Read Khoekhoegowab Job 40 Bible Online

Job 40 - Khoekhoegowab bible

Job 40

¹Ob ge ǃKhūba Joba ǀgaisa ǂoa-e xu ǃeream tsî ge mî:

²Khâi îts sa kamanaba ǃgae aorekhoese; tita ge nî dî tsi, îts ǃeream te.

³Okha ǁnâi ti ǀgoraǃgâs onats ra ǁauǁau ǂgao? Kha ǁnâi titats nî ǀgoraǃgâ, sats nî ǂhanu-aiga?

⁴Okha Elob dib khami ī ǁôabats ǁnâi ūhâ, tsî ǁîb khami ǁnâi ǁkhāts a dommi ǀkha ǃgurusa?

⁵Anisen ǁnâi ǀgapiǃgôasasib tsî ǀgapisib tsîkha ǀkha, îts ǁnâi ǂgaeǂgā anusib tsî ǂkhaisib tsîkha.

⁶ǁHōǂui ǁnâi ǁgôasib sa ǁaib diba, îts ǃguriǂgaoxa-i hoa-e kōǀî, îts ǁî-e ǃgamǃgam.

⁷Kōǀî ǃguriǂgaoxa-i hoa-e, îts ǁî-e ǃnaga mâ kai îts eloxoresana ǂkhūǂkhū ǁîn di ǃkhais ǃnâ.

⁸ǁÎna ǀhûpe sâu tsarab ǃnâ; îts aidi âna ǂganǃgâsib ǃnâ ǂganam.

⁹O ta ge tita ona satsa nî ǃkhōǀkhā, amǀkhāb ǁôab âts ge hui tsi amaga.

¹⁰Hurigomaba ǁnâi kōǀî, sa xōǀkhā ta ge kuruba, ǁîb ra ǀgâba ǃû goma-i khami.

¹¹Kō ǁnâi ǀgaib âb ge kamanab âb ǃnâ hâ, tsî ǁkhāsib âb ǁîb ǃnāb di ǁapagu ǃnâ!

¹²ǂAreb âbab ge sederhai-i khami ǂgōse ra mâi; ǁapagu tîra âb digu ge ǂgāǃnâguhe hâ.

¹³ǂKhōgu âb ge ǁaposa ǂai-i khami ī; ǂkhōn âb ge ǂnūǀuritanihai-i khami ī.

¹⁴ǁÎb ge a Elob daogu di danaxū, ǁîba ge kurub ge ǁîba gôab âba ge ǃgaemâiǀkhā.

¹⁵ǃHomgu ǁîna ǂûna ra ūǀkhība amagan ra ǀgurun ǃaub din hoana ǁnāpa ǀhuru.

¹⁶Somxa haidi ǃgaob ra ǁgoe, sâuǃkhais ǂāb tsî ǂgoab tsîkha dis ǃnâ.

¹⁷Somxa haidi ge ǁîba ra ǃgū-ai, mâs hoas ǁîs di sommi ǀkha, ǃāb di ǂhûihaidi ge ǁîba ra hâǂgā.

¹⁸Mû, ǁîb ge ǃāb ga ǀgaisa xawe ǃao tama hâ; tsîb ra ǂgomǃgâsen, Jordanǃāb ga ams âb kōse sī xawe.

¹⁹Khoeba mûra âb aiǃâ ǃkhō bi ǁkhāb a, ǁîba ǃhâub ǀkha ǃnamǂgui ǁkhāb a?

²⁰Leviatanna ǂhao-ūda-i ǀkha ǂgaeǂui bits nî, tsî nams âba tsuri-i, aoǂgāts ra-i ǀkha?

²¹Okha ǁîba haiǂguisa ǂguis ǃnâ dīǂgā ǁkhāts a, ǁkhū-i ǀkhats kha ǃnanib âba a doroǃnam ǁkhā?

²²Kaiseb nî ǀkhoma tsi tits ra ǂâi, ǂauseb kha nî ǃhoa-ū tsi?

²³ǃGaeǀhao-eb kha sa ǀkha nî dī? Khobob asets nî ǀamos kōse ūhâ biga?

²⁴ǁÎb ǀkha ǀhuruts nî aniro-i ǀkhas khami? ǁÎbats kha sa ôade nî ǃgaeba?

²⁵ǁAmaxū-aoga ǁîb ǀkha ǂharugu gu nî? ǀGora gu nî ǁîba ǁama-aon ǃnâ?

²⁶Khōb âbats kha ǁhâigôagu ǀkha nî ǀoaǀoa, tsî danas âba ǁauǃkhō-ūdan ǀkha?

²⁷ǁGui re sa ǃomma ǁîb tawa îts ǂâi ǃkhams xa, ots ǁkhawa dī tide.

²⁸Mû, ǃâubasens âts hoas ra kā; ǁîbats ga mûs ǀguisa hîo, ots ǀnai ra ǁnā.