Read Khoekhoegowab Job 5 Bible Online

Job 5 - Khoekhoegowab bible

Job 5

¹ǂGai ǁnâi re, khoe-i ǃeream tsi ra-e hâ-e? Tsî mâb ǃanun dibǀîts nî ǂnan?

²Gâre khoe-i ge ǁaib â-i xa ra ǃgamhe, tsî surixasib ra gâre-e ǃgam.

³Tita ǂûta ge gâre khoeb hîa ra ǃnomaǃkhōba ge mû, o ta ge ǁnātimîsi ǁanǃkhais âba ge ǀâxarexū.

⁴ǃNūse gu ge ǀgôagu âba ǃgâiǃōba xu ge hâ i, tsî gu ge ǁāb ǃnâ ge ǂkhūǂkhūhe, tsî hui-ao-i ge ǀkhai ge i.

⁵ǁÎb ǃgaosan ge ǃâ hâna ge hapu tsîn ge ǁîb xūna ǁkhāti ǁkhūna xu ge ūǂui, tsî ǁgâsan ge ǃkhūsib âba ǃoa ra ǀomǁkhui.

⁶Tsaraba xub ge tsâba ǀkhī tama hâ xui-ao, tsî ǃgommi ge ǃhūba xu ǂoaxa tama hâ.

⁷Xawe sats khoets ge ǃgomma ra ǃnaeba, ǀaexa ǂnomdi di nanidi ra ǀgapiseb ǁga ǃae khami.

⁸Xawe tita kao, o ta ga Eloba ôa tsî Elob ai nē ǃkhaisa dî;

⁹ǁîb hîa kain, sats khoets ôaǃnâǃganu ǁoana ra dība, buruxa dīn, sats khoets ǃgôa ǁoana.

¹⁰ǁÎb hîa ǃhūbaib ai ǀapiba ra māb, ǁgamga ǃhanagu ai ra sîba,

¹¹ǃgamǃgamsen hânab nî ǀgapib ai ǂnûiga, ǃoa hânab nî ǃgâiǃgâb ǀkha ǀgapiǀgapise.

¹²ǁÎb ra ǁauǁau ǂâidi gāxaǃnân dide, ǃomgu ân xū-e a dī ǁoas kōse.

¹³ǁÎb ra gā-aina ǃkhō gāxaǃnâsib ân ǃnâ, gamaǃgân di ǀape-ais ra ǁnās kōse.

¹⁴Tsēan ra ǃkhaenaba ǃoa; tsî tsēǃgâǁaeb ain ra tsuxubas ase ǀnarema.

¹⁵Xawe ǁîb ra ǂhâsabe-e gôaba xu ore, ams âna xu tsî ǀgaisab di ǃomǁaeba xu.

¹⁶Nēti i ge ǃâubasen-e ǀgâsa-e hâba, tsî ǂkhabasib ra ams âba ǂganam.

¹⁷Mû, ǃgâiǃgâ khoeb ge ǁnāb Elob xa ra ǁkharaheba; ǁnā-amaga tā aoxū ǁkharab Hoaǀgaixab diba.

¹⁸ǁÎb ra tsûtsû tsî ra ǃgae-ai; ǁîb ra ǀhapiǂnûiǃganu xawe ǃomkha âb ra ǂuruǂuru.

¹⁹ǃNani ǂōǂōsigu ǃnâb ge satsa nîra ore; tsî hûǁîb ǃnâts ge satsa tsū-i xa tsâǀkhāhe tide.

²⁰ǃÂtsūǀkhāb ǃnâb ge ǁîba satsa nîra ore ǁōba xu, tsî torob ǃnâ gôab di ǀgaiba xu.

²¹Nams di ǂnausa xuts ge nîra gaugauhe, tsîts ge hîǀhurusa hās ka xawe ǃao tide.

²²Hîǀhurus tsî ǃâtsūǀkhāb tsîra ǃoaguts ge nî âi tsî ǀgurun ǃhūb dinats ge ǃao tide.

²³ǀUidi ǃaub didi ǀkhats ge satsa sa ǃgaeǀhaosa nîra ūhâ xui-ao, tsî ǀgurun ǃaub din ge sa ǀkha nî ǂkhî.

²⁴Tsîts ge nîra hōǃâ, sa tentoms a ǂkhî ǃkhaisa; tsîts ge sa ǁanǃkhaisa nîra ǂhansenba tsî xū-e tôasi tide.

²⁵ǁKhātits ge nîra hōǃâ, sa surib nîra ǂgui ǃkhaisa, tsî ǀgôan âtsa ǃhūb di ǁhaon khami.

²⁶Sats ge kairasib ǃnâ ǀhobas ǃnâ nîra sī, ǃhoroǃgaeǀkhādadi ǁaeb ai ra ūǂgāhes ǁkhās xase.

²⁷Mû, nēsa ge ge sige ge ôaǃnâǃganu, ǁnāti i kom īo, ǁnâu ǁnâi ǁîsa îts ǁîsa ūbasen.