Read Khoekhoegowab Psalmdi 106 Bible Online

Psalmdi 106 - Khoekhoegowab bible

Psalmdi 106

¹Haleluja, kare re ǃKhūba, ǁîb a ǃgâi xuige; ǀkhomxaǂgaosib âb ǀamose ra hâ xuige.

²Tari-e ǀgaisa dīgu ǃKhūb diga a mîǂui ǁkhā, tari-e kares hoas âba a ǂhôa ǁkhā?

³ǃGâiǃōn ge ǁnān, ǂhanuba ra ǃkhōǀgaipen, mâ ǁaeb hoaba ǂhanu-aisiba ra dīna.

⁴Tita xa ǂâi re, ǃKhūtse, sa ǁaesǀîts ūhâ ǀkhommi ǃoa, sari te re sa ǃgâiǃōb ǀkha,

⁵î ta kōǀî re sa ǃkhōǂuisaben di ǃgâiba, î ta ǃgâiaǂgao re sa ǁaes di dâb ǃnâ; î ta sa ǀumis ǀkha ǀhûpe koasen re.

⁶Sida tsî sida îgu tsîda ge ge ǁore; sida ge ge dīsā, eloxoresase da ge ge dī.

⁷Sida îgu ge Egipteb ǃnâ sa buruxa dīna ǃgaoǃgâ tama ge hâ i; ǁîgu ge ǀkhomxaǂgaosigu âts di ǂguib xa ǂâi tama ge hâ i, tsî gu ge mâǃoaxa ge i ǂĀxahurib tawa.

⁸Xaweb ge ǁîba ǁîga ge ore ǁîb di ǀons ǃaroma, ǁkhāsib âbab nî ǂanǂanga.

⁹Tsîb ge ǂĀxahuriba ge ǀau, ob ge ge ǂnâ; ob ge ǁîna ǁgamga ge ǂgaeǂguiǃgâu ǃgaroǃhūb ǃnâs axase.

¹⁰Tsîb ge ǁîna ǁkhansaben di ǃomǁaeba xu ge ore; tsîb ge ǁîna khākhoen di ǃomǁaeba xu ge ore.

¹¹ǁGoasi gu ge ǁgamga mâǃoasaben âna ge ǃgū-ai; ǁîn di ǀgui-i xare-i ge ǃgau tama ge i.

¹²ǃNubain ge mîdi âba ge ǂgom; tsîn ge ǃkhōǀkhās âba ge ǁnae.

¹³Xawen ge ǃhaese ǁîb di sîsenga ge ǀuru, ǀapes âban ge ǃâu tama ge hâ i.

¹⁴Tsîn ge ǃgaroǃhūb ǃnâ ge turaxa; tsîn ge Eloba ǃgaroǃhūb ǃnâ ge ǃâitsâ.

¹⁵ǃNubaib ge ǁîna turan gena ge mā, xaweb ge ǂhīǁōba ǁîn ǃnâ ge sîǂgā.

¹⁶Tsîn ge Moseba ǁgoeǃkhais ǃnâ ge suri, tsî Aronni, ǃKhūb di ǃanuba.

¹⁷ǃHūb ge ǁkhowa-amsen tsî Datanna ge hara tsî Abirammi ǀkha hâga ge ǃgū-ai.

¹⁸Tsî ǀae-i ge ǁîgu ǃnâ ge khau; ǁhabu-i ge eloxoresana ge ǂhubi.

¹⁹Tsâu-en ge Horeb tawa ge kuru tsîn ge ǂnâhe hâ ī-i aiǃâ ge ǃhonǁgoa.

²⁰Tsîn ge Elob di ǃgôasiba, gomab ǀgâna ra ǃûb di īb ǀkha ge ǃkhōǃkhuni.

²¹ǁÎn ge Elob ǁîn di Ore-aoba ge ǀuru, kai xūna Egipteb ǃnâ gere dība,

²²buruxa dīna Xammi di ǃhūb ǃnâ, ǃaoǃaosa xūna ǂĀxahurib tawa.

²³Ob ge ge mî ǁînab ga hîǀhuru hâsa, Moseb, ǁîb di ǃkhōǂuisabeb ga ǁîb aiǃâ ǁîna mâba tama hâ io, ǁgôasib âbab nî ǁkhaedawaga, îb ǁîna tā hîkākā.

²⁴Tsîn ge ǁkhāti ǁnā îxa ǃhūba ge ǃharaxū; ǁîb di mîsan ge ǂgom tama ge i.

²⁵Tsîn ge tentomdi ân ǃnâ ge ǀara tsî ǃKhūb di domma ǁnâuǀnam tama ge i.

²⁶ǁNā-amagab ge ǃommi âba ǁîn ǃoagu ge ūkhâi, ǃgaroǃhūb ǃnâb nî ǁîna ǂnauǁguise,

²⁷tsî surib ânab nî ǁaedi ǃnâ tsoroǂuise, tsî ǁînab nî ǃhūgu ǃnâ ǀgaruǀgaruse.

²⁸Tsîn ge ǁkhāti Baal-Peori ǀkha ge ǃgaeǀhaosen tsî ǁō hân di ǁguibade gere ǂû;

²⁹tsîn ge ǃKhūba ge ǁaiǁai dīgu ân ǀkha, ob ge tsûtsû-aiba ǁîn ǃnâ ǂkhôaba ge dī.

³⁰ǃNubaib ge Pinehaba khâi tsî ge ǀgoraǃgâ, ob ge tsûtsû-aiba ge toa.

³¹Tsîb ge nēsa ǂhanu-aisise ge ǃgôabahe, ǃhaosa xu ǃhaos ǃoa ǀamos kōse.

³²Tsîn ge Eloba ǁkhāti kaise ge ǁaixa kai Meribas ǁgamgu tawa, ob ge Moseba ǁîn ǃaroma tsūse ge ībahe;

³³ǁîb di gagasan ge mâǃoa xui-ao, ob ge ǂâi tamase amǁgaukha âb ǀkha ge ǃhoa.

³⁴ǁÎn ge ǁnā ǁaede hîkākā tama ge i, ǃKhūb ge ǁîna mîmā hâ i, dīn nîse khami,

³⁵tsîn ge ǀūben ǀkha habagu tsî ǁîn di sîsenga ge ǁkhāǁkhāsen.

³⁶Tsîn ge ǁgôatsuiǁgoagu âna ge ǃoaba, o gu ge ǁîna ge ǁnoa kaiba.

³⁷Tsîn ge ǁnās ǂamai ǁîn di ôagu tsî ǁîn di ôadi tsîna ǁgâuaga ge ǁguiba.

³⁸Tsîn ge ǀhapio ǀaoba ge ǂnâxū, ǀaob ǁîn ôagu dib tsî ǁîn ôadi dib, Kanaanni di ǁgôa-elogan ge ǁguibaba, ǃhūb ge ǀaoǀhapis ǀkha ǀuriǀurihes kōse.

³⁹Tsîn ge ǁîn sîsengu ǀkha ge ǃanuoǃnâ kaisen tsîn ge dīgu an ǀkha ge ǀai.

⁴⁰ǁGoasib ge ǃKhūb di ǁaiba ge khau ǁaes âbǀî, tsîb ge ǀumis âba ge ǃharaxū.

⁴¹Tsîb ge ǁîna ǀūben ǃomǁae ge mā tsîn ge ǁkhansaben âna ǁîna ge gaoǂam.

⁴²Tsî khākhoen ân ge ǁîna ge ǁgâiǀā, tsîn ge ǃommi ân ǃnaga ge ǃgamǃgamhe hâ i.

⁴³ǁÎb ge ǁîna ǃnuri ǃnāde ge huiǂui, xawen ge ǀape-ais ân ǃnâ mâǃoaxa ge i, tsîn ge dīsās ân xa ge ǃgamǃgamhe.

⁴⁴Xaweb ge ǁîba ǂōǂōsib âna ge kōǀî, ǁîn di ǃgaesab ge ǁnâuo;

⁴⁵tsîb ge ǁîn ǃaroma ǃgaeǀhaos âb xa ge ǂâi, tsîb ge ge ǃhausen ǁîb ǀkhomxaǂgaosigu di ǂguib ǃoa.

⁴⁶ǁNāxab ge ǁîna ǀkhomxaǂgaosiba ge hō kai, ǁîna ge ǃkhōsis ǃnâ ūn hoan tawa.

⁴⁷Ore da re, ǃKhū sida Elotse, î ǀhaoǀhao da re ǃhaode xu, î da ǃanu ǀons âtsa ǃkhōǀkhā, î da sa koas ǃnâ koasen re.

⁴⁸Ab koahe re ǃKhūb Israeli Eloba, ǀamosiba xu ǀamosib kōse, îs ǁaes hoasa: Amen, Haleluja, ti mî re.