Read Khoekhoegowab Psalmdi 105 Bible Online

Psalmdi 105 - Khoekhoegowab bible

Psalmdi 105

¹Koa re ǃKhūba, ǂgaiǀî re ǀons âba; ǁîb di dīga ǂanǂan re ǁaedi ǃnâ.

²ǁNaeba bi re, psalmǁnaeba bi re; ǃhoa re ǁîb di buruxa dīn hoan xa.

³Koasen re ǃanu ǀons âb ǃnâ; ab ǂgaob ǁnān, ǃKhūba ra ôan diba ǃgâiaǂgao re.

⁴ǃKhūb tsî ǀgaib âb tsîkha ôa re; ôa re ais âba hugaǀgui.

⁵ǂÂi re ǁîb di buruxan hîab ge dīn xa, ǁîb di buruxa saodi xa tsî ǀgoraǃgâdi ǁîb ams didi xa,

⁶sa suridu, Abrahammi, ǁîb ǃgāb dido, Jakob, ǃkhōǂuisabeb âb di ôado.

⁷ǁÎb ge ǃKhūb, sada Eloba; ǀgoraǃgâdi âb ge ǃhūbaib hoab ai hâ.

⁸ǁÎb ge ǃgaeǀhaos âb xa ra ǂâi ǀamosib kōse; ǁnā mîs ǁîb ge ǂnûiǂgās xa, ǀoadisi ǃhaodi kōse,

⁹ǁnā ǃgaeǀhaos Abrahammi ǀkhab ge dīs xa, tsî Isakab ge nūba nūs xa.

¹⁰ǁÎsab ge ǁkhāti Jakoba ǂnûiǂgās ase ge ǂnûiba, Israela ǀamo ǃgaeǀhaos ase,

¹¹mî raǃâ: Tita ge Kanaanǃhūba nîra mā tsi, sadu ǀumis di ǃâs ase.

¹²ǃGôab ân ge ǀoro ge i, ā, ǀoro khoese tsî ǃhaokhoese ǁîb ǃnâ,

¹³tsî ǃhaosa xu ǃhaos ǃoan ge doe ǃnubai, nē gaosisa xu nau ǁaes kōse,

¹⁴ob ge khoe-i xare-e mā-am tama ge hâ i, ǁîna ǁgâiǀāsa; tsîb ge ǁkhāti ǁîn ǃaroma gao-aoga gere ǁkhara, mî raǃâ:

¹⁵Tā tsâǀkhā re ti ǂkhauǀkhāsabena; î ti kēbo-aoga tā tsūdī re, ti.

¹⁶ǁÎb ge ǃâtsūǀkhā-e ǃhūb ǃnâ ge ǂgai, ǁîb ge pereb hoaba ge khôa;

¹⁷xaweb ge khoeba ǁîn aiǃâ ge sî hâ i, Joseb, ǃgāse ge ǁamaxūheba.

¹⁸Khoen ge ǂaira âba haiǃnao-i ǃnâ ge ǂgā, ǀkhāb âba ǀurib ǃnâ,

¹⁹ǁnā ǁaeb, mîs âb ge ama kaib kōses ge ǃKhūb mîsa ǁîba ge ǃâitsâ.

²⁰ǃNubaib ge gao-aoba sî tsî ge xore kai bi, ǁaedi di gao-aob ge ge ǃnoraǃnora bi.

²¹ǁÎb ge ommi âb di ǀhonkhoese ge ǂnûi bi, tsî ǁîb xūn hoan di gaosase,

²²ǁîb di gaosagab nî ǃgaega turab âba ǃoa, tsî kaigu âbab nî gā-aisiba ǁgause.

²³ǁNās khaoǃgâb ge Israela Egipteb ǃnâ ge sī; tsî Jakob ge ǃhaokhoese Xammi di ǃhūb ǃnâ sī ge ǁan.

²⁴Tsîb ge ǁaes âba kaise ge ǂûǂûxa kai, tsîb ge ǁîna mâǃoasaben ân ǃgâ-ai ge ǀgaisa kai.

²⁵ǁÎb ge ǂgaob âna ge ǀkharaǀkhara, ǁaes âban nî ǁkhanse, ǁîb di ǃgāgan gāxaǃnâsise nî sîsenūse.

²⁶ǁÎb ge Moseb, ǃgāb âba ge sî, tsî Aronni, ǃkhōǂuisabeb âb tsîkha.

²⁷ǁÎn ǃnâ kha ge ǁîb saode gere dī tsî buruxa dīna Xammi di ǃhūb ǃnâ.

²⁸ǁÎb ge ǃkhaenasa sî tsî ǁîba ge ǃkhae kai, xawen ge mîs âb ai ǃgâ tama ge hâ i.

²⁹ǁÎb ge ǁgamgu âna ǀaob ǃnâ ge ǀkharaǀkhara tsîn ge ǁîn di ǁauna ge ǁō.

³⁰ǁÎn di ǃhūb ge ǁgūtsiǁgūben xa ge ǀoa, ǁîn gao-aogu di ǃnā-omdi kōse.

³¹ǁÎb ge ǃhoa, on ge habaguhe hâ ǀanina ge hā, ǀûitsibena ǁîn di ǃhūb hoab ǃnâ.

³²ǁÎb ge ǀapib âna ge ǃnare kai, ǀaes ǁhabuga ǁîn di ǃhūb ǃnâ.

³³ǁÎb ge ǂauxûiǂûhaidi ân tsî ǀnomahaidi âna ge ǂnau, tsî ǁîn ǃhūǃâs di haina ge khôaǂkhū.

³⁴ǁÎb ge ǃhoa on ge ǂhomn tsî ǂhomǃâina ge hā, kaise kai ǃgôab ǃnâ,

³⁵ǁîn hîa ǃhūb di ǁhaon hoana hapu tsî ǃhanaǂûna ge haputoana.

³⁶ǁÎb ge ǁkhāti ǃhūb ǃnâ hâ ǂguroǃnaesabegu hoaga ge ǂnau, ǂgurosagu ǁîn ǀgaigu hoagu diga.

³⁷Tsîb ge ǁîna ǀhaiǀurib tsî ǃhuniǀurib ǀkha ge ǂgaeǂguiǂui, tsî ǁîn ǃhaodi ǃnâ i ge khoe-e hâ tama ge hâ i, ǃnôa ra-e.

³⁸Egipteb ge ge ǃgâiaǂgao doeǂoan geo, ǁîn di ǃhurib ge ǁîb ai ǁnā hâ i amaga.

³⁹ǁÎb ge ǃâu-e ǃgū-aixūse ge ǃāǂui, tsî ǀae-e tsuxuba i nî ǃnâǃnâga.

⁴⁰ǁÎn ge ǀgore, ob ge ǃnabarina ge hā kai, tsîb ge ǁîna ǀhommi pereb ǀkha ge ǁâǁâ.

⁴¹ǁÎb ge ǃgareǀuiba ge ǁkhowa-am, ob ge ǁgamma ge dâuǂoa; ǁîb ge ǃgaroǃkhaide ǃāb khami ge dâuǃganu.

⁴²ǁÎb di ǃanu mîs tsî Abrahammi, ǃgāb âb xab ge ǂâi xui-ao.

⁴³ǁNātib ge ǁaes âba ge ǂgaeǂguiǂui ǃgâiaǂgaob ǀkha, ǁîb di ǃkhōǂuisabena dâb ǀkha.

⁴⁴Tsîb ge ǁîna ǁaedi di ǃhūga ge mā, on ge ǁaedi di xūreba ǀumixūse ge ūbasen,

⁴⁵ǁÎb di ǂnûiǂgāden nî ǃkhōǀgaipe tsî ǂhanugu âban nî sâuga. Haleluja!