Read Khoekhoegowab Psalmdi 107 Bible Online

Psalmdi 107 - Khoekhoegowab bible

Psalmdi 107

¹Koa re ǃKhūba, ǁîb a ǃgâi xuige; ǀkhomxaǂgaosib âb ǀamosib kōse ra hâ xuige.

²An ǃnorasan ǃKhūb dina ǁnāti mî re, mâǃoasaben di ǃomǁaeba xub ge ǃnoraǃnoran,

³tsî ǃhūga xub ge ǀhaoǀhaona, aiǂoasa xu tsî huriǂoasa xu, ǀapasa xu tsî ǃkhawagasa xu.

⁴ǃGaroǃhūb ǃnân ge ge ǁhapu, ǃū-aisa daob ai, ǁî-i ǃnân nî ǁan ǃā-en ge hō tama ge i.

⁵ǃÂ tsîn ge ǁkhāti ge ǁgâ, ǀoms ân ge ǁîn ǃnâ ǂkhabu ge hâ i.

⁶Xawe ǂōǂōsib ân ǃnân ge ǃKhūb ǃoa ǂgaio, ob ge ǂōǂōsigu âna xu ǁîna ge ore;

⁷tsîb ge ǁîna ǂhanu daob ai ge ǂgaeǂgui, ǁîs ǃnân nî ǁan ǃās tawan nî sīga.

⁸ǁÎna an ǃKhūb ǀkhomxaǂgaosiba ǃkhōǀkhā, tsî buruxa dīn âba khoen ôan aiǃâ.

⁹ǁÎb ge ǁgâ hâ ǀomsa ǂâuǂâu, tsî ǃâ hâ ǀomsa ǃgâi xūn ǀkha ǀoaǀoa xuige.

¹⁰ǃKhaenas tsî ǁōb di sommi ǃnâ ǂnôana, tsūǀkhāb tsî ǀurin ǃnâ ǃgaehe hâǃâ,

¹¹Elob mîmādi ǃoagun ge khâima tsî Hoan xa ǀGapib di ǀape-aisan ge anu tamas hâ khami a ǃharaxū amagab

¹²ge ǁîba ǁîn di ǂgaoba ǃgomsib ǀkha ge ǃgamǃgam; ǁîn ge ge ǃnôa, tsî hui-ao-i xare-i ge hâ tama ge hâ i.

¹³Xawe ǂōǂōsib ân ǃnân ge ǃKhūb ǃoa ǂgaio, ob ge ǁîba ǁîna ǂōǂōsigu âna xu ge ore.

¹⁴ǁÎb ge ǁîna ǃkhaenas tsî ǁōb di somma xu ge ǂgaeǂguiǂui, tsîb ge ǃgae-ūdan âna ge khôaǃgao.

¹⁵An ǁîna ǃKhūb ǀkhomxaǂgaosiba kare, tsî buruxa dīn âba khoen ôan aiǃâ.

¹⁶ǁÎb ge ǂaidao-amde ge khôa tsîb ge ǂnūǀuriǂganamxūde ge ǂnaukhôa.

¹⁷Gâren ge ǃûǂams ân di daob tsî ǂkhabasigu ân ǃaroma ge ǁnorahe.

¹⁸ǂÛn hoan ge ǀoms âna uixaba ge i, tsîn ge ǁōb dao-amdi kōse ge sī.

¹⁹Xawe ǃKhūb ǃoan ge ǂōǂōsib ân ǃnâ ǂgaio, ob ge ǁîna ǂōǂōsigu âna xu ge ore.

²⁰ǁÎb ge mîs âba sîǂui tsî ǁîna ge ǂgauǂgau; tsîb ge āgu âna xu ǁîna ge huiǂui.

²¹An ǁîna ǃKhūb ǀkhomxaǂgaosiba kare, tsî buruxa dīn âba khoen ôan aiǃâ.

²²În ganganǁguibade ǁguiba, în dâb ǀkha sîsengu âba ǃhoa.

²³ǁÎn doe-omgu ǃnâ hurib ai garun, ǁamagusa ra dīǃâ kai ǁgamgu ai,

²⁴ǁîn ge ǃKhūb di sîsenga ge mû, tsî buruxan âba ǃgammi ǃnâ.

²⁵ǁÎb ge ǃhoa ob ge ǀgaisa ǂoaba ge khâi, ǃgabigu âba ǀgapise re ǃgomkhâiba.

²⁶ǃNubain ge ǀhommiǀî ǃapa, ǃgam ǃkhaidi ǃoan ge ge ǁgôa; ǀoms ân ge ge ǀhūǁō.

²⁷ǂNā tsîn ge ǂhapusen, ǀhoro hâ khoe-i khami; tsî gā-aisib ân hoab ge kā.

²⁸Xawe ǃKhūb ǃoan ge ǂōǂōsib ân ǃnâ ǂgaio, ob ge ǁîna ǂōǂōsigu âna xu ge ǂgaeǂguiǂui.

²⁹ǁÎb ge ǀgaisa ǂoaba ge ǃnō kai ǃgabigu âb ge ǃnōs kōse.

³⁰On ge ge ǃgâiaǂgao, ǃnōǃnōbahen geo, tsî turab ân di sâuǃkhais ǃnâb ge ǁîna ge ǂgaeǂguiǂgā.

³¹An ǁîna ǃKhūb ǀkhomxaǂgaosiba kare, tsî buruxa dīn âba khoen ôan aiǃâ.

³²În ǁîba ǀhaohâb ǁaes dib ǃnâ ǀgapiǀgapi, în ǁîba kaigu ǂnûǃkhais ǃnâ ǃkhōǀkhā.

³³ǁÎb ge ǃāga ǃgaroǃkhaise ra dī, tsî ǁgamxa ǃkhaide ǁgâ hâ ǃhūse,

³⁴ǂûǂûsa ǃhūba ǂōǃkhaise, ǂkhabasib ǁîb ǃnâ ǁan hân dib ǃaroma.

³⁵ǁÎb ge ǃgaroǃhūba ǁgamxa ǃkhais ǃnâ ra ǀkharaǀkhara, tsî ǂnâsa ǃhūba ǀaudi ǃnâ;

³⁶tsî ǁîb ge ǃâ hâna ǁnāpa ra ǁan kai, tsîn ge ǁnāpa ǃāsa ǁanǃkhaise ra ǂnubibasen;

³⁷tsîn ge ra ǃhanadī, tsîn ge ǂauxûiǂûǃhanaga ra ǂgā, ǀhaoǀhaohe ra ǂûna ra ūǀkhīga;

³⁸tsî ǁîb ge ǁîna ge ǀkhae, kaisen ge ǂguiǂguisens kōse, tsî ǀgoan ânab ge ǀoro kai tama ge i.

³⁹ǁNās khaoǃgân ge ǁîna ǀoro tsî ge ǁgôa ǁgâiǀāb tsî ǂkhabab tsî ǃoab tsîn xa;

⁴⁰ǁîb ge ǃharaxūba gao-aoǀgôagu ǂama ra ǂnâǂui, tsîb ge ǁîga ǃgaroǃkhai-i, dao-ose ī-i ǃnâ ra ǁhapu kai.

⁴¹Xawe ǂhâb ǃnâ hâ-eb ge ǁgâiǀāba xu ǀgapi ǃkhai-i ǃnâ ra ūǂgâ, tsîb ge ǃhaoǃnādi âna gūn khami ra dī.

⁴²ǂHauǃnân ge ǁîsa mû tsî ra ǃgâiaǂgao, xawe ǂkhabasib hoab ge ams âba ra ǂganam.

⁴³Tari-e a gā-ai? ǁÎ-e a-i nēna kōkō, în ǁnâuǃāxase ǃgaoǃgâ ǃKhūb di ǀkhomxaǂgaosigu ai.