Read Khoekhoegowab Psalmdi 144 Bible Online

Psalmdi 144 - Khoekhoegowab bible

Psalmdi 144

¹ǁNaetsanas Davib dis. Ab karehe re ǃKhūb, ti ǃgareǀuiba, ti ǃomkha ǃkhamsa ra ǁkhāǁkhāb tsî ti ǀkhunuga toroba dīsa;

²ti ǀkhomxaǂgaob tsî ti ǁaposa hâǃkhaib, ti ǀgapi hâǃkhaib tsî ti ore-aose ība teb, ti khōsikhōb, ǁîb ai ta ra ǂgomaiǂnûib, ti ǁaesa ti ǃnaga ra dība teba.

³ǃKhūtse, tareba khoeba, ots ra ǂan bi, tsî khoen ôaba, ots ra ǃgaoǃgâ bi?

⁴Khoeb ge ǁausib khami ī; ǁîb di tsēdi ge ǃgû-ī ra sommi khami ī.

⁵ǃKhūtse, ǂō re sa ǀhomga, î ǁgôaxa; î ǃhomga tsâǀkhā, î gu ǀan re.

⁶Napaga napa kai, î ǁîna ǀgaruǀgaru re, sa ǂāga sîǂui, î ǁîna hîkākā re.

⁷ǀHōǂui re sa ǃomkha ǀgapiseba xu; ore î tsubuǂui te re kai ǁgamga xu, ǃhaokhoen di ǃomǁaeba xu.

⁸ǁÎn di ams ra ǂhumiba ǃhoa, tsî amǀkhāb ǁôab ân ge a gāxaǃnâsib di amǀkhāb ǁôa.

⁹Elotse, tita ge satsa ǀasa ǁnaetsana-e nî ǁnaeba; harps tsî disiǁapaxa ǀkhōxūs ǀkha ta ge satsa nî koaǁnaeba,

¹⁰Sats, gao-aoga ra dan kaits, sa ǃgāb Daviba tsūǃgâxa gôaba xu ge oretsa.

¹¹Ore te î huiǂui te re ǃhaokhoen di ǃomǁaeba xu, ams ân ǂhumiba ra ǃhoan, tsî ǁîn di amǀkhāb ǁôaba gāxaǃnâsib amǀkhāb ǁôab ase ūhâna.

¹²Î gu sida ôaga ǂgāxūse ī hîa ra ǀomkhâiga ǁîgu di ǂkhamsis ǃnâ, î di sida ǀgôade ǁhôaǀuise ī, î-ommi di kuruǀgauba ǃoa ǂnau-unuhe hâde.

¹³Î di sida sâuǃnâ-omde ǀoa hâse saogubes ai māǂui re nē xū-i tsî nau xū-e. Î di sida gūde ǀoadisin kōse ôa, în disiǀoadisin kōse ǂguiǂguisen sida ǁgâumâidi ai.

¹⁴Î gu sida gomaga ǀoasase ǃnaohe, î-i tā ǂkhôa-i karao, doeǂoa-i karao, ǃau-i karao sida di daogu ai hâ.

¹⁵ǃGâiǃōs ge ǁnā ǁaes, ǁnāti ra ībahesa; ǃgâiǃōs ge ǁnā ǁaes, ǃKhūba Elose ūhâsa.