Read Khoekhoegowab Psalmdi 148 Bible Online

Psalmdi 148 - Khoekhoegowab bible

Psalmdi 148

¹Haleluja. Koa du re ǃKhūba ǀhomga xu; koa bi re hoan xa ǀgapi ǃkhaidi ǃnâ.

²ǃKhōǀkhā bi re, ǁîb di ǀhomǃgāgo hoago, koa bi re ǁîb di ǂnubiso hoaso.

³ǃKhōǀkhā bi re, sores tsî ǁkhâb tsîro, koa bi re, saso ǃnâ ra ǀgamiroso hoaso.

⁴ǃKhōǀkhā bi re hoan xa ǀgapi ǀhomgo, tsî sago ǁgamgo, ǀhomgu ǀgapise hâgo.

⁵An ǁîna ǃKhūb di ǀonsa koa re, ǁîb ge mîmā ǃnubain ge ge kuruhe xuige.

⁶Tsîb ge ǁîna ǀamosib kōse ge ǁapoǁapo; ǁîb ge ǁîna dom-e ge mā, ǀgui-i xare-i ân ǃûǂam ǁoaba.

⁷Koa du re ǃKhūba ǃhūbaiba xu, sago ǀhoego tsî sago ǃgamsigo hoago,

⁸saro ǀaes tsî ǃnarets tsîro, tsamaros tsî ǃnūts tsîro, sats ǃgomǂoats, mîmās âba ra sîsenǂuitsa,

⁹sago ǃhomgo tsî ǃnomgo hoago, ǂûhaiso tsî sederhaiso hoaso,

¹⁰sadu ǀgurudu tsî ǀgoadu hoado, sadu ǂhanabedu tsî ǁgaboxadu hoado,

¹¹sago gao-aogo ǃhūbaib digo tsî saso ǁaeso hoaso, sago gaosago tsî sago ǂhanuǂhanu-aogo ǃhūbaib digo,

¹²ǂkhamkhoego tsî ǂkhamkhoeso; sadu kaidu tsî ǂkhamdu tsîdo.

¹³An ǁîna ǃKhūb di ǀonsa koa re, ǁîb di ǀons ǀguis a ǀgapi xuige; ǁîb di ǃanusib ge ǃhūbaib ai tsî ǀhommi ǃnâ hâ xuige.

¹⁴Tsî ǁîb ge ǁnâb ǁîb ǁaes diba ge ǀgapiǀgapi, ǁîb ǀkhomsaben hoan di koasa, Israeli ôan, ǁnā ǁaes, ǁîb ǀgūse hâs disa. Haleluja.