

³⁰Sa mîmās aisa ǃariǃkhās ra ǁkhanaǃapasa tsî oms âsas ra ǀgapiseb ǃnâ omsa?

³¹ǁÎs ge ǃhaob ai ǁan hâ tsî ra hâǁgoa, ǃhaob di ǁaposa ǃkhais ǃnâ.

³²ǁNāpa xus ra ǂûna ǃkhēbasen; mûra âs ra ǃnūseba xu mû.

³³ǂKhamron âs ra ǀaoba ǀkhubu, tsî ǃgamhe hâ xūn hâba, ǁnāpas ge ǁîsa hâ.

³⁴Tsî ǃaruǀîb ge ǃKhūba Joba ǃeream tsî ge mî:

³⁵Hoaǀgaixab ǀkha ǀau-aoba ǂnoagu ǁkhāba? Eloba ra ǂgōǀauba ab ǁî ǃkhais ai ǃeream!

³⁶Ob ge Joba ǃKhūba ǃeream tsî ge mî:

³⁷Mû, tita ge ǂkharita, tare xū-e ta kha ǁnâi satsa nî ǃeream? O ta ge ti ǃomma ti ams ai ra ǁgui.

³⁸ǀGui ǃnāsa ta ge ǃhoa, xawe ta ge ǃeream tide, tsî ǀgam ǃnāra, xawe ta ge ǁkhawa dī tide.