Read Khoekhoegowab Psalmdi 118 Bible Online

Psalmdi 118 - Khoekhoegowab bible

Psalmdi 118

¹Koa re ǃKhūba ǁîb a ǃgâi xuige; ǀkhomxaǂgaosib âb ge ǀamosib kōse ra hâ.

²Ab Israela ǁnâi mî re: ǀKhomxaǂgaosib âb ge ǀamosib kōse ra hâ.

³Ab Aronni di omma ǁnâi mî re: ǀKhomxaǂgaosib âb ge ǀamosib kōse ra hâ.

⁴An ǃKhūba ra ǃaoǃgâna ǁnâi mî re: ǀKhomxaǂgaosib âb ge ǀamosib kōse ra hâ.

⁵ǂŌǂōsib ǃnâ ta ge ǃKhūba ge ǂgaiǀî, ǃKhūb ge ǁnâu-am, tsî ge ǃnoraǃnora te.

⁶ǃKhūb ge tita hâba tsî ta ge ǃao tide. Tare xū-e i kha khoe-e nî dī te?

⁷ǃKhūb ge tita ǀkha hâ hui teb nîse; ǁnā-amaga ta ge tita ǁkhan hâna ǃharaxūb ǀkha nîra kōǀî.

⁸ǃGâi i ge a ǃKhūb ǃoa ǁhaiǁhâsa, khoe-i ai ǂgomaiǂnûis xa.

⁹ǃGâi i ge a ǃKhūb ǃoa ǁhaiǁhâsa, gaosagu ai ǂgomaiǂnûis xa.

¹⁰ǁAedi hoadi ge tita ge xāǂgā; ǃKhūb di ǀons ǃnâs ge ǁîna ta ge ǁhāǃāsa.

¹¹ǁÎn ge tita ge ǃnamiǂgā, ǁîn ge ge xāǂgā te; ǃKhūb di ǀons ǃnâs ge ǁîna ta ge ǁhāǃāsa.

¹²ǁÎn ge ǃhabugu khami ge xāǂgā te; ǁîn ge ǁkhūǀae-i khami ge ǀarihe; ǃKhūb di ǀons ǃnâs ge ǁîna ta ge ǁhāǃāsa.

¹³Sats ge tita ǀgaisase ge ǂhā, ǁnā ǁga ta ges kōse, xawe ǃKhūb ge tita ge hui.

¹⁴ǃKhūb ge a ti ǀgai tsî ti ǁnaetsana; ǃgâiǃōseb ība te amaga.

¹⁵Tentomdi ǂhanu-ain didi ǃnâ i ge dâb tsî ǃgâiǃōb di ǀō-e hâ; amǀkhāb ǁôab ǃKhūb dib ge ǀgaisa dīga ra dī.

¹⁶Amǀkhāb ǁôab ǃKhūb dib ge ra ǀgapiǀgapi; amǀkhāb ǁôab ǃKhūb dib ge ǀgaisa dīga ra dī!

¹⁷Tita ge ǁō tide, xawe ta ge ûi tsî ǃKhūb di sîsenga nîra aoǁnâ.

¹⁸ǃKhūb ge ǁkhōse ge ǁkhara te, xaweb ge ǁōba māǁnâ te tama ge i.

¹⁹ǁKhowa-amba te re ǂhanu-aisib di dao-amde; î ta ǁîdi ǃnâ ǂgâ tsî ǃKhūba ǃkhōǀkhā re.

²⁰Nēs ge dao-ams ǃKhūb dis, ǁîs ǃnân ǂhanu-aina nî ǂgâsa.

²¹Tita ge satsa ra koa, ǁnâu-am tsîts go huise ība te amaga.

²²ǀUib, ǂnubi-aogu xa aoxūhe hâb, ǁîb ge ge ǁhôaǀui kai;

²³Nēs ge ǃKhūba xu ge hā tsîs ge a buruburuxa sida mûǁae.

²⁴Nēs ge tsēs ǃKhūb xa da dībahe hâsa; a da ǁîs ai dâ re, î da ǃgâiaǂgao re.

²⁵ǃKhūtse, toxoba hui re; ǃKhūtse, toxoba ǃgâiǃgâ-e mā re.

²⁶Ab ǀkhaehesa ǁnāb ǃKhūb di ǀons ǃnâ ǃgoaxaba. Sida ge sado ǃKhūb di omma xu ra ǀkhae.

²⁷ǃKhūb ge a Elo, ǃnâba ra mā daba. ǃGae re ǁâus ǁguibasa tsurigu ǀkha altars di ǁnâgu kōse.

²⁸Sats ge ti Elotsa, ǁnā-amaga ta nî koa tsi; ti Elotse, satsa ta nî ǀgapiǀgapi.

²⁹Koa re ǃKhūba, ǁîb a ǃgâi xuige; ǀkhomxaǂgaosib âb ge ǀamosib kōse ra hâ xuige.