Read Khoekhoegowab Psalmdi 104 Bible Online

Psalmdi 104 - Khoekhoegowab bible

Psalmdi 104

¹Koa re ǃKhūba, ti ǀomse! ǃKhū, ti Elotse, sats ge kaise a kai. Sats ge ǂkhaisib tsî ǃanusib tsîkha ana hâtsa.

²ǃNâba ra anats sara-i khami; ǀhomma tentom-i khami ra ǃāǂuitsa.

³ǀGapise hâ ǃkhaidi âtsa ǁgammi ǃnâ ra kuruts, ǃâude kunise ra sîsenūts, ǂoab di ǁgabogu ai ra doematsa;

⁴ǂoaga ra sîsabedīts, ǀaes ǁhabuga sa ǃgāse.

⁵Sats ge ǃhūbaiba sa ǃgaoǃgaodi ai ge ǃgaoǃgao, îb tātsē tā ǁnope.

⁶ǃGamsib ǀkhats ge ǁîba sara-i ǀkhas axase ge ǃgū-ai; ǁgamgu ge ǃhomgu ǂamai ge mâ i.

⁷Sa ǀaus xan ge ge ǁhâ, sa ǃgurub di domma xun ge ǃhaese ge bē;

⁸ǃhomgu ge ge khâi, ǃgoaǃnāgu ge ge ǁgôa, ǁnā ǃkhais sats ge ǁîna ǂhomiba hâ is ǁga.

⁹Sats ge ǁîna ǃnami-am-e ge ǂnûiba, ǁî-en īǂam tide-e; ǁîn ge ǃhūbaiba ǁkhawa ǃgū-ai tide.

¹⁰Sats ge ǁNāts, ǀaude ǃgoaǃnāguǀî ra sîǂuitsa, ǃhomgu ǁaegu di nî dâuse.

¹¹ǁÎdi ge ǀgurun ǃaub din hoana ra āsi; ǃgoren ge ra ākhanu.

¹²ǁÎdi tawan ge ǀhommi di anina ǁan hâ; ǂgonagu ǁaeguba xun ra domgu âna ǀō kai.

¹³Sats ge ǃhomga ra āsi ǀgapise hâ ǁgamǃkhaide xu; sa sîsengu di ǂûba xub ra ǃhūbaiba ǁâ.

¹⁴Sats ge ǀgâba ǀgoana ra ǀkhī kaiba, tsî ǁharena khoen di harebesa ǃoa, ǃhorobab nî ǃhūba xu ūǀkhīga;

¹⁵tsî ǂauxûib, khoeb di ǂgaoba ra ǃgâiaǂgao kaib, ǁnuib, ais âba ra ǂkhai kaib, tsî pereb, khoeb di ǂgaoba ra ǀgaiǀgaiba.

¹⁶Haidi ǃKhūb didi ge ra ǁâ, sederhaidi Libanonni didi, ǁîb ge ǂgāde.

¹⁷ǁNāpan ra anina om; oifari oms ge denehaidi ǃnâ hâ.

¹⁸ǀGapi ǃhomgu ge ǃarina hâba; ǃhaogu ge a ǃâudi di ǁhaiǁhâǃkhai.

¹⁹Sats ge ǁkhâba ge dī, ǁaegab nî ǀgoraga; sores ge ǂgâǁaeb âsa a ǂan.

²⁰Sats ra ǃkhaenasa dī, ob ra tsuxuba hā, ǁîb ǃnân ge ǃaub di ǀgurun hoana ra gon,

²¹ǂkham xamgu amǀnēnǀî ra ǃguise, tsî Elob tawa gu nî ǂûna ôabasense.

²²Sores ra ǁhaio, on ra bē tsî āgu ân ǃnâ ǁgoe.

²³Ob ra khoeba sîsenni âb ǃoa ǂoa tsî ra ǃoaba ǃuis kōse.

²⁴Matikōse gu a kai sa sîsenga, ǃKhūtse! Sats ge ǁîgu hoaga gā-aisib ǀkha ge dī; ǃhūbaib ge sa kurusaben xa ǀoa hâ.

²⁵Nē hâ hurib, kai tsî harab, ǁnāpan ra ǃgôahe ǁoasa ûitsama xūna gon, ǂkharin tsî kain tsîna.

²⁶ǁNāpa gu ge doe-omga garu, tsî Leviatanni, sats ge kuruba, ǁîb ǃnâb nî ǀhuruse.

²⁷ǁÎn hoan ge satsa ǃâu hâ, ǁaeb aits nî ǁîna ǂûmāga.

²⁸ǁÎnats ra māo, on ra ǀhaoǀhao; sa ǃommats ra khowao, on ra ǃgâi xūn ǀkha ǁâǁâhe.

²⁹Sa aisats ra gaugau, on ra ǃhuri; ǀomsats ra ǁîna xu ūbēo, on ra ǁō tsî ǁkhawa ra tsara kai.

³⁰Sa Gagabats ra sîǂuio, on ra kuruhe, ots ra ǃhūbaib di aisa ǀasa kai.

³¹Ab ǂkhaisib ǃKhūb diba ǀamose hâ; ab ǃKhūba ǃgâiaǂgao sîsengu âb ǃnâ.

³²ǁÎb ra ǃhūbaiba ǃgapaǀîo, ob ra ǀkhū; ǃhomgab ra tsâǀkhāo, o gu ra ǀan.

³³Tita ge ǃKhūba nî ǁnaeba ûi ta hâs kōse; tita ge ti Eloba nî psalmǁnaeba, hâ ta as kōse.

³⁴A di ti ǂâide ǁîba ǃgâiba; ǃKhūb ǃnâ ta nîra ǃgâiaǂgao.

³⁵ǁOre-aona an ǃhūbaiba xu hîkākāhe, tsî eloxoresana an ǀkhai. Kare re ǃKhūba, ti ǀomse. Haleluja.