Read Khoekhoegowab Psalmdi 16 Bible Online

Psalmdi 16 - Khoekhoegowab bible

Psalmdi 16

¹ǁNaetsanas Davib dis. Sâu te re, Elotse, sa ai ta ra mûmâinǃgâ xuige.

²Tita ge ǃKhūb ǃoa ge mî: ǃKhūts ge satsa; sa ose ta ǀnî ǃgâiǃōsi-i xare-e ūhâ tama;

³ǁNā ǃanun, ǃhūbaib ai hân, ge ǁnā ǂkhaisan, ǁîn ǃnâb ti turab hoaba hâna.

⁴Tsûn, ǀkhara elo-e hōbasen hân din ge a ǂgui, ǁîn di āǁguibadi ǀaob dide ta ǁguiba tide, tsî ǁîn di ǀonde ta ti amǁgaukha ai ū tide.

⁵ǃKhūb ge a ti ǀumi-amǃnâ tsî ti āǀgabi; sats ge ti ǀumi-amǃnâsa ra sâuba te.

⁶ǀNō-ūhe ra tsurigu ge ǃgâi ǃkhaidi ai ge ǁnāba te; ā, ti ǀumi-amǃnâs a ǃgâiba te.

⁷Tita ge ǃKhūba nî kare, ǁîb ǀapemā te geba; ǁkhāti tsuxub ǃnâ ra ge ti ǃnaira ra ǁgau te.

⁸ǃKhūba ta ge hugaǀgui ti aiǃâ ūhâ, ti amǀkhāb tawab hâ amaga ta ǁnobe tide.

⁹ǁNā-amagab ge ti ǂgaoba ra ǃgâiaǂgao, tsî ti ǀoms ra dâ; ǁkhātis ge ti ǁgansa sâusase nîra ǁan.

¹⁰Sats ge ti ǀomsa ǁō hân di hâǃkhais ǃnâ ǁnāxū tide, sats ge mā-am tide, sa ǃanub nî ǁgaoǁgaosiba mû ǃkhaisa.

¹¹Sats ge ûib di daoba nîra ǂanǂan te; ǀoasasib ǃgâiaǂgaob dib ge sa ais aiǃâ hâ, ǀnamǀnamsasigu ge sa amǀkhābǁôab ǃnâ hâ, ǀamos kōse.