Read Khoekhoegowab Job 9 Bible Online

Job 9 - Khoekhoegowab bible

Job 9

¹Ob ge Joba ǃeream tsî ge mî:

²Amase ta ge tita a ǂan ǁnāti i ī ǃkhaisa. Tsî matits khoetsa nî ǂhanu-ai Elob tawa?

³ǁÎb ga ǂnoagu-ū bi ǂgao-o, ob ge ǀoadisi xūn xa ǀgui xū-i xare-e ǃeream bi tide.

⁴ǁNāb hîa gā-ai ǂgaob â-ib tsî ǀgaib ǃnâ ǁkhāb, tari-e ǁîbǀî karokarosen tsî ge ûi?

⁵ǁNāb ǃhomga ra ǂnûiǃkhunib, ǁîgu ǁnāsa hōǃâ tamase, ǁaib âb ǃnâ ǁîga ra dawaǃkhapuba.

⁶ǃHūbaiba ǃkhais âba xu ra gon kaiba, ǂkhâǃnâgu âb ra ǀkhūs kōse.

⁷Soresa ra mîmāba, os ge ǁhai tama; tsî ǀgamirode ra ǂganamǀgaiǀgaiba.

⁸ǀHomga ǀguri ra ǃāb tsî ǃgabigu hurib digu ai ra dāba.

⁹Bera ge kurub tsî Orionni tsî ǀKhûsedi tsî ǃnā-omdi ǃkhawagas didi tsîna.

¹⁰Kai xūna ra dība, khoets a ôaǃnâǃganu ǁoan, buruxa dīn, khoets a ǃgôakhâi ǁoana.

¹¹Mû, ǁîb ge tita aiǃâ nî ǃgû, xawe tita ge ǁîba mû tide; ǁîb ge nî ǃgû-ī, xawe tita ge ǁîba hōǃâ tide.

¹²Mû, ǁîb ra khoena ūǀhana, tsî tari-e ǁîba nî mādawa kai? Tari-e ǁîb ǃoa nî mî: Tare-ets ra dī? ti.

¹³Elob ge ǁaib âba ǁkhaedawa tide; ǁîb ǃnaga gu ge Raxas di hui-aoga ra ǃgamǃgamhe.

¹⁴Mati ta kha ǁnâi tita ǁîba nî ǃeream tsî ti mîde ǁîb ǃoagu nî ǁhûiǂui?

¹⁵ǁNāb ǂhanu-ai ta ka xawe ta a ǃeream ǁoaba; ti ǂhanuǂhanu-aoba ta ge nî ǀkhomabasen.

¹⁶ǂGai ta ka tsîb ga ǁîba ǃeream te xawe ta ge ǂgom tide, ti dommab go ǁnâu ǃkhaisa.

¹⁷ǁÎb ra tūǀnanu-i ǀkha hîkākā te, tsî ti ǀhapina ǂgui kai ǃaroma-i ose.

¹⁸ǁÎb ge mā-am te tama hâ, ǀom ta nîsa, tsîb ra ausigu ǀkha ǁâǁâ te.

¹⁹ǀGaib ai i ga hāo, ob ge ǁîba a ǀgaisa! Tsî ǂhanub ai i ga hāo, tari-e nî ǁgari bi?

²⁰ǂHanu-aikaisen ta ka xawes ge ti amsa nîra ǀâxare te; ǂhauǃnâ ta ka xaweb ge ǁîba nîra ǀhapilhapi te.

²¹ǂHauǃnâ ta a xawe ta ge tita xa ǂâi tama hâ; ti ûiba ta ge ra ǃharaxū.

²²ǀGuiti-ī ǃkhai-i ge, ǁnā-amaga ta ge: ǂHauǃnâb tsî eloxoresab tsîkha hoakhab ra hîkākā, ti ra mî.

²³ǂNauhais ga ǃhaese ǃgamo, ob ge ǁîba ôaǃnâs ǀhapiob disa ra ǃhō.

²⁴ǃHūb ge eloxoresan ǃomǁae ra māhe, ǁîb ra ǃgū-ai ais ǂhanuǂhanu-aogu disa, ǁî tamab ka io, o tariba ǁnâi?

²⁵Tsî ti tsēdi ge ǃkhoe-ao-i ǃgâ-ai ǃhae ge i; ǁîdi ge ge ǁhâbē, ǃgâiba di ge mû tama ge i.

²⁶ǁÎdi ge ǃhae doe-omgu ǀkhas khami ge ǃgû-ī, ǃariǃkhās ra ǃkhōs ra xū-i ǃoa ǁkhanasī khami.

²⁷Tsî ǃgaesa ǀuru tsî ta ti īsiba ǀûǀkhā tsî nî khoakhoasen, ti ta ga mî,

²⁸xawe ta ge ti tsûgu hoagu xa ra ǃao, ǂan ta kom ao, sats tita ǀhapiose ūhâ tide ǃkhaisa.

²⁹ǀHapixa ta kom nîo, tare-i ǃaroma ta kha ǁnâi ǁause nî sîsen?

³⁰Tsamaros ǀkha ta ga ǁānai tsî sē-i ǀkha ǁānǃom,

³¹xawets ge satsa tita tsaus ǃnâ nî ǀhari, tsî ti saran ge nîra uixa te.

³²ǁÎb ge ti ǁhāb ǃeream ǁkhā ta nîra tamaba, ǁîkhom ǀhûpe ǀgoraǃgâs ǃnâ nî sīse.

³³ǀNae-aob xareb ge sikhom ǁaegu hâ tama hâ, ǃommi âba sikhom ai nî ǁguiba,

³⁴tita xub nî ǁîb di ǂnauhaiba dībēga, tsî ǃhurib âb tita ǃao kai tidega.

³⁵O ta ge nî ǃhoa ǁkhā ǁîba ta ǃao tamase, ǁnāti ī khoe tama ta tita ǃnâ xui-ao.