Read Khoekhoegowab Psalmdi 140 Bible Online

Psalmdi 140 - Khoekhoegowab bible

Psalmdi 140

¹ǁNaetsanas Davib dis, ǂam ǁnae-aobab ge dības. Ore te re, ǃKhūtse, tsūdī-aona xu; sâu te re ǂkhabadī-aona xu,

²ǁîn di ǂgaob ǃnâ ǂkhaban xa ra ǂâin, mâ tsēs hoasa ra ǀhûna, torodī nîse.

³ǁÎn ge nams âna ra ǀāǀā ǀao-i khami; ǃgaeǃgā-i ge amǁgaugu ân ǃnâ hâ. Sela.

⁴Sâu te re ǃKhūtse, eloxoresan di ǃomǁaeba xu; ǃûi te re ǁgaridī-aona xu, ǁîn, ti ǂaira nî ǂhābē ti ǂâibasen hâna xu.

⁵ǃGuriǂgaoxan ge tita ǁnoagu tsî tsurigu ǀkha ra ǃnui; ǃkhō-ūdanan ge khoraǂui hâ, ǁnāǁnāxūnan ge daob ǃnâ ǂnûiba te hâ. Sela.

⁶Tita ge ǃKhūb ǃoa ge mî: Sats ge ti Elotsa. ǁNâu re, ǃKhūtse, ti ǀkhomabasens di domma.

⁷ǃKhūtse, ǃKhūtse, ti ǃgâiǃōb di ǀgaitse, sats ge ti danasa ra ǃgū-ai ǃkhams di tsēs ai.

⁸ǃKhūtse, eloxoresab di domma tā mā-am re; tā aiǃgû kai re ǁîn di ǂkhaba ǂâibasensa, ǁîn nî ǀgapiǀgapisen xuige. Sela.

⁹Tita ra hâǂnamipen di danas xa ta ra mî: Ab tsūǃgâb ǁîn amǁgaugu diba ǁîn ai ǁnā.

¹⁰ǀAexa ǂnomde a di ǁîn ai tsoroǂuihe; ab ǁîba ǁîna ǀaes ǃnâ ǁnā kai, ǃgam āgu ǃnâ, ǁkhawan khâi tidese.

¹¹Ab mîǁgaiǁgai-aoba tā ǃhūbaib ai mâiǁapoǁapohe; ǁgaridīb di khoeba, ab tsūǃgâb xa sauruhe, hoaragaseb nî bēs kōse.

¹²Tita ge a ǂan, ǃKhūb ǀkhomǀkhomsabe-i di ǂhanuǃkhais tsî ǂhâ hâ-i di ǂhanuba nî sîsenǂuisa.

¹³Amase ǂhanu-ain ge sa ǀonsa nîra koa, ǂhauǃnân ge sa ais aiǃâ nîra hâ.