Read Khoekhoegowab Psalmdi 103 Bible Online

Psalmdi 103 - Khoekhoegowab bible

Psalmdi 103

¹ǁNaetsanas Davib dis. Kare re ǃKhūba, ti ǀomse; în ti ǃnâ hân hoana kare ǁîb di ǃanu ǀonsa.

²Kare re ǃKhūba, ti ǀomse, î ǃgâidīgu âb di ǀguib xaweba tā ǀuru re,

³sa dīsādi hoade ra ǀûba tsib, sa ǀaesengu hoaga ra ǂuruǂurub;

⁴sa ûiba ǁgaoǁgaosiba xu ra oreb, ǀkhomxaǂgaosib tsî ǃgâiǃnâxasigu tsîn ǀkha ra ǀgapa tsib;

⁵satsa ǃgâib ǀkha ra ǁâǁâb, sa ǂkhamsisa ǃariǃkhās dis khami ra ǂkhamǂkhamma.

⁶ǃKhūb ge ǂhanu-aisib tsî ǂhanub tsîkha ra dība, ǁnān ǁgâiǀāhe ran hoana.

⁷ǁÎb ge Moseba daogu âba ge ǂanǂan, Israeli ôana ǁîb di dīga.

⁸ǀKhomxaǂgao tsî ǀkhomxab ge ǃKhūba, ǃnūǃnâxa tsîb a ǃgâiǃnâxa.

⁹ǁÎb ge hugaǀgui ǂnoagu tide, tsî ǀamose ǁaixahâhâ tide;

¹⁰ǁÎb ge sada ǁorena ǃoa sîsenū da tama hâ, tsî sada dīsāde ǃoa dīdawa-am da tama hâ.

¹¹ǀHommi ǃhūbaiba xu a ǃnūs ǁkhās xaseb ǀkhomxaǂgaosib âba a kai ǁnān, ǁîba ra ǃaoǃgân ǂama amaga;

¹²aiǂoas huriǂoasa xu a ǃnūs ǁkhās xaseb ge sada di ǃûǂamde sada xu ra dībē.

¹³ǁGûb ǀgôan âba ra ǀkhoms ǁkhās khamib ge ǃKhūba ra ǀkhom ǁnān, ǁîba ra ǃaoǃgân hoana.

¹⁴ǁÎb a ǂan mâ kuruǃnôada asa, tsarada as xa ǂâi tsî.

¹⁵Tsēdi khoeb didi ge ǀgâb khami ī, ǃaub di ǃkhā-i khamib ra ǃkhā;

¹⁶ǂoab ga ǁîba īǂamo, ob ge a ǀkhai, tsî hâǃkhais âb xawes ge ǂan bi tama hâ.

¹⁷Xawe ǀkhomxaǂgaosib ǃKhūb dib ge ǀamosiba xu ǀamosib kōse ra hâ ǁnān, ǁîba ra ǃaoǃgân ǂama, tsî ǂhanu-aisib âba ǀgôan di ôan kōse,

¹⁸ǁnān, ǃgaeǀhaos âba ra ǃkhōǀgaipen tsî mîmādi âb xa ra ǂâin, ǁîden nî dīsen ǂama.

¹⁹ǃKhūb ge trons âba ǀhommi ǃnâ ǁapoǁapo hâ, tsî gaosib âb ge hoan ǂamai ra gaosîsen.

²⁰ǃKhūba kare re, ǁîb di ǀhomǃgāgo, sa ǀgaisa ǁē-aogo, mîs âba ra dīgo, mîs âb di domma ra ǁnâuǀnamse.

²¹ǃKhūba kare re, ǁîb di ǂnubiso hoaso, sadu ǁîb di ǃgādu, ǃgâiǃgâibasens âba ra dīdo.

²²ǃKhūba kare re, ǁîb di sîsengo hoago, mâ ǃkhaidi ǁîb gaosis didi hoadi tawa! ǃKhūba kare re, ti ǀomse.