Read Khoekhoegowab Job 8 Bible Online

Job 8 - Khoekhoegowab bible

Job 8

¹ǃNubaib ge Bildab Suhiǁîba ǃeream tsî ge mî:

²Matikōsets kha ǁnâi nē xūna nî ǃhoa? Tsî matikōse di kha ǁnâi ams âts di mîde ǀgaisa ǂoa-i xase nî ī?

³Eloba kha ǂhanuba nî dawaǃkhuni? Tsî Hoaǀgaixaba kha ǂhanu-aisiba nî dawaǃkhuni?

⁴Sa ôan ge ǁîb ǃoagu ǁoreo, ob ge ǁîba ǁîna ǃûǂams ân di ǃomǁae ge mā.

⁵Elobats ga ôabasen tsî Hoaǀgaixabats ga ǀkhomabaseno,

⁶tsî ǃanu tsîts ga ǂhanu-aio, ob ge ǁîba amase nîra khâiba tsi tsî ǁanǃkhais ǂhanu-aisib âts disa nîra dītoa.

⁷Tsî tsoatsoas âts ga ǂkhari, xawe ǀunis âts ge kaise nîra kai.

⁸Ā, dî aibekam ǃhaosa, îts ǁîn îgu di ôaǃnâs ai ǃgaoǃgâ,

⁹sada ge a ǁaris di, tsî da ge xū-e ǂan tama hâ, sada tsēdi ǃhūbaib ai sommi khami ī xui-ao.

¹⁰ǁNāna ǁkhāǁkhā tsin tide? Mîba tsin tide, tsî ǂgaob âna xu mîde ūǀkhīn tide?

¹¹ǀHaruba ǀomkhâib ra ǂgoa-i a ǀkhaiba? ǂĀba ǀommi ra ǁgam-i ose?

¹²Ganupeb a ǃam hîa; ǃgaoǁnâhe tamab hâ hîab ge ra ǂnâ nau ǀgân hoan aiǃâ.

¹³ǁNās ǁkhās xase gu ge daogu Eloba ra ǀurun hoan diga ī; tsî ǃâubasens hînaxaǃnâb dis ge nîra kā.

¹⁴ǁÎb, ǃâubasens âb ǃgaoǁnâhe hâb tsî ǂgomaiǂnûis âb ǀnûiǃkhammi khami nî īb,

¹⁵oms âb aib ra ǃgâsen xawes ge mâ tide; ǁîs aib nî ǃkhōbasen, xawes ge mâhō tide.

¹⁶Sores tsîn ǃnâb ra îsase ǀomkhâi, tsî ǂgonagu âb ge ǃhanab âba ra īǂam;

¹⁷ǃnomagu âb ge ǃhaob ǃnâ ǂgapugu hâ, ǃhaoxa-am ǃkhaib ǃnâb ge ǁîba hâ.

¹⁸Xawe Elob ga ǁîba ǃkhais âba xu hîkākāo, os ge ǃkhaisa ǁîba ǀūxū tsî nî mî: Mû tsi tama ta ge hâ i, ti.

¹⁹Mû, nēb ge dâb ǁîb di daob diba, tsî tsaraba xu gu ge ǀnîga nî ǀkhī.

²⁰Mû, Elob ge ǂhauǃnâba aoxū tide; ǁîb ge ǂkhabadī-aoga ǁkhāti ǃommi ai ǃkhō tide,

²¹sa amsab âis ǀkha nîra ǀoaǀoas kōse tsî sa amǁgaukha dâb ǀkha.

²²Sa ǁkhansaben ge taob ǀkha nîra anahe, tsî tentoms eloxoresan dis ge nîra ǀkhai.