Read Khoekhoegowab Job 42 Bible Online

Job 42 - Khoekhoegowab bible

Job 42

¹ǃNubaib ge Joba ǃKhūba ǃeream tsî ge mî:

²Tita ge a ǂan sats hoa xūna a ǁkhā ǃkhaisa; tsîts a ǁkhaehe ǁoa ǃkhaisa.

³Ā, tariba ǁnāb ǀapesa ǁnâuǃāb ose ra gaugauba? O ta tita xūn ǁnâuǃā tama ta hâna ge ǃhoa, xūn buruxaba ten, hîa ta ǀūna.

⁴ǁNâu re, î ta ǃhoa; dî tsi ta nî îts ǁnâi mîǃāba te.

⁵ǁNâus ǂgaes dis ǀkha ta ge sats xa ge ǁnâu, xawe nēsis ra ti mûsa satsa mû.

⁶ǁNā-amaga ta ge ra ǀhapimāsen, tsî ta ge ǃhausen hâ tsarab tsî tsaob tsîkha ǃnâ.

⁷Tsî i ge ge ī, ǃKhūb ge ǁnā mîde Job ǁga ǃhoatoa ǃnubaib ge ǃKhūba Elifab Temanǁîb ǃoa ge mî: Ti ǁaib ge ǂhubi hâ saǀî tsî sa ǀgam horesakhalî, sago ge tita xa ǂhanuse ǃhoa tama hâ xui-ao, ti ǃgāb Job khami.

⁸Î go ǁnâi hû ǁgōgu tsî hû bairagu tsîna ū, î go ǃgû ti ǃgāb Job ǁga, î go khauǁguibade ǁguibasen, îb ti ǃgāb Joba sago ǀgoreba, amase ta ge tita ǁîb di aisa nî ǃkhōǃoa xuige, sago ta tita gâresib âgo ǃoa dī-ū tidega, sago ge tita xa ǂhanuse ǃhoa tama hâ xui-ao, ti ǃgāb Job khami.

⁹ǁGoasi gu ge Elifab Temanǁîb tsî Bildab Suhiǁîb tsî Sofari Naamaǁîb tsîga ǃgû tsî ǃKhūb ge ǁîgu ǃoa ǃhoase ge dī; ob ge ǃKhūba Job di aisa ge ǃkhōǃoa.

¹⁰Tsî ǃKhūb ge Job di mâsiba ge dī unu, ǁîb di horesagab ge ǀgoreba ǃnubai, tsî ǃKhūb ge Job ge ūhâ i xūna ǃhonarisase ge ǂguiǂgui.

¹¹ǁKhāti gu ge ǃgâsagu hoagu âba ǁîb ǁga ge hā tsî ǃgâsadi hoadi âba, tsî ǀnai ge ǂan bi in hoan tsîna, tsî ǁîb ǀkha ǁîb ommi ǃnâ pere-e gere ǂû tsî ǀkhom bi tsî ge ǁkhaeǂgao bi, ǁnā ǂkhabab ǃKhūb xab ge hāǂam kaiheb hoab ǂama. Tsîn ge mâ-i hoa-i âna mari-e ge mā bi, tsî mâ-i hoa-e ǁkhāti ǃhuniǀuriǀkhunuǂnûida-e.

¹²Tsî ǃKhūb ge Joba ǀunis ai ǂguros ǃgâi-ai ge ǀkhae. Ob ge disihakaǀaǀoadisi gūn tsî ǃnaniǀoadisi ǃnain tsî ǀoadisi ǃnaogu di gomagu tsî ǀoadisi eseln tsîna ge ūhâ i.

¹³Nēn xōǀkhāb ge hû ǀgôagu tsî ǃnona ǀgôadi tsîna ge ūhâ i.

¹⁴Tsîb ge ǀons ǂguros disa Jemima, tsî ǀgamǁîs disa Kesia tsî ǃnonaǁîsa Keren-Happux ti ge ǂgai.

¹⁵Tsî nēti ī îsa taradi Job di ôadi khami īdi ge ǃhūb hoaragab ǃnâ hōhe tama ge hâ i; tsî ǁgûb ge ǁîde ǃgâsagu âdi ǃnâ ǀumi-amǃnâ-e ge mā.

¹⁶Tsî Job ge nēn khaoǃgâ ǀguikaidisi tsî hakadisi kuriga ge ûi, ob ge ǁîb ôan tsî ǀgôan âb di ôana ge mû, haka ǃhaoǃnādi kōse.

¹⁷Tsî Job ge ge ǁō, kaise kaira hâ aob, ǀoasa tsēdi â-ib ase.