Read Khoekhoegowab Psalmdi 17 Bible Online

Psalmdi 17 - Khoekhoegowab bible

Psalmdi 17

¹ǀGores Davib dis. ǃKhūtse! ǂHanu ǃkhaisa ǁnâu; ti ǃaus ai ǃgaoǃgâ, ti ǀgoresa ǂgaes ǃnâ ǂgâ kai, gāxaǃnâ-o amǁgaukha xu ra ǀkhīsa.

²Ab ti ǂhanuba sa ais aiǃâba xu ǂoaxa; sa mûra ge ǂhauǃnâsiba ra ǃgapaǀî.

³Sats ge ti ǂgaoba go ǃâitsâ, tsuxub ǃnâts ge go sari bi, sats ge tita go ôaǃnâ, xawets ge xū-e hō tama go i; ti ams ge ǀhapiǀhapisen tama hâ.

⁴Khoen di dīb tawa ta ge sa amǁgaukha di mîs ǃoa go ǃûisen, dīsā-ao-i di daoga xu.

⁵Ti dāǃharode ta ge sa daogu ǃnâ go ūhâ i; ti ǂaira ǃnôa tidega.

⁶Satsa ta ra ǂgaiǀî, ǁnâu-am tets ra xui-ao; ti Elotse, sa ǂgaesa ǂō re tiǀî, ǁnâu ti mîsa.

⁷Buruburuxase ǁgau re sa ǃgâidīga, sats sa ai ǂgomaiǂnûi hâna ra oretsa ǁîn, sa amǀkhāb ǁôab ǃoagu ra khâimana xu.

⁸Sâu te re mûs di âutsiǂgares khami; sâu te re sa ǁgabokha di sommi ǃnâ.

⁹Eloxoresan di aisa xu tita ra hîǀhurun, ti khākhoen tita ra ǃnamiǂgāna.

¹⁰ǁÎn ǂgaogan ra karokaro, ǁîn ams ǀkhan ra ǃgurixase ǃhoa.

¹¹ǃGû da garu hîan ge nēsi go xāǂgā da, ǁîn mûden ra sida ai ǂnûi, sidan nî ǂnauǁguise.

¹²ǁÎb ge xammi khami ī, ǀkhauǃā ǂgao rab, ǂkham xammi, ǂganǂamsa ǃkhaidi ǃnâ hâba.

¹³Khâi re, ǃKhūtse, mâǃoa bi, ǂnauǁgui bi re; ti ǀomsa sa gôab ǀkha ore re eloxoresana xu.

¹⁴Sa ǃommi ǀkha ore te re, ǃKhūtse, ǁnā khoega xu, ǁnā khoegu nē ǃhūbaib digu, ǁîgu di amǃnâsa nē ûib ǃnâ ūhâgu, ǁîgu di ǃnābats ra sa ǂganǃgâsa ǁuib ǀkha ǀoaǀoaga; ǂgui ǀgôanan ge ūhâ, tsîn ge ǁîn di xūna ǁîn di ôana ra ǁnākhaoba.

¹⁵Xawe ta ge tita sa aisa ǂhanu-aisib ǃnâ nîra kōǀî; ǁâ ta ge nîra sa īb xa, ǃnoaǂkhai ta ga ǃnubai.