Read Khoekhoegowab Job 7 Bible Online

Job 7 - Khoekhoegowab bible

Job 7

¹Nē xūb khoeba, ǃhūbaib ai ǂnoagu-e ūhâ tamab hâ? Tsî tsēdi âba, ǃgaesab di tsēdi xase ī tama di hâ?

²ǃGāb hîa somma ra ǁkhoreb khami, tsî ǃgaesab hîa amǃnâs âba ra ǃâubasenni khami;

³ǁnās ǁkhās xase ta ge tita ǁkhâgu ǁausib diga ge ǀumi, tsî tsuxugu ǀhupub diga ta ge tita ǂhomibahe hâ.

⁴ǁOmǃgû ta ra, o ta ge: Mâ ǁae ta nî khâi, tsî mâ ǁaeb nî ǁîba tsuxuba ǃkharu kai? ti ra mî. Xaweb ge tsuxuba a gaxu tsî ta ge sâoǃnâse ǁgoes xa ra tsau ǁgoaǂnobos kōse.

⁵Ti ǁgans ge ǂunin tsî ǃhūbaib di tsarab tsîn ǀkha ǂgaeǂgāhe hâ, ti khōb ge ǂapa hâ tsîb ge a ǃharaxūsa.

⁶Ti tsēdi ge ǀhôa-aob di sîsenūxūs ǃgâ-ai a ǃhae, tsî di ge ǃâubasen-i ose ra kā.

⁷ǂÂi re ti tsēdi ǂoab ase ī ǃkhaisa, ti mûs ge ǁkhawa oahā tide, ǃgâibas nî mûga.

⁸ǁNā mûs nēsi ra mû teb dis ge ǁkhawa mû te tide; sa mûra ge ti ai nîra hâ, xawe tita ge nîra ǀkhai.

⁹ǃÂu-i toa tsî ra bē khami, ǁnās ǁkhās xase i ge ǁnā-i ǀhobas ǃnâ ra ǁgôa-e ǁkhawa ǂoaxa tide.

¹⁰ǁÎ-i ge ǁkhawa oms â-i ǃoa oa tide; tsî ǃkhais â-i ge ǁî-e ǃaruǀî ǂan tide.

¹¹O ta ge ǁkhāti ti amsa ǃnō kai tide; o ta ge ǂōǂōsib ti gagas dib ǃnâ nî ǃhoa, o ta ge ausib ti ǀoms dib ǃnâ nî ǃgae.

¹²Hurita kha tita, hurib xamarita, ots ra ǃûi-aoga ǂnûiǂnamipe te?

¹³Ti kharob ge nî ǁkhaeǂgao te, ti ǁgoe-aiǃkhais ge ti ǃgae-aisa nî ūbē, ti ta ga mî,

¹⁴xawets ra ǃhuriǃhuri te ǁhapodi ǀkha, tsî aidi ǀkhats ra ǃhuri kai te,

¹⁵ti ǀoms ra xandomhesa ǁhûiǂuibasens kōse, ǁōba ti ǂkhōgu ǃgâ-ai.

¹⁶Tita ge ǁîde ra ǃharaxū, tita ge ǀamose ûi ǂgao tama hâ. ǀÛǀkhā te re, ti tsēdi a ǁau xuige.

¹⁷Tareba khoeba, ots ra ǁîba ǀgapiǃgôa, ots ra ǂâis âtsa ǁîb ai ǂnûi,

¹⁸ots ra ǁîba mâ ǁgoas hoasa sari, ots ra ǁîba mâ mûsǀapirob hoaba ǃâitsâ?

¹⁹Matikōsets kha ǁnâi tita xu kōbē tama hâ, tsî ǁnāxū te tama hâ, ti ǂāba ta ra haras kōse?

²⁰ǁOre ta ga hâo, tare-e ta kha ǁnâi sa ǃoagu ra dī, khoen ǃÛi-aotse? Tare-i ǃaromats ge tita mâǃoaxūse ǂnûibasen, o ta ǃgommi ase ība tsi hâ?

²¹Tsî tare-i ǃaromats kha ǁnâi ti ǃûǂamsa ǀûba te tama hâ, tsî ti ǂhanuoǃnâsiba dībē tama hâ? Nēsi ta ge tsarab ǃnâ nîra ǁgoe; tsî titats ga ǃnauǁgoaga ôa xawe ta ge nîra ǀkhai.