Read Khoekhoegowab Psalmdi 119 Bible Online

Psalmdi 119 - Khoekhoegowab bible

Psalmdi 119

¹ǃGâiǃōn ge hâ ǂhauǃnâse ra tanisenn, ǃKhūb di ǂhanub ǃnâ ra ǃgûna.

²ǃGâiǃōn ge ǁnān, ǀhûguitimîdi âba ra ǃkhōǀgaipen, ǁîba ǂgaob hoab ǀkha ra ôan,

³ǁkhāti ǂkhaba-i xare-e sîsen taman; tsî ǁîb di daogu ǃnâ ra ǃgûna.

⁴ǃKhūtse, sats ge ge mîmā, sa mîmādi ǂgomǂgomsase nî ǃkhōǀgaipehe ǃkhaisa.

⁵Î gu ga ti daoga ǁaposa hâ, sa ǂnûiǂgāde ǃkhōǀgaipes ǃnâ.

⁶ǃNubai ta ge taotaohe tide, sa mîmādi hoade ta ga ǃgaoǃgâo.

⁷Tita ge satsa nî ǃkhōǀkhā ǂgaob di ǂhauǃnâsib ǃnâ, sa ǂhanu-ai ǂhanuga ta ga ǁkhāǁkhāseno.

⁸Tita ge sa ǂnûiǂgāde nî ǃkhōǀgaipe; tā hoaragase ǁnāxū te re.

⁹Tare-i ǀkhab nî ǂkhamkhoeba daob âba ǃanuse ūhâ? Sa mîs ǃoab ga ǁîba taniseno.

¹⁰Tita ge ti ǂgaob hoab ǀkha ra ôa tsi; a ta tā sa mîmāde xu ǁhapubē.

¹¹Tita ge sa mîsa ti ǂgaob ǃnâ sâu hâ, sa ǃoagu ta ǁore tidega.

¹²ǃKhūtse, ǀkhaehe hâts ge satsa; ǁkhāǁkhā te re sa ǂnûiǂgāde.

¹³Tita ge ti amǁgaukha ǀkha sa ams di ǂhanugu hoaga ra ǃhoa.

¹⁴Tita ge sa ǀhûǀguitimîdi di daob ǃnâ a ǃgâiaǂgaoxa, ǃkhūsigu hoagu ǃnâs khami.

¹⁵Tita ge sa mîmādi xa nî ǂâiǂâisen tsî sa daogu ai nî ǃgaoǃgâ.

¹⁶Tita ge sa ǂnûiǂgādi ǃnâ nî ǃgâiǃgâisen; sa mîsa ta ge ǀuru tide.

¹⁷ǃGâidī-ū re sa ǃgāba, î ta ûi re; î ta sa mîsa ǃkhōǀgaipe re.

¹⁸Ti mûra khowaba te re, î ta buruxan sa ǂhanub dina ǃgapaǀî re.

¹⁹Tita ge ǃhaokhoeta ǃhūbaib ai; sa mîmāde tā tita xu sâu re.

²⁰Ti ǀoms ge ǁkhoreb xa ǀoa hâ, sa mîmādi dib xa mâ ǁaeb hoaba.

²¹Sats ge ǀâxaresa ǃguriǂgaoxana ra ǀau, sa mîmāde xu ra ǁhapubēna.

²²Ūbē re, ǃhōb tsî ǃharaxūb tsîkha tita xu, sa ǀhûǀguitimîde ta ge ǃkhōǀgaipe hâ xuige.

²³Gaosagu ǂûgu ga ǂnû tsî ti ǃoagu a ǃhoa, xaweb sa ǃgāba ǂnûiǂgādi âtsa ra ǂâiǃgâ.

²⁴Sa ǀhûǀguitimîdi ge ti ǃgâiǃgâisenai tsî ti ǀapemā-aode.

²⁵Ti ǀoms ge tsarab ai ra ǂae; ûi-ûi te re sa mîsa ǃoa.

²⁶Tita ge satsa ti daoga ge ǃhoaba, ots ge go ǁnâu-am te; ǁkhāǁkhā te re sa ǂnûiǂgāde.

²⁷ǁNâuǃā kai te re sa mîmādi di daoba; î ta sa buruxan xa ǂâiǂâisen re.

²⁸Ti ǀoms ge ǃoab xa ra ǂnâtoa; ǁkhawa ǀgaiǀgai te re sa mîsa ǃoa.

²⁹ǂKhabasib di daoba tita xu ūbē; î ǀkhomxase sa ǂhanuba ǀkhae te re.

³⁰Tita ge daob amab diba ūǂuibasen hâ; sa ǂhanuga ta ge mâi-aiǃâsen hâ.

³¹Tita ge sa ǀhûǀguitimîdi ai ǂae hâ; ǃKhūtse, tā taotao te re.

³²Tita ge daob sa mîmādi dib ai nî ǃgû, ti ǂgaobats ra haraharaba te xui-ao.

³³ǃKhūtse, ǁkhāǁkhā te re sa ǂnûiǂgādi di daoba; o ta ge ǁîba ǀams kōse nîra ǃkhōǀgaipe.

³⁴ǁNâuǃāxa kai te re, o ta ge sa ǂhanuba nîra sâu, ǂgaob hoab ǀkha ta ge ǁîba nîra ǃkhōǀgaipe.

³⁵ǂGaeǂgui te re sa mîmādi di daob ai, ǁî ǃkhais ǃnâ ta turaba ūhâ xuige.

³⁶ǂŌ re ti ǂgaoba sa ǀhûǀguitimîdiǀî, xūǃgunuxasibǀîs ose.

³⁷Ūbē re ti mûra, î ra tā ǁau xūna mû; ûi-ûi te re sa daogu ai.

³⁸Sa mîmâisa ǃgāb âtsa ǁapoǁapoba re, satsa ra ǃaoǃgâna māhe hâsa.

³⁹Ti ǃharaxūba ǁkhaedawaba te re, ǃao ta raba, sa ǂhanugu a ǃgâi xuige.

⁴⁰Mû, tita ge sa mîmāde ǁkhore hâ, ûi-ûi te re sa ǂhanu-aisib ǀkha.

⁴¹Î gu ǀkhomxaǂgaosigu âtsa hāǂam te, ǃKhūtse, sa ǃgâiǃōba, sa mîmâisa ǃoa;

⁴²î ta ǃhō te raba xū-e ǃeream ǁkhā re, sa mîs ai ta ǂgomaiǂnûi hâ xuige.

⁴³Î mîs amab disa tā hoase ti amsa xu ūbē re, sa ǂhanugu ai ta ra ǃâubasen xuige.

⁴⁴O ta ge sa ǂhanuba nîra ǃkhōǀgaipe, ǀamose tsî hugaǀgui.

⁴⁵O ta ge ǃnorasasib ǃnâ nîra ǃgû, sa mîmāde ta ge ôa amaga.

⁴⁶O ta ge ǁkhāti gao-aogu aiǃâ sa ǀhûǀguitimîdi xa nîra ǃhoa, tsî ta ge tao tide,

⁴⁷tita ge ra ǃgâiǃgâisen sa mîmādi ǀnam ta hâdi ǃnâ.

⁴⁸Tsî ta ge ti ǃomkha sa mîmādi ǀnam ta hâdiǀî ra ūkhâi, tsî ta ge sa ǂnûiǂgāde nîra ǂâiǃgâ.

⁴⁹ǂÂi re ǁnā mîs, sa ǃgābats ge mîbas, ǁîs aits ge tita ǂgomaiǂnûi kais xa.

⁵⁰Nēs ge ti ǁkhaeǂgaosa, ti ǀkhomǀkhomsasib ǃnâ, sa mîs go ûi-ûi te ǃkhaisa.

⁵¹ǃGuriǂgaoxan ge kaise ge ǃhō te, xawe ta ge sa ǂhanuba xu ǂgō tama hâ.

⁵²Tita ge sa ǀgoraǃgâdi hugas didi xa ra ǂâi, ǃKhūtse, tsî ta ra ǁkhaeǂgaosen.

⁵³ǁAixasib xa ta ra ǃkhōhe, eloxoresan sa ǂhanuba ra ǁnāxūn ǃaroma.

⁵⁴Sa ǂnûiǂgādi ge ǁnaetsanase ība te, ti ǃgûkhoesis di hâǃkhais ǃnâ.

⁵⁵ǃKhūtse, tsuxuba ta ge sa ǀons xa ra ǂâi, tsî ra ǃkhōǀgaipe sa ǂhanuba.

⁵⁶Nēs ge ū ta hâsa: Sa mîmāde ta ra ǃkhōǀgaipe ǃkhaisa.

⁵⁷ǃKhūb ge a ti ǃâ; o ta ra mî sa mîde ta nî sâu ǃkhaisa.

⁵⁸Tita ge sa aisa ǂgaob hoab ǀkha ra ǀkhoma; ǀkhomxa te re sa mîsa ǃoa.

⁵⁹Tita ge ti daogu xa ge ǂâiǂâisen, tsî ta ge ti ǂaira sa ǀhûǀguitimîdiǀî ge unu.

⁶⁰Tita ge ra ǃnoe tsî ǀhawe tama, sa mîmāde ǃkhōǀgaipesa.

⁶¹Eloxoresa ǁaes ra ǃnamiǂgā te, xawe ta ge sa ǂhanuba ǀuru tama hâ.

⁶²Tsuxuǃgâb ai ta ra khâi, kare tsi ta nîse, sa ǂhanu-ai ǂnûiǂgādi ǃaroma.

⁶³Tita ge satsa ra ǃaoǃgân hoan di horesata, tsî ǁnān, sa mîmāde ra ǃkhōǀgaipen di ta.

⁶⁴ǃKhūtse, ǃhūbaib ge sa ǃgâisib xa ǀoa hâ; ǁkhāǁkhā te re sa ǂnûiǂgāde.

⁶⁵Sats ge ǃgāb âtsa ǃgâise ge dī-ū, ǃKhūtse, sa mîsa ǃoa.

⁶⁶ǁKhāǁkhā te re ǃgâi ǂâis tsî ǂans tsîra, sa mîmādi ǃnâ ta ra ǂgom xuige.

⁶⁷ǃGamǃgamhe tama ta ge hâ i ǁaeb ai ta ge ge ǁhapu, xawe nēsi ta ge sa mîsa ra ǃkhōǀgaipe.

⁶⁸Sats ge a ǃgâi tsîts ra ǃgâidī; ǁkhāǁkhā te re sa ǂnûiǂgāde.

⁶⁹ǃGuriǂgaoxan ge ǂhumiga ti ǃoagu ge ǂâiǂâisen, xawe tita ge sa mîmāde ǂgaob hoab ǀkha ra sâu.

⁷⁰ǁÎn di ǂgaob ge kaub khami a tsū, xawe tita ge sa ǂhanub ǃnâ ra ǃgâiǃgâisen.

⁷¹ǃGâiba te a ǁgâiǀāhe ta ge hâ isa, sa ǂnûiǂgāde ta nî ǁkhāǁkhāsenga.

⁷²ǂHanub sa ams dib ge a ǃgâiba te, ǀoadisi ǃâdi ǃhuniǀurib tsî ǀhaiǀurib didi ǃgâ-ai.

⁷³Sa ǃomkha ge tita ge kuru tsî ǂhomi; ǁnâuǃāxa kai te re, î ta sa mîmāde ǁkhāǁkhāsen.

⁷⁴Satsa ra ǃaoǃgân ge tita mû tsî ra ǃgâiaǂgao, sa mîs ai ta ra ǂgomaiǂnûi amaga.

⁷⁵ǂAn ta a ǃKhūtse, sa ǀgoraǃgâdi a ǂhanu-ai ǃkhaisa, tsî ǂgomǂgomsasib ǃnâts go ǁgâiǀā te ǃkhaisa.

⁷⁶Ab sa ǀkhomxaǂgaosiba tita ǁkhaeǂgao re, sa ǃgābats ge mîmâiba khami.

⁷⁷Î ta sa ǀkhomxasigu xa hāǂamhe, î ta ûi re, sa ǂhanub ge a ti ǃgâiaǂgao xuige.

⁷⁸În eloxoresana taotaohe, ǂhumib ǀons ǃnân ge tita ǂhanu tamase sîsenū amaga; xawe tita ge sa mîmādi xa ra ǂâiǂâisen.

⁷⁹An ti ǃoa oa re satsa ra ǃaoǃgân tsî sa ǀhûǀguitimîde a ǂanna.

⁸⁰Ab ti ǂgaoba ǂhauǃnâse ī re sa ǂnûiǂgādi ǃnâ, taotaohe ta tidega.

⁸¹Ti ǀoms ge kaise ǁgâ hâ sa ǃgâiǃōbǀî, sa mîs ai ta ge ǃâubasen hâ.

⁸²Ti mûra ge ra tsanaǁkhui sa mîmâisa ta ra ǃkhē hîa; o ta ra mî: Mâ ǁaets nî ǁkhaeǂgao te? ti.

⁸³Tita ge khōǁhō-i ǀanni ǃnâ hâ-i khami go ī xui-ao, xawe sa ǂnûiǂgāde ta ge ǀuru tama hâ.

⁸⁴Matikō nî ī tsēde sa ǃgāb dide? Mâ ǁaets ti ǃgôaǃgonaona nî ǀgoraǃgâ?

⁸⁵ǃGuriǂgaoxan ge tita ǃgam āga ge khaoba, ǁîn sa ǂhanub ǃoa ûi tamana.

⁸⁶Sa mîmādi hoadi ge a ama; ǁîn ge ǂhumib ǀons ǃnâ ra ǃgôaǃgon te; hui te re.

⁸⁷ǁÎn ge ge hîkākā te ǁga ǃhūbaib ai, xawe tita ge sa mîmāde ǁnāxū tama hâ.

⁸⁸Ûi-ûi te re sa ǀkhomxaǂgaosiba ǃoa, o ta ge ǃkhō-ams sa ams disa nîra ǃkhōǀgaipe.

⁸⁹ǃKhūtse, sa mîs ge ǀamos kōse ra hâhâ ǀhommi ǃnâ.

⁹⁰Sa ǂgomǂgomsasib ge ǃhaosa xu ǃhaos kōse ra hâ. Sats ge ǃhūbaiba ge mâiǁapo, ob ge ǁaposase mâ.

⁹¹Sa mîmās ain ge nētsēs kōse go mâhâhâ, hoa xūn ge a sa ǃgā xui-ao.

⁹²Sa ǂhanub ga ti ǃgâiǃgâisenxūse ība te tama hâ io, o ta ga ǀnai ǁō hâ ti tsūǀkhāb ǃnâ.

⁹³Tita ge sa mîmāde ǀamosib kōse ǀuru tide, ǁîde xuts ge ûi-ûi te amaga.

⁹⁴Tita ge a sa, hui te re; sa mîmāde ta ge ra ôa xuige.

⁹⁵Eloxoresan ge ǃûiǁgoe te hâ, hîkākā ten nîse; xawe tita ge sa ǃkhō-amdi ai ra ǃgaoǃgâ.

⁹⁶Dīǀoaǀoasasib hoab ǃnâ ta ge ǀam-e ge mû; xawe sa mîmās ge kaise a ǂhaba.

⁹⁷Matikōse ta sa ǂhanuba a ǀnam! Tsēs hoasa ta ǁîb xa ra ǂâiǂâisen.

⁹⁸Sa mîmās ge ti khākhoen ǃgâ-ai ra gā-ai kai te, ǀamoses ti ǃnâ hâ xui-ao.

⁹⁹Tita ge ti ǁkhāǁkhā-aogu hoagu ǂamai a ǁnâuǃāxa, sa ǀhûǀguitimîde ta ti ǂâiǂâisenxūse ūhâ amaga.

¹⁰⁰Tita ge kairan xa a ǁnâuǃāxa, sa mîmāde ta ra sâu amaga.

¹⁰¹Tita ge ti ǂaira ǂkhaba daogu hoaga xu ge ǁkhae, sa mîsa ta nî ǃkhōǀgaipega.

¹⁰²Tita ge sa ǂhanuga xu ǂgō tama hâ, sats ge tita ǁkhāǁkhā xui-ao.

¹⁰³Matikōse di sa mîde ti namǃhanaba a ǂkhonba, ti ams ǃnâ hâ danib ǃgâ-ai.

¹⁰⁴Sa mîmāde xu ta ge ǁnâuǃāba ra hō; ǁnā-amaga ta ge ǂhumidaogu hoaga ǁkhan hâ.

¹⁰⁵Sa mîs ge ti ǂaira ǃamamǀaese ība, tsî ti daob di ǃnâse.

¹⁰⁶Tita ge ge nū tsî ta ge ǁîsa ge ǁapoǁapo, sa ǂhanu-aisib di ǂhanuga ta nî ǃkhōǀgaipe ǃkhaisa.

¹⁰⁷Tita ge kaise ǁgâiǀāhe hâ; ǃKhūtse, ûi-ûi te re sa mîsa ǃoa.

¹⁰⁸Îts ǃgâibahe re, ǃKhūtse, ti ams di māsenxa ǁguibadi xa, î sa ǂhanuga ǁkhāǁkhā te re.

¹⁰⁹Ti ûib ge hugaǀgui ti ǃomǁae hâ, xawe ta ge sa ǂhanuba ǀuru tama hâ.

¹¹⁰Eloxoresan ge tita ǁnoa-e ge ǁguiba, xawe ta ge sa mîmāde xu ǁhapubē tama hâ.

¹¹¹Sa ǀhûǀguitimîde ta ge ti ǀamo ǀumixūse ūhâ; ǁîdi a ti ǂgaob di dâ xui-ao.

¹¹²Tita ge ti ǂgaoba ǂō hâ, sa mîmāde ta ǀamose nî dīse ǀams kōse.

¹¹³Tita ge îganǀgē rana ǁkhan hâ, xawe ta ge sa ǂhanuba a ǀnam.

¹¹⁴Sats ge a ti sâuǃkhai tsî ti khōsikhō; sa mîs ai ta ge ǃâubasen hâ.

¹¹⁵Bēxū te, sa ǂkhabadī-aodo, î ta ti Elob di mîmāde ǃkhōǀgaipe.

¹¹⁶ǂKhâǃnâ te re sa mîmâisa ǃoa, î ta ûi re; î ta tā taotaohe re ti ǃâubasens ǃnâ.

¹¹⁷ǂKhâǃnâ te re, o ta ge nîra orehe; o ta ge hugaǀgui sa ǂnûiǂgādi ǃnâ nîra ǃgâiǃgâisen.

¹¹⁸Sats ge sa mîmāde xu ra ǁhapun hoana ra ǃharaxū, ǀhôagaob ân a ǁau xui-ao.

¹¹⁹Sats ge eloxoresan ǃhūbaib din hoana ra dībē goab khami; ǁnā-amaga ta ge sa ǃkhō-amde a ǀnam.

¹²⁰Ti ǁgans ra ǃhurib xa ǀkhū sa aiǃâ; tsî ta ge sa ǀgoraǃgâdi xa ra ǃao.

¹²¹Tita ge ǂhanub tsî ǂhanu-aisib tsîkha ge sîsen; tā ti ǁgâiǀā-aona māǁnâ te re.

¹²²Sa ǃgāba mâba re, îb ǃgâibahe; în eloxoresana tā ǁgâiǀā te.

¹²³Ti mûra ge ra ǁkhore sa ǃgâiǃōba, tsî mîmâis sa ǂhanu-aisib disa.

¹²⁴Sa ǃgāba dī-ū re sa ǀkhomxaǂgaosib ǃoa, î ǁkhāǁkhā te re sa ǂnûiǂgāde.

¹²⁵Tita ge sa ǃgāta; ǁnâuǃāxa kai te re, o ta ge sa ǀhûǀguitimîde nîra ǂan.

¹²⁶ǁAeb ge ǃKhūba go hāba, sîsenni nîse, sa ǂhanuban go khôa xui-ao.

¹²⁷ǁNā-amaga ta ge sa mîmāde a ǀnam, ǃhuniǀurib ǃgâ-ai, hoan xa ǀui ǃhuniǀurib ǃgâ-ai,

¹²⁸ǁnā-amaga ta ge sa mîmādi hoade hoa xūn ǃnâ ǂhanuse ge ǃgôa, mâ ǂhumi dao-i hoa-e ta ge ǁkhan hâ.

¹²⁹Sa ǀhûǀguitimîdi ge a buruburuxa; ǁnā-amagas ge ti ǀomsa ǁîde ra ǃkhōǀgaipe.

¹³⁰ǁKhowa-amsens sa mîdi dis ge ra ǃnâǃnâ, gârenas ge ra ǁnâuǃāxa kai.

¹³¹Tita ge ti amsa harase go khowa tsî ra ǀhâimâinǀom, sa mîmāde ta ra ǁkhore xui-ao.

¹³²Kōǀî î ǀkhomxa te re, ǁnān, sa ǀonsa ǀnam hânats ra dī khami.

¹³³Ti dāǃharode ǁapoǁapo re sa mîs ǃnâ; î ǂkhaba-i xare-e tā ti ǂama gao kai re.

¹³⁴Ore te re khoen di ǁgâiǀāba xu, o ta ge sa mîmāde nîra ǃkhōǀgaipe.

¹³⁵As sa aisa ǃnâ re sa ǃgāb ǂama, î ǁkhāǁkhā te re sa ǂnûiǂgāde.

¹³⁶ǁGamǃārogu ge ra dâuǁgôa ti mûra xu, khoen sa ǂhanuba ǃkhōǀgaipe tama amaga.

¹³⁷ǃKhūtse, sats ge a ǂhanu-ai, tsî ǀgoraǃgâs âts ge a ǂhanu.

¹³⁸Sats ge sa ǀhûǀguitimîde ǂhanu-aise ge mîmā; kai ǂgomǂgomsasib ǃnâ.

¹³⁹Ti ôasasib ge ra hapu te, ti mâǃoasaben ra sa mîde ǀuru amaga.

¹⁴⁰Sa mîs ge kaise ǀkhaiǀkhaiǃganuhe hâ, tsî sa ǃgāb ge ǁîsa a ǀnam.

¹⁴¹Tita ge ǂkhari tsî a ǃharaxūsa, xawe ta ge sa mîmāde ǀuru tama.

¹⁴²Sa ǂhanu-aisib ge a ǀamo ǂhanu-aisi, tsî sa ǂhanub ge a ama.

¹⁴³ǂŌǂōsib tsî ǃaob tsîkha xa ta ge ge hāǂamhe, xawe sa mîmādi ge ti ǃgâiǃgâisenxūde.

¹⁴⁴ǂHanu-aisib sa ǀhûǀguitimîdi dib ge a ǀamo; ǁnâuǃāxa kai te re î ta ûi ǁkhā.

¹⁴⁵Tita ge ǂgaob hoaba xu go ǂgai; ǁnâu-am te re, ǃKhūtse, o ta ge sa ǂnûiǂgāde nîra ǃkhōǀgaipe.

¹⁴⁶Tita ge: Hui te re, ti go ǂgai, î ta sa ǀhûǀguitimîde ǃkhōǀgaipe.

¹⁴⁷Tita ge ǁgoaǂnobosa aiǃhaeba tsî go ǃau, huib ǃaroma; sa mîs ai ta ge ra ǃâubasen.

¹⁴⁸Ti mûra ge tsuxuǃûide ra ǃhaedā, sa mîs xa ta nî ǂâiǂâisense.

¹⁴⁹ǁNâu re ti domma sa ǀkhomxaǂgaosiba ǃoa; ǃKhūtse, ûi-ûi te re sa ǂhanuba ǃoa.

¹⁵⁰ǂKhaba ǂâiǂâisende ra sauruǃgonn ge tita ra ǀgū, ǁîn ge sa ǂhanuba xu a ǃnū.

¹⁵¹Xawe sats ǃKhūts ge a ǀgū, tsî sa mîmādi hoadi ge a ama.

¹⁵²Hukasa xu ta ge sa ǀhûǀguitimîde xu a ǂan, ǁîdets ge ǀamosib kōse ǁapoǁapo ǃkhaisa.

¹⁵³Kōǀî re ti ǀkhomǀkhomsasiba, î huiǂui te re, sa ǂhanuba ta ǀuru tama xuige.

¹⁵⁴Ti ǂhanuba ǂnoaguba te re î ore te re, ûi-ûi te re sa mîmâisa ǃoa.

¹⁵⁵ǃGâiǃōsib ge eloxoresana xu a ǃnū, sa ǂnûiǂgāden ôa tama hâ xui-ao.

¹⁵⁶ǃKhūtse, sa ǀkhomxaǂgaosigu ge a ǂgui; ûi-ûi te re sa ǂhanugu ǃoa.

¹⁵⁷Ti ǃgôaǃgonaon tsî ti mâǃoasaben ge a ǂgui, xawe tita ge sa ǀhûǀguitimîde xu ǂgō tama hâ.

¹⁵⁸Tita ge ǂgomoǃnâna mû tsî ge ǀara, sa mîmāsan ǃkhōǀgaipe tama ǃkhais xa.

¹⁵⁹Mû re sa mîmāde ta a ǀnamsa; ǃKhūtse, ûi-ûi te re sa ǀkhomxaǂgaosiba ǃoa.

¹⁶⁰ǃKhōǂgās sa mîs dis ge a ama; tsî ǀamose di ge ǂnûiǂgādi sa ǂhanu-aisib didi hoade ra hâ.

¹⁶¹Gaosagu ge ǁause ge ǃgôaǃgon te, xawe ti ǂgaob ge sa mîsa ra ǃao.

¹⁶²Tita ge ra ǃgâiaǂgao sa mîmâis ǂama, khoe-i kai ǁkhâuǁnâsa go hō-i khami.

¹⁶³Tita ge ǂhumiba ǁkhan hâ, tsî ta ge ǁîb xa ra uixa, xawe sa ǂhanuba ta ge a ǀnam.

¹⁶⁴Tita ge satsa tsēa hû ǃnādi kōse ra koa, sa ǂhanu-ai ǂnûiǂgādi ǃaroma.

¹⁶⁵Sa ǂhanuba ǀnam hân ge kai ǂkhîba ūhâna, tsîn ge ǁgonǁgonǂgao-i xare-e ūhâ tama hâ.

¹⁶⁶Tita ge sa ǃgâiǃōba ra ǃâubasen, ǃKhūtse, tsî ta ge sa mîmāde ra dī.

¹⁶⁷Ti ǀoms ge sa ǀhûǀguitimîde ra ǃkhōǀgaipe, tsî ta ge ǁîde kaise a ǀnam.

¹⁶⁸Tita ge sa mîmādi tsî sa ǀhûǀguitimîdi tsîna ra ǃkhōǀgaipe, ti daogu hoagu sa aiǃâ hâ xui-ao.

¹⁶⁹ǃKhūtse, as ti ǂgaisa sa ais ǀgūse sī re; ǁnâuǃāxa kai te re sa mîsa ǃoa.

¹⁷⁰As ti ǀkhomabasensa sa ais aiǃâ sī re; ore te re sa mîmâisa ǃoa.

¹⁷¹Ti amǁgaukha ge sa koasa nîra ǁhōǂui, sa ǂnûiǂgādets ra ǁkhāǁkhā te amaga.

¹⁷²Ti nams ge sa mîs xa nîra ǁnae, sa mîmādi hoadi a ǂhanu-ai amaga.

¹⁷³Ab sa ǃomma huise ība te re, sa mîmāde ta ūǂuibasen hâ xui-ao.

¹⁷⁴ǃKhūtse, sa ǃgâiǃōba ta ge ǁkhore hâ, sa ǂhanub ge ti ǃgâiǃgâisenxūba.

¹⁷⁵As ti ǀomsa ûi re, os ge satsa nîra koa, a gu sa ǂhanuga tita hui re.

¹⁷⁶Tita ge kā hâ gū-i khami ge ǁhapu. Sa ǃgāba ôa re, sa mîmāde ta ǀuru tama xuige.