Read Khoekhoegowab Psalmdi 108 Bible Online

Psalmdi 108 - Khoekhoegowab bible

Psalmdi 108

¹Ams, ǁnaetsanas Davib dis. Ti ǂgaob ge ǂhomisen hâ, ti Elotse; ǁnae tsî ta ra psalmǁnae ǂgao.

²ǂKhai re, harps tsî siters tsîro! ǁGoaǃaromasa ta ge nî ǂkhaiǂkhai.

³Koa tsi ta nî ǁaedi ǃnâ, ǃKhūtse, khoen ǃnâ ta nî psalmǁnaeba tsi.

⁴Sa ǀkhomxaǂgaosib ge ǀhommi kōse a kai xui-ao tsî sa amaba ǀgapise hâ ǃâudi kōse.

⁵ǀGapiǀgapisen re, Elotse, ǀhomgu ǂamai, ab sa ǃgôasiba ǃhūbaib hoab ǂamai hâ re.

⁶În sa ǀnamsabena ǃnoraǃnorahe, hui re sa amǀkhāb ǁôab ǀkha, î ǁnâu-am da re.

⁷Elob ge ǃanusib âb ǃnâ ge ǃhoa: A ta dâxase urikhâi re, î ta Sexemsa ǀgora re, î ta Sukots di ǃgoaǃnāba ǀguiro re.

⁸Gileadi ge a ti, Manaseb ge a ti; Efraimmi ge a ti danas di ǀgai, Judab ge ti gaohaiba.

⁹Moab ge a ti ǁāǃnâǃore, Edommi ai ta ti ǁharosa ra ao; Filistiab ǂama ta ra dâ.

¹⁰Tari-e ǁaposa ǃās ǃnâ nî ūǂgā te? Tari-e Edommi ǃnâs kōse nî ǂgaeǂgui te?

¹¹Sa tamatsa kha, Elotse, sida ge ǂhāxu hâ itsa? Sats ge Elotse, sida di toroǂnubidi ǀkha ǃgûǂoa tama hâ.

¹²Huiǂui da re ǂōǂōsiba xu, khoeb di huib a ǁau xuige.

¹³Elob ǃnâ da ge gā-ai dīga nîra dī, ǁîb ge sida mâǃoasabena nîra dāǂkhū.