Read Khoekhoegowab Job 41 Bible Online

Job 41 - Khoekhoegowab bible

Job 41

¹Khoe-i xare-i ge ǁnātikōse ǁkhoaǃnā tama hâ, ǁîba i nî ǂkhaiǂkhaise. Tsî tariba ǁnāb ti ais aiǃâ nî mâisenna?

²Tariba ǁnāb tita ge aimāba, o ta tita ǁîba nî mādawa? ǀHommi hoab ǃnaga hân ge a ti.

³Tita ge uniǁaedi âb xa ǃnō tide, tsî ǃhoas ǀgaib âb dis xa, tsî îsasib īsib âb dib xa.

⁴Tariba ǁnāb ǂamǃâs sarab âb disa nî khowa-aiba? Tariba ǁîb di ǀgamǃnaguse dīsa sarab ǃnâ nî ǂgâ ǁkhāba?

⁵Tariba ǁnāb dao-amdi ǁîb ais dide nî ǁkhowa-amma? ǁÎb di ǁgûgu ǂnamipeb ge ǃhurib ǀguiba hâ.

⁶ǀGaisa khōsikhōgu âb ge kaise a ǃgâi, mâb hoab âgu ge ǂganamǀgaiǀgaihe hâ saoǂnûis khami ī.

⁷ǀGuib ge nauba a ǀgū, ǂoab ge ǁîgu ǁaegu ǃgomǃganu ǁoas kōse.

⁸ǁÎgu ge ra ǂae-aigu, ǁîgu ge ra ǃkhōǁaegu, ǀgora ǁoa gu as kōse.

⁹Tsîdi âb ge ǃnâ-e ra ǃnâ kai; tsî mûra âb ge ǁgoaǂnobos di mûra khami ī.

¹⁰Ams âba xu di ge ǃamamǀaede ra ǀkhī, ǀaexa nanigu ge ra ǂoaxa.

¹¹ǂGui-āra âba xub ra ǀanna ǀkhī, ǀgû ra sūsa xus khami, tsî ǃhae ǀaesa xus khami.

¹²ǀOmmi âb ra ǂnomde ǂhubi kai, tsî ǁhabu-i ge ams âba xu ra ǀkhī.

¹³ǃAob âb ǃnâb ge ǀgaiba ǁan hâ, tsî ǁîb aiǃâb ra ǃaoba ǂnā.

¹⁴ǃÂdi ǁîb ǁgans didi ge ǂaeǁae hâ; mâs hoas ge ǁîb ǃnâ a ǁaposa, gon tamase.

¹⁵ǂGaob âb ge a ǁaposa ǀui-i xase; ā, ǁîb ge ǃnaga ǁgoe ǁkhamiǀuis di ǃâ-i xase a ǁaposa.

¹⁶Khâis âb xa gu ge ǁē-aoga ra ǀkhū, tsî ǃhurib xa gu ge ra ǀūa-ai.

¹⁷Khoe-i ga gôab ǀkha hō bi xaweb ge mâ tide, ǁhâigôab kas, ǁkhâuxū-i kas, summi kas hoasa.

¹⁸ǂNūǀurib ge ǃhoroǃnôan ase ība bi, tsî ǂaiba gunu hâ hai-i ase.

¹⁹ǂĀb ge ǁîba ǁhâ kai tide; ǀuiǁhās di ǀuirodi ge ǁîba ǃhoroǃgaodan axase ra ība.

²⁰ǃHôadi ge ǁîba ǃhoroǃgaodan ase ība, tsîb ra ǁhâigôab di ǀōba âiǂui.

²¹ǁÎb ǃnâ di ge ǀā sūǃârode hâ; dāǃnâkunis ra dī xaseb ra ǂgoab ǃnâ ǁgoeǂgâ.

²²ǃGammab ra sū-i khami ǀgû kai, ǁîb ra huriba soǀôasūs khami ǂkhoba kai.

²³ǁÎb khaoǃgâb ra daoba ǃnâǃnâ, ǃgammats nî ǀhai ǀûn ti ǂâis kōse.

²⁴ǃHūbaib ai i ge ǁîb ǁhā-e a ǀkhai, ǁîb ǃao tama kurusabeb, kuruhe hâba.

²⁵ǁÎb ra ǀgapi xū-i hoa-e kōǀî; ǁîb ge a gao-ao ǃguriǂgaoxa ǀgurun hoan ǂama.