Read Khoekhoegowab Psalmdi 147 Bible Online

Psalmdi 147 - Khoekhoegowab bible

Psalmdi 147

¹Koa du re ǃKhūba, sida Eloba psalmǁnaebas a ǃgâi xuige; ǀnamǀnamsab a amagab ge ǃkhōǀkhāhesa a anu.

²ǃKhūb ge Jerusalemsa ra ǂnubi; ǁîb ge Israeli di ǀgaruǀgaruhe hâna ra ǀhaoǀhao.

³ǁÎb ge khôaǂkhūhesa ǂgaogu â-ina ra ǂgauǂgau, tsîb ge ǁîna ǀhapidi âna ra ǃgae-aiba.

⁴ǁÎb ge ǀgamirodi di ǃgôaba a ǂan, ǁîb ge ǁîdi hoade ǀonde ra mā.

⁵Sida ǃKhūb ge a kai, tsî kaib ge ǀgaib âba; ǁnâuǃāb âb a ǀamo.

⁶ǃKhūb ge tsamtsiǃnâna ra ǃkhōmâi, eloxoresanab ge ǃhūb kōse ra ǃgamǃgam.

⁷ǁNaeba re ǃKhūba gangans ǀkha; psalmǁnaeba re sida Eloba harps ai,

⁸ǀhomga ǀnanudi ǀkha ra ǀoa kaib, ǃhūbaiba ǀapiba ra ǁāǁābab, ǀgâba ǃhomgu ai ra ǀkhī kaib;

⁹ǀgoana ra ǂûmāb, ǂkham goran, ǂgai rana.

¹⁰ǁÎb ge hāb di ǀgaib ǃnâ tura-e ūhâ tama hâ, ǁîb ge ǀnūkha khoeb dikha ǃnâ ǃgâiǃgâibasen tama hâ;

¹¹ǃKhūb ge ǃgâiǃgâibasensa ūhâ ǁîba ra ǃaoǃgân, ǁîb di ǀkhomxaǂgaosib ai ra mûmâinǃgân ǃnâ.

¹²Jerusalemse, ǃKhūba kare re; Sionse, sa Eloba koa re.

¹³ǁÎb ge sa dao-amdi di ǂganamxūna ra ǁapoǁapo, ǁîb ge sa ôana sa ǃnâ ra ǀkhae.

¹⁴Sa ǃhūb ǀkhariga ǂkhîba ra kurubab, ǁîb ge satsa ǃhorob di ama-ain ǀkha ra ǁâǁâ.

¹⁵ǁÎb di mîsa ǃhūbaib ai ra sîb, mîs âb ge ama ǃhaese ra ǃgû.

¹⁶ǁÎb ge tsamarosa gūǀûn khami ra mā, tsî ǂaoba tsaob khami ra tsoro.

¹⁷ǁÎb ge ǃnareb âba ǃâdi khami ra aoǁgui. Tari-e ǁîb di ǃkhaib aiǃâ a mâ ǁkhā?

¹⁸ǁÎb ge mîs âba ra sî tsî ǁîde ra tsuni kai; ǁîb ge ǂoab âba ra ǃgom kai, o gu ge ǁgamga ra dâu.

¹⁹ǁÎb ge Jakoba mîdi âba gere ǂanǂan, Israela ǁîb di ǂnûiǂgādi tsî ǂhanugu tsîna.

²⁰ǁNātib ge ǁae-i xare-i tawa dī tama hâ, tsî ǁîb di ǂhanugab ge ǁîna ǁkhāǁkhā tama hâ. Haleluja!