Read Khoekhoegowab Psalmdi 145 Bible Online

Psalmdi 145 - Khoekhoegowab bible

Psalmdi 145

¹Karetsanas Davib dis. Satsa ta nî kaikai, ti Elo, sats gao-aotsa; sa ǀonsa ta nî koa ǀamosiba xu ǀamosib kōse.

²Mâ tsēs hoasa ta ge satsa nî ǃkhōǀkhā, tsî sa ǀonsa nî kare ǀamosiba xu ǀamosib kōse.

³ǃKhūb ge a kai tsî karehesa anu; tsî kaisib âb ge ôaǃnâhe ǁoasase i.

⁴Nē ǃhaos ge nau ǃhaosa sa sîsenga nîra koaba; tsîn ge sa ǁkhāsiga nîra ǂhôa.

⁵ǁÎn ge nî ǃhoaǂui, ǂkhaisib anusib âts di ǃgôasib diba, tsî sa buruxa dīn xa ta nî ǃhoa.

⁶Tsîn ge ǁîna sa ǃaoǃaosa dīgu di ǀgaib xa nîra ǃhoa, tsî sa kaisib xa ta ge tita nîra ǃhoa.

⁷ǁÎn ge ǂâiǂâisens kai ǀkhomxaǂgaosib âts disa ǃnāǂamsase nîra ǁhōǂui, tsîn ge sa ǂhanu-aisiba dâb ǀkha nîra ǂhôa.

⁸ǀKhomxa tsî ǀkhomxaǂgaoxab ge ǃKhūba, ǃnūǃnâxa tsîb ge a kai ǀkhomxaǂgaosib xa.

⁹ǃKhūb ge hoana a ǃgâiba; tsî ǀkhomxaǂgaosigu âb ge ǁîb di sîsengu hoagu ǂama hâ.

¹⁰Sa sîsengu hoagu ge sats ǃKhūtsa nîra ǃkhōǀkhā; tsî sa ǀkhomsaben ge satsa nîra kare.

¹¹ǁÎn ge ǂkhaisib sa gaosib diba nîra ǂhôa, tsî sa ǁkhāsigan ge nîra ǃhoaǂui,

¹²khoen ôanan nî ǂanǂanga ǁîb di ǁkhāsiga, tsî ǃgôasib ǁîb ǂkhaisa gaosib diba.

¹³Sa gaosib ge a ǀamo gaosi, tsî gaosis âts ge ǃhaosa xu ǃhaos kōse ra hâ.

¹⁴ǃKhūb ge ǁnā ran hoana ra ǂkhâǃnâ, tsîb ge ǃgamǃgâ hân hoana ra ūkhâi.

¹⁵Mûdi hoan didi ge sa ai ǃâu hâ, tsî sats ge ǁîna ǁîn di ǂûna ǁaeb ai ra mā.

¹⁶Sats ge ǃommi âtsa ra khowa, tsî ûitsaman hoana ra ǁâǁâ, sa ǃgâiǃgâibasensa ǃoa.

¹⁷ǃKhūb ge a ǂhanu-ai ǁîb di daogu hoagu ǃnâ, tsîb ge a ǀkhomxaǂgaoxa ǁîb di sîsengu hoagu ǃnâ.

¹⁸ǃKhūb ge a ǀgū ǁîba ra ǂgaiǀîn hoana, ǁîba amab ǃnâ ra ǂgaiǀîn hoana.

¹⁹ǁÎb ge ǁîba ra ǃaoǃgân ra tura xūna ra dī, tsîb ge ǂgais âna ǁnâu tsî ǁîna ra ore.

²⁰ǃKhūb ge ǁîba ǀnam hân hoana ra sâu, xaweb ge eloxoresan hoana ra hîkākā.

²¹Ti ams ge kares ǃKhūb disa nî ǃhoaǂui. Tsî ǁgans hoas ge ǁîb di ǃanu ǀonsa nî koa ǀamosib hoab kōse.