Read Khoekhoegowab Psalmdi 109 Bible Online

Psalmdi 109 - Khoekhoegowab bible

Psalmdi 109

¹ǁNaetsanas Davib dis, ǂam ǁnae-aobab ge dības. Ti kares di Elotse, tā ǃnō re,

²ams eloxoresab dis tsî ams gāxaǃnâsib dis ge ti ǃoagu khowahe hâ xuige; ǁîn ge tita ǀkha ǂhuminams ǀkha ge ǃhoa.

³Tsîn ge ǁkhanni di mîdi ǀkha ǃnamiǂgā te hâ; ǃaroma-i osen ge ge ǂnoagu-ū te.

⁴Ti ǀnammi ǃaroman ra ti ǃoagu khâima, ǀgore ta ra hoaǁae hîas tsîna.

⁵ǁÎn ge ǂkhababa ǃgâib ama ra mādawa te tsî ǁkhanna ǀnammi âtab ama.

⁶Eloxoresa-e ǁîb ǂama ǂnûi, îb ǀanaǃgâ-aoba amǀkhāb âb ai mâ.

⁷ǀGoraǃgâheb kao, ab ǀhapixase hōhe, îs ǁîb di ǀgoresa ǁore kai.

⁸A di tsēdi âba ǀoro; îb ǀkharaba sîsenaib âba ū.

⁹An ǁîb di ôana ǃguniǀgôa kai, îs taras âba ǃoatara.

¹⁰În ǁîb ôana ǀkhopema; în ǂhân hâna ǀkhaiǃnâ ǃkhaidi tawa ôa.

¹¹Îb surudeǂganaoba ūb hân hoana ūxu bi; în ǃhaokhoena xūreb âba ūǀhana bi.

¹²Îb tā khoe-e ūhâ ǀkhomxaǂgaosiba nî dība bi-e, î-i tā khoe-e hâ, ǃguniǀgôan âba nî ǀkhom-e.

¹³Îb surib âba hîkākāhe; îs ǁîn di ǀonsa sao ra ǃhaos ǃnâ ǀariǂuihe.

¹⁴ǂKhabasib ǁgûgu dib xa ab ǃKhūba ǂâi re; îb ǁgûs di ǁoreba tā ǀariǂuihe.

¹⁵An ǁîna hugaǀgui ǃKhūb aiǃâ hâ, îb ǂâiǂâisens âna ǃhūbaiba xu ǃhomǂui.

¹⁶ǀKhomxaǂgaosibab nî dī ǃkhais xab ge ǂâi tama hâ i amaga, xaweb ge ǀkhomǀkhomsa tsî ǂhâb ǃnâ hâ khoeba ge ǃgôaǃgon, tsî ǂkhabuǂâi hâba, ǃgam bib nîse.

¹⁷ǀÂxarebab ge ǀnam i amaga, ab ǁîb ǂama hā; ǀkhaebab ge tura tama hâ i amaga, ab ǁîba xu ǃnūse hâ.

¹⁸ǀÂxarebab ge sara-i axase ge ana; îb ǁnâi ǃnāb âb ǃnâ ǂgâ ǁgam-i khami, tsî ǁnui-i khami ǂkhōn âb ǃnâ.

¹⁹Ab sarab ǁîb ǀkhab anahe hâb khami ība bi, tsî ǃgaesenni, ǁîb ǀkhab ra hugaǀgui ǃgaesenni khami.

²⁰Nēsa as sîsenamǃnâse ī ti mâǃoasaben disa ǃKhūba xu, ǁnān, ti ǀoms ǃoagu ǂkhabase ra ǃhoana.

²¹Xawe sats ǃKhūtse, ǃKhūtse, ǃgâidī te re, sa ǀons ǃaroma; sa ǀkhomxaǂgaosib a ǃgâi xuige ore te re.

²²ǀKhomǀkhomsa tsî ta ge ǂhâb ǃnâ hâ, tsî ti ǂgaob ge ti ǃnāb ǃnâ ǀhapiǂnûiǃganuhe hâ.

²³Tita ge ra toa, sommi ra toa ǃui ǁaeb ai khami; doeǁgamahe ta ra ǂhommi khami.

²⁴Ti ǁgoara ge ra ǂkhabu ǂûtama hâs xa; tsî ti ǁgans ge go ǂgaba, kau-i xare-i a ǀkhais kōse.

²⁵Xawe ta ge ǁîna ǃhōxūse ība; titan ra mûo, on ra ǃnabendana.

²⁶Hui te re ǃKhū, ti Elotse; ore te re sa ǀkhomxaǂgaosiba ǃoa.

²⁷În ǂan nēb a sa ǃom ǃkhaisa, sats ǃKhūts go ǁîsa dī ǃkhaisa.

²⁸An ǁîna ǀâxare, xawe satsa ǀkhae re; an ǁîna khâima xawe an taotaohe, îb ǃgāb âtsa ǃgâiaǂgao re.

²⁹An ti mâǃoasabena taob ǀkha anahe re, în taosib ân ǃnâ ǂamsara-i ǃnâs axase ǃkhûǃgâsen re.

³⁰Tita ge ǃKhūba ti ams ǀkha kaise nîra kare; tsî ǂguin ǁaegu ta ge nîra koa bi.

³¹ǁÎb ge ǂhâb ǃnâ hâb di amǀkhāb ai ra mâ xui-ao, ore bib nîse ǁnān, ǁōb ǃoa ra ǀgoraǃgâ bina xu.