Read Khoekhoegowab Job 4 Bible Online

Job 4 - Khoekhoegowab bible

Job 4

¹ǃNubaib ge Elifab Temanǁîba ǃeream tsî ge mî:

²Mî-e ge ga sige sa ǃoa mîo, tsūbahets nî satsa? Tsî ti i ī xawe, tari-e mîde xu ūdawasen ǁkhā?

³Mû sats ge ǂguina ge ǁkhāǁkhā, tsî ǃopo hâ ǃomgats ge satsa ge ǀgaiǀgai.

⁴Sa mîdi ge ǃnôa ra-e gere guikhâi; tsî ǁnāǁgā ra ǁgoadets ge satsa gere ǀgaiǀgai.

⁵Xawe sats tawa i nēsi ra hā ǃkhais xats ra ǂkhabuǂâi; sats ra tsāǀkhāhe, ots ra burugâ.

⁶Sa ǂgomaiǂnûi tamaba kha ge i ǃaoǃgâsib âtsa tsî sa ǃâubasen tamaba kha ge i ǂhanusib sa daogu diba?

⁷ǂÂi tsigo, mâ khoe-e a ǀhapio tsî ge ǁō? Tsî ǂhauǃnâna kha hîkākāhen ge?

⁸Nē-i ge tita ge mû ǃkhai-e: Tsūǃōba ra ǃhūǃgaon tsî ǀhupuba ra tsoron, ǁnān ge ǁîna ra ǃgao.

⁹ǀOmǂuis Elob dis xan ra ǁîna ǁō; tsî ǃgoms ǁaib âb dis xan ra ǁîna hîǀhuruhe.

¹⁰ǃGurub xammi dib tsî dommi ǃgari xammi dib ge ge ǀû, tsî ǁgûgu ǂkham xamgu digu ge ge ǂkhūǂkhūhe.

¹¹ǀGaisa xammi ge ra ǃâǁō, ǃkhōb nî xū-i a ǀkhai amaga, tsî ǂkhamron xams din ge ra ǀgaruǀgaruhe.

¹²ǃAruǀî ta ge ǂganǃgâsa mî-e ge ūhābahe, tsî ti ǂgaes ge ǁî-e ǂkharirose ge ǁnâu.

¹³ǂÂidi tsuxub aidi didi ǃnâ, khoen ra ǃgam ǂoms xa hāǂamhe,

¹⁴ǃnubai ta ge tita ǃhurib tsî ǀkhūb tsîkha xa ge hāǂamhe, o gu ge ti ǂkhōgu hoaga ge ǀkhū.

¹⁵ǃNubai i ge gaga-e ti aisa ge ǃgû-īǀkhā, on ge ǀûn ti ǁgans dina ge khâi.

¹⁶ǁÎ-i ge ǁnāpa ge mâ, xawe ta ge īsib â-e mûǂan tama ge i, ī-i ge ti mûra aiǃâ hâ, tsî i ge ge ǃnōsa i, tsî ta ge dom-e ge ǁnâu hîa ra mî-e:

¹⁷Khoe-e kha ǂhanu-ai i nî Elob ǃgâ-ai? Aoba kha kuru-aob âb ǃgâ-ai ǃanub nî?

¹⁸Mû, ǃgāgu âbab ge a ǂgomaiǂnûi ǁoa, tsî ǀhomǃgāgu âb ge ūose hōhe tama hâ,

¹⁹matikōse ǁnās ǃgâ-aib ǁîsa a dī ǁoa ǁnān ǂgoa-omde ǁanǃnâ hân tsî tsarab ai ǃgaoǃgaohe hân tawa, ǁîn hîa ǁgurin ǁkhān khami ra ǂkhūǂkhūhena.

²⁰ǁGoasa xu ǃuis kōsen ra hîkākāhe; khoe-i ǁîsa ǃgaoǃgâ tamasen ra ǁō ǀamosib kōse.

²¹Tentoms ân di tsurib ra ǃgâuo, on ra ǁō, xawe nēsa gā-aisib ose.