Read Khoekhoegowab Psalmdi 10 Bible Online

Psalmdi 10 - Khoekhoegowab bible

Psalmdi 10

¹Okha, ǃKhūtse, tare xū-i ǃaromats ra ǃnūse mâ? Tarexats ra gaugausen ǂōǂōsib di ǁaegu ai?

²Eloxoresab di ǃgurib ǃaromab ge ǀkhomǀkhomsabeba ra ǃao, an ǃkhōhe re ǁnā ǂâibasendi, ǂâiǂuin ge di ǃnâ.

³Eloxoresab ge ra koasen tsî turab ra-i hoa-e ra dī; xūǃgunuxab ge ǃKhūba ǃharaxū tsî ra ǃkhāǃkhā.

⁴Eloxoresab ge ǃgurib âb ǃnâ ra ǂâi: Elob kom ǂâiǃgâ tideo; ǁîb di ǂâidi hoadi ge: Elo-i kom a ǀkhaio, ti ra ǂâi.

⁵ǁÎb ra ǂâibasen xū-i hoa-i ge ra hâhâ; sa ǀgoraǃgâdi ge a ǀgapi, ǃnūse ǁîba xu; ǁîb di mâǃoasaben hoan, ǁîn aib ra ǃgom.

⁶ǁÎb di ǂgaob ǃnâb ra mî: ǁNope ta tide; ǃhaosa xu ǃhaosa ǃoa ta tātsē tsūǃgâ-i xare-i ǃnâ hâ tide.

⁷ǁÎb di ams ge ǀâxareb xa ǀoa hâ, tsî gāxaǃnâsigu xa, tsî ǀgaib xa; ǁîb di nams ǃnaga kha ge tsūdīb tsî ǂhanuoǃnâsib tsîkha hâ.

⁸ǁÎb ge ǃāde ǁnoaga ra ǁguiba; ǂganǃgâsa hâǃkhaidi ǃnâb ge ǀhapioba ra ǃgam, ǁîb di mûdi ge ǀkhomǀkhomsaba ra ǃkhēǃgon.

⁹ǁÎb ge ǂganǃgâsib ǃnâ ra ǃkhēǁgoe, xammi ǀgom hais ǃnâ ra dī khami; ǃkhēb ra, ǀkhomǀkhomsabebab nî ǃkhōse; ǁîb ge ǀkhomǀkhomsabeba ra ǃkhō, ǁîb di ǁnoas ǃnâb ra ǂgaeǂgā bi;

¹⁰ǂkhū tsîb ge ra ǁnāǁgôa; on ge ǀkhomǀkhomsabena ǁîb di ǀgaisa ǃomǁae ra ǁnā.

¹¹ǁÎb di ǂgaob ǃnâb ra mî: Elob ge ra ǀuru; ǁîb ge ais âba ra sâu, ǁîb ge tātsē mû tide.

¹²Khâi, ǃKhū Elotse, ǃommi âtsa ūkhâi, î ǀkhomǀkhomsabena tā ǀuru.

¹³Tarexab ra eloxoresaba Eloba ǃkhāǃkhā? Tare xū-i ǃaromab ra ǁîb di ǂgaob ǃnâ mî: Sats ge ôa tide?

¹⁴Xawets kom ra mûo; sats ge ǀhupub tsî ǃoab tsîkha ra kōǀî sa ǃomǁae kha nî ǁîkha māhekha; tsūǃgâxab ge sa ai ra mûmâinǃgâ, sats ge ǃoaǀgôab di hui-ao ge i.

¹⁵Khôa re eloxoresab tsî ǂkhabadī-aob di ǁôaba, ôaǃnâ re eloxoresasib âba xū-ets hō tides kōse!

¹⁶ǃKhūb ge a gao-ao ǀamosiba xu ǀamosib kōse; ǁaedi ge ge kāǁō ǁîb di ǃhūba xu.

¹⁷ǃKhūtse, sats ge ǀkhomǀkhomsaben di turaba go ǁnâu; sats ge ǁîn di ǂgaoba nî ǀgaiǀgai, sa ǂgaes ge nî ǃgaoǃgâ,

¹⁸ǃoaǀgôab tsî ǁgâiǀāhe rabats nî ǂhanudībase. ǃAruǀîb khoeba ǃhūbaib ai ǁgaridī tidese.