Read Khoekhoegowab Psalmdi 115 Bible Online

Psalmdi 115 - Khoekhoegowab bible

Psalmdi 115

¹Sida tama, ǃKhūtse, sida tama, xawe sa ǀonsa ǃgôasiba mā re, sa ǀkhomxaǂgaosib ǃaroma, sa amab ǃaroma.

²Tare xū-i ǃaroman kha ǀūbena: Mapab nēsi ǁîn di Eloba hâ? ti nî mî.

³Xawe Elob sida dib ge ǀhommi ǃnâ hâba; ǁîb ge ǂgaob ra-i hoa-e ra dī.

⁴ǁÎn di ǁgôatsuiǁgoagu ge ǀhaiǀuri tsî a ǃhuniǀuri, sîsenni khoen ǃomgu diba.

⁵ǁÎgu ge amsa ūhâ, xawe ǃhoa tama, ǁîgu ge mûde ūhâ, xawe mû tama;

⁶ǁîgu ge ǂgaede ūhâ, xawe ǁnâu tama, ǁîgu ge ǂguide ūhâ, xawe ǃkhapa tama;

⁷ǁîgu ge ǃomga ūhâ, xawe tsâǀkhā tama, ǂaide, xawe ǃgû tama; ǀō-i xare-e gu ge dommi âga xu ǂoa kai tama.

⁸ǁÎga ra kurun ge ǁîgu ǁkhāgu khami ī, ǁnān, ǁîgu ai ra ǂgomaiǂnûin ona.

⁹Israelǁîdo, ǃKhūb ai ǂgomaiǂnûi re; ǁîb ge a ǁîn di hui tsî ǁîn di khōsikhō.

¹⁰Aronni ommi dido, ǃKhūb ai ǂgomaiǂnûi re; ǁîb ge a ǁîn di hui tsî ǁîn di khōsikhō.

¹¹Sadu ǃKhūba ra ǃaoǃgâdo, ǃKhūb ai ǂgomaiǂnûi re; ǁîb ge a ǁîn di hui tsî khōsikhō.

¹²ǃKhūb ge sida xa ge ǂâi, ǁîb ge nîra ǀkhae da; ǁîb ge Israeli omma nîra ǀkhae, ǁîb ge Aronni omma nîra ǀkhae.

¹³ǁÎb ge nîra ǀkhae ǃKhūba ra ǃaoǃgân, ǂkharin tsî kain tsîna.

¹⁴ǃKhūb ge sado nîra ǂguiǂgui, sadu tsî sadu ôan tsîna.

¹⁵A du ǃKhūb xa ǀkhaehe, ǁNāb, ǀhommi tsî ǃhūbaib tsîkha ge kuruba.

¹⁶ǀHommi ge ǃKhūb di ǀhom, xawe ǃhūbaibab ge khoen ôana ge mā.

¹⁷ǁŌ hân ge ǃKhūba kare tide, tsî ǁkhāti ǃnōsasib ǃnâ ge ǁgôan tsîna;

¹⁸xawe sida ge ǃKhūba nîra ǃkhōǀkhā, nēsisa xu ǀamosib kōse. Haleluja.