Read Khoekhoegowab Psalmdi 139 Bible Online

Psalmdi 139 - Khoekhoegowab bible

Psalmdi 139

¹ǁNaetsanas Davib dis, ǂam ǁnae-aobab ge dības. ǃKhūtse, sats ge ôaǃnâǃganu tsî a ǂan te.

²Sats ge a ǂan ti ǂnûs tsî ti khâis tsîna; Sats ge ti ǂâide ǃnūseba xu a ǂan.

³Sats ra ôaǃnâ ti ǃgûs tsî ti ǁgoes tsîra; tsîts ge ti daogu hoaga ǃgâise a ǂan.

⁴Mî-i xare-i ganupe ti nams ai hâ tama hîats ge ǃKhūtse, satsa ǀnai hoase a ǂan.

⁵Sats ge ra ǃnamiǂgā te, ǃgâbǀkhāb tsî aisǀkhāb hoab ai; tsîts ge sa ǃomma ti ai ra ǁgui.

⁶Nē ǂans ge kaise a buruxaba te; ǀgapiba te a, ǁîsa ta a sīǃnâ ǁoa.

⁷Mâǀî ta kha nî ǃgû sa Gagaba xu? Tsî mâǀî ta kha nî ǁhâ sa aisa xu?

⁸ǀHommiǀî ta ga ǃapa xawets ge satsa ǁnāpa hâ; ǀamoǀaeb ǃnâ ta ga kharobaseno, mû ots ge ǁnāpa hâ.

⁹ǁGoaǂnobos di ǁgaboga ū tsî ta ga hurib di ǀkhâuǀams tawa sī ǁano,

¹⁰ob ge sa ǃomma ǁkhāti ǁnāpas tsîna nî ǂgaeǂgui te, ob ge sa amǀkhāb ǁôaba nî ǃkhōǀgara te.

¹¹Mî ta kao: As ǃkhaenasa ǃgū-ai te re, îb ǃnâba ti ǂnamipe tsuxu kai,

¹²os ge ǃkhaenas xawesa sa aiǃâ ǃkhae tama hâ; tsî tsuxub ge tsēs khami a ǃnâsa; ǃkhaenas ge ǃnâb khami ī.

¹³Sats ge ti ǃnaira ge kuru; sats ge tita ǁgûs di ǃnāb ǃnâ ge ǂnubi.

¹⁴Tita ge satsa ra koa, ama buruxase ta kuruhe hâ amaga; buruxa gu ge a sa sîsenga. Ti ǀoms ge ǁîsa amase a ǂan.

¹⁵Ti ǂkhōn ge sa aiǃâ ǂganǃgâsa tama ge hâ i, ǂganǃgâsib ǃnâ ta ge dīhe ǃnubai, tsî ǃhūbaib di ǃgamsigu ǃnâ ta ge ǃgaeǁarehe ǃnubai.

¹⁶Sa mûra ge tita kuruhe tama ta hâ hîa ge mû, tsî sa ǂkhanis ǃnâ di ge ǁîdi hoade xoamâihe hâ, ǁnā tsēdi hîa nî hādi di ǀguis xawes ganupe a ǀkhai hîa.

¹⁷Matikōse di a ǃgomǀgausaba te sa ǂâide Elotse! Matikōseb a kai ǁîdi di ǃgôaba!

¹⁸ǃGôatsâ ta ka, xawe di ge ǃhūb xa a ǃnāsa. ǃNoaǂkhai ta ra ǃnubai ta ge ganupe sa ǀkha hâ.

¹⁹Elotse, eloxoresaba ǃgam re, î go ǂgōxū te, ǀaob di khoego;

²⁰ǁîgu sats xa taotaosase ra ǃhoa tsî sa ǃoagu ǁause ra ǀgapiǀgapisenga.

²¹ǁKhan ta kha tide, ǃKhūtse, satsa ǁkhan hâna? Tsî mâǃoa ta kha tide sa ǃoagu ra khâimana?

²²Tita ge ǁîna ǀoasa ǁkhanni ǀkha ra ǁkhan; khākhoese ta ǁîna ūhâ.

²³Ôaǃnâǃganu te re, Elotse, î ti ǂgaoba ǂan re: ǃÂitsâ te re, î ti ǂâide ǂan re.

²⁴Î mû re, ise i tita tawa tsū dao-e hâsa, î ǂgaeǂgui te re ǀamo daob ai.