Read Khoekhoegowab Psalmdi 102 Bible Online

Psalmdi 102 - Khoekhoegowab bible

Psalmdi 102

¹ǀGores ǀkhomǀkhomsabeb dis, ǃoab hâ ǃnubai, tsî ǁîb di ǃgaesab ra ǃKhūb di ais aiǃâ ǁhōǂui ǃnubai. ǃKhūtse, ti ǀgoresa ǁnâu re; îs ti ǂgaisa sa tawa sī re.

²Sa aisa tita xu tā gaugau re ǂōǂōsib di tsēs ai. Sa ǂgaesa tiǀî ǂō re; ǂgai ta ka tsēs ai ǃhaese ǁnâu-am te re.

³Ti tsēdi ge ǀanni khami ra kā tsî ti ǂkhōgu ge ǀaes khami ra ǂhubi xuige.

⁴Ti ǂgaob ge ǂnauhe tsî ǂnâ hâ ǀgâb khami, ti pere-e ǂûs xawesa ta go ǀurus kōse.

⁵Ti ǂkhōgu ge ti ǁgans ai ra ǂae, ti ǀhâimâinǀoms di dommi ǃaroma.

⁶Tita ge pelikanni ǃgaroǃhūb dib khami ī, tita ge khôaǂkhūsa ǃkhaidi di ǀhones axase ī.

⁷ǂOmoǃnâ ta a tsî ta ge ǀguri omǂamǃnâ ǂnôa ani-i khami ī.

⁸Ti khākhoen ge hoaraga tsēsa ra ǃhō te; ti ǃoagu ra ǂkhupin, ǁîn ge ti ǀons tawa ra ǀâxare.

⁹Tsaoba ta pere-i khami ra ǂû, tsî ti āxū-e ta ǁgamron ǀkha ra haba xui-ao,

¹⁰sa ǁaib tsî sa kai ǁgôasib ǃaroma; sats ge tita ge ǀgapiǀgapi, tsîts ge ǁkhawa ge aoxū te.

¹¹Ti tsēdi ge kā ra sommi khami ī; tsî ta ge ǀgâb khami ra ǂnâ.

¹²Xawe sats ǃKhūts ge ǀamosib kōse ra hâ; tsî sa ǂâiǂâisens ge ǃhaosa xu ǃhaos kōse ra hâ.

¹³Sats ge khâi tsî Sionsa nî ǀkhom, ǀkhomhes nî ǁaeb go hā xui-ao; mîmâisa kamab go hā amaga.

¹⁴Sa ǃgāgu ge ǃgâiǃgâibasensa ūhā ǁîs di ǀuidi ǃnâ tsî gu ge tsarab âsa ra ǀkhom xui-ao.

¹⁵ǁNāǃnubain ge ǀūbena ǃKhūb di ǀonsa nîra ǃao, tsî gao-aogu ǃhūbaib digu hoaga sa ǂkhaisiba.

¹⁶ǃKhūb nî Sionsa ǂnubikhâi xui-ao, ǂkhaisib âb ǃnâb ge nî ǂhai.

¹⁷Tsî ǀgores ǀkhaiǀkhā hân dis ǃoab nî ǂnan, tsî ǀgores ânab ǃharaxū tide xui-ao.

¹⁸ǁNāǃnubais ge nēsa ǃgoaxa ǃhaosa nîra xoamâibahe, tsî ǁaes hîa nî kuruhes, ǁîs ge ǃKhūba nîra ǃkhōǀkhā.

¹⁹ǁÎb ǃanusib di ǀgapiba xub ra kōǁgôa, ǃKhūb ra ǀhomma xu ǃhūbaib ai kō amaga,

²⁰ǃkhōsan di ǀhâimâinǀomsab nî ǁnâuga, ǁōb di ôanab nî orese;

²¹ǃKhūb ǀonsan nî Sions ǃnâ ǂhôaga tsî koas âba Jerusalems tawa,

²²ǁaedi nîra ǀhaoǀhaohe ǃnubai, tsî gaosigu on, ǃKhūban nî ǃoabase.

²³ǁÎb ge ti ǀgaiba daob ai ge ǂkhabu kai; ti tsēdeb ge ǁîba ge ǃnubuǃnubu.

²⁴O ta ge tita ge mî: Ti Elotse, tā ǁaegub ti tsēdi dib ǃnâ ūbē te re; sa kurigu ge ǃhaosa xu ǃhaos kōse ra hâ.

²⁵Sats ge aibekam ǁaeb ai ǃhūbaiba ge ǃgaoǃgao, tsî ǀhomgu ge a sa ǃomkha di sîsen.

²⁶ǁÎn ge nîra ǃgû-ī, xawe sats ge nîra hâhâ; ǁîn ge hoatsama sara-i khami nîra ǀoro. Sats ge ǁîna ra ǃkhōǃkhuni anaxū-i khami, tsîn ge ra toa.

²⁷Xawe sats ge ǁkhātsa, tsî sa kurigu ge ǀam-e ūhâ tama hâ.

²⁸Sa ǃgāgu di ôan ge sâusase nî ǁan; tsî surib ân ge sa ais aiǃâ nîra ǀgaiǀgaihe.