Read Khoekhoegowab Psalmdi 135 Bible Online

Psalmdi 135 - Khoekhoegowab bible

Psalmdi 135

¹Haleluja! Kare re ǃKhūb di ǀonsa; kare si re sago ǃKhūb di ǃgāgo,

²sago, ǃKhūb ommi ǃnâ mâgo, ai-omgu sida Elob di ommi digu ǃnâ.

³ǃKhōǀkhā re ǃKhūba, ǃKhūb a ǃgâi xuige; psalmǁnaeba re ǀons âba, ǁîs a ǀnamǀnamsa amaga.

⁴ǃKhūb Jakoba ūǂuibasen hâ amaga, Israela ǁîb dise.

⁵Tita ge a ǂan, ǃKhūb a kai ǃkhaisa, tsî sida ǃKhūb, elogu hoagu ǂamai hâsa.

⁶ǃKhūb ge ǂgaob ra xū-i hoa-e ra dī, ǀhommi ǃnâs karao, ǃhūbaib ais karao, hurib ǃnâs karao, ǃgamsigu hoagu ǃnâs karao.

⁷ǁÎb ge ǃnūga ra khâi kai ǃhūbaib di ǀkhâuǀamsa xu; ǁîb ge napaga ra dī ǀapib ǀkha; ǁîb ge ǂoaba sâu-omga xu ra ǀkhī kai.

⁸ǂGuroǃnaesagu Egipteb digab ge ge ǂnau, khoeba xu ǀgoan kōse.

⁹ǁÎb ge saodi tsî buruxa dīn tsîna ge sî, sa ǃnâ, Egipteǃhūtse, Faraob ǃoagu tsî ǁîb di ǃgāgu hoagu ǃoagu;

¹⁰ǂgui ǁaedeb ge ge ǂnau tsîb ge ǀgaisa gao-aoga ge ǃgam,

¹¹Sihonni, Amorǁîn gao-aob tsî Ogi, Basanni gao-aob tsîkha, tsî Kanaanǃhūb gaosidi hoade.

¹²Tsîb ge ǃhūb âna ǀumise ge mā, ǀumise Israels, ǁîb di ǁaesa.

¹³ǃKhūtse, sa ǀons ge ǀamos kōse ra hâ, ǃKhūtse, sa ǂâiǂâisens ge ǃhaosa xu ǃhaos kōse ra hâ.

¹⁴ǃKhūb ge ǁaes âba nîra ǀhapio kai xui-ao, tsîb ge ǃgāgu âba nîra ǀkhom.

¹⁵ǁGôatsuiǁgoagu ǁaedi digu ge ǀhaiǀuri tsî a ǃhuniǀuri, khoen ǃomgu di sîsenna.

¹⁶ǁÎgu ge amsa ūhâ, xawe ǃhoa tama, ǁîgu ge mûde ūhâ, xawe mû tama;

¹⁷ǂgaede gu ūhâ, xawe ǁnâu tama, tsî ǀom-i ge ǁkhāti a ǀkhai ams âgu ǃnâ.

¹⁸An ǁîga ra kuruna ǁîgu khami ī re, ǁîgu ai ra ǂgomaiǂnûi-i hoa-e.

¹⁹Israeli ommi dido, koa re ǃKhūba; Aronni ommi dido, koa re ǃKhūba.

²⁰Levib ommi dido, koa re ǃKhūba; ǃKhūba ra ǃaoǃgâdo, koa re ǃKhūba.

²¹Ab ǃkhōǀkhāhe re ǃKhūba Sionsa xu, ǁÎb, Jerusalems ǃnâ ǁan hâba. Haleluja.