Read Khoekhoegowab Psalmdi 18 Bible Online

Psalmdi 18 - Khoekhoegowab bible

Psalmdi 18

¹ǁNaetsanas Davib, ǃKhūb ǃgāb dis, ǂam ǁnae-aobab ge dības, nē ǁnaetsanas di mîde ǃKhūb ǃoa ge ǃhoab, ǁnā tsēs ai, ǃKhūb ge ǁîba oreo ǁîb khākhoen hoan di ǃomǁaeba xu, tsî Sauli di ǃomǁaeba xu. ǃNubaib ge ge mî: ǂGaob hoab ǀkha ta ge a ǀnam tsi, ǃKhū, ti ǀgaitse!

²ǃKhūb ge a ti ǃhao tsî ti sâuǃkhai tsî ti huiǂui-ao; ti Elob, ti ǃgareǀuib, ǁîb ai ta ra ǂgomaiǂnûib, ti khōsikhō tsî ti ǃgâiǃōb di ǁnâb, ti ǀgapi sâuǃkhaiba.

³ǃKhūb, karesa anu hâba ta go ǂgaiǀî, o ta ge ti khākhoena xu go orehe.

⁴ǁŌb tsurigu ge go ǃnamiǂgā te; ǁōb di ǃārogu ge go ǃhuriǃhuri te.

⁵ǁŌ hân hâǃkhais di tsurigu ge go xāǂgā te; ǁōb di ǁnoadi ge go ǁnā-ai te.

⁶ǂŌǂōsib ǃnâ ta ge hâ i, ǃnubai ta ge ǃKhūba ge ǂgaiǀî; tsî ti Elob ǃoa ta ge ǂgai; ob ge ǁîba ti domma ge ǁnâu ǁîb di î-omma xu, tsî ti ǂgais, ǁîb di ais aiǃâ ta ge dīs ge ǁîb di ǂgaera ǃnâ ge ǂgâ.

⁷ǃNubaib ge ǃhūbaiba ǂgubi tsî ge ǀkhū, tsî ǃhomgu di ǃgaoǃgaodi ge gon tsî ge ǁnope; ǁîb ge ǁaixa amaga.

⁸ǀAnni ge ǂguis âba xu ge ǂoa; tsî hapura ǀaes ge ams âba xu ge ǁhabu, ǂnomdi ge ǁîba xu ge ǂhubiǂoaxa.

⁹ǁÎb ge ǀhomma ǃgamǃgam tsî ge ǁgôa; tsî ǃkhaeb ge ǁîb di ǂaira ǃnaga ge hâ i.

¹⁰Tsîb ge xeru-i ai ǃapa tsî ge ǁkhana; ǂoab di ǁgabogu aib ge ge ǀnarema.

¹¹ǁÎb ge ǃkhaenasa ǁîb ǂnamipe sâusenxūse ge dībasen, kai ǃâudi, ǁgammi xa ǃkhaede.

¹²ǁÎb aiǃâ hâ ǂkhaiba xu di ge ǁîb di ǃâude go ǀgora, ǃnareb tsî ǀaexa ǂnomdi ǀkha.

¹³Tsî ǀhommi ǃnâb ge ǃKhūba go ǃguru; tsî Hoan xa ǀGapib ge ǁîb domma go ǀō kai, ǃnareb tsî ǀaexa ǂnomde.

¹⁴Tsîb ge ǁîb di ǂāga sîǂui tsî ǁîna go ǀgaruǀgaru, tsîb ge napaga ǂguiǂgui tsî ǁîna go ǃhuri kai.

¹⁵Hurib ǃnagab di ǃhūb ge ge mûhe, ǃhūbaib di ǃgaoǃgaodi ge ge khowa-aihe, sa ǀausa xu, ǃKhūtse, sa ǂguisa xu ra ǂoa ǀommi di ǂoab xa.

¹⁶ǁÎb ge ǀgapiseba xu ǃomma ǀhōǂui tsî ge ǃkhō te, ǁîb ge kai ǁgamga xu ge ǂgaeǂui te.

¹⁷ǁÎb ge ti ǀgaisa khākhoeba xu ge ore te, tsî ti ǁkhanaona xu, ǁîn ge ǀgaidā te amaga.

¹⁸ǁÎn ge ge hāǂam te ti tsūǃgâb di tsēs ai, xawe ǃKhūb ge tita ge ǂkhâǃnâ.

¹⁹ǁÎb ge harasib ǃoa go ǂgaeǂguiǂui te; ǁîb ge go ore te, ti ǃnâb turaba ūhâ amaga.

²⁰ǃKhūb ge tita ti ǂhanu-aisib ǃoa go mādawa-am, ǁîb ge ti ǃomkha di ǃanusib ǃoa go dīdawa-am te.

²¹ǃKhūb di daoga ta ge ǃkhōǀgaipe tsî ta eloxoresase ti Eloba xu ǁnāǁgôa tama xui-ao.

²²ǁÎb mîmādi hoadi ge ti aiǃâ hâ xui-ao; tsî ǁîb di ǂnûiǂgāde ta ge tita xu bē kai tama ge i.

²³Tita ge ǂhauǃnâ ge i ǁîb tawa, tsî ta ge ǂhanuoǃnâsiba xu ge ǃûisen.

²⁴Ob ge ǃKhūba ǂhanu-aisib âtab ǃoa go mādawa-am te, ti ǃomkha di ǃanusib ǃoa ǁîb di mûǁae.

²⁵ǃGâiǃnâ-i tawats ra satsa ǃgâiǃnâse dīsen, ǂhauǃnâ-i tawats ra satsa ǂhauǃnâse ǁgausen.

²⁶ǃAnu-i tawats ra satsa ǃanuse dīsen tsî ǂkhaba-i tawats ge ǂguni-aose ra ǁgausen.

²⁷Sats ge ǁgâiǀāhe hâ ǁaesa ra ore, xawe ǀgapi mûdets ge satsa ra ǃgamǃgam.

²⁸Sats ge ti ǃamamǀaesa ra ǃnâ kai xui-ao; ǃKhūb, ti Elob ge ti ǃkhaenasa ra ǃnâǃnâ.

²⁹Sats ǀkha ta ge toroǂnubi-e ra ǃkhoeǂnôa; tsî ti Elob ǀkha ta ge ǂnubiǂgoaga ra uriǂam xui-ao.

³⁰Elob di daob ge a dīǀoaǀoasa; ǃKhūb di mîs ge a ǃanu; khōsikhōseb ge ǁîba ība ǁnān, ǁîb ǃoa ra ǁhaiǁhân hoana.

³¹Tari-e a Elo, ǃKhūb ǀguib ose? Tsî tari-e a ǃgareǀui, sada di Elob ǀguib ose?

³²Elob ge ǁîb, ti kamanaba ǀgaib ǀkha ra ǃgaeba, ǁîb ge ǁNāb, ti daoba ra ǂhauǂhauba.

³³ǁÎb ge ti ǂaira ǁkhamadi didi xase ra dī; tsîb ge tita ǀgapi ǃkhaidi ai ra mâi.

³⁴ǁÎb ge ti ǃomkha ǃkhamsa ra ǁkhāǁkhā, o kha ge ti ǁôakha ǂgamaǀurikhāsa ra ǂgaeǃnâ.

³⁵ǁKhātits ge satsa tita sa ǃgâiǃōb di khōsikhōba ge mā; tsî sa amǀkhābǁôab ge ge ǂkhâǃnâ te, tsî sa tsamtsiǃnâsib ge ge kaikai te.

³⁶Sats ge ti dāǃharode ti ǃnaga ge haraharaba te, tsî ti ǃnôara ge ǁnope tama hâ.

³⁷Tita ge ti khākhoena sauruǃgon tsî ge saoǁae; tsî ta ge oa tama ge i, ǁîna ta ge hîkākās kōse.

³⁸Tita ge ǁîna ge ǃkhāǃganu, on ge khâi ǁoa ge i; ti ǂaira ǃnân ge ge ǁnā.

³⁹Sats ge tita ǀgaib ǀkha ge ǃgae ǃkhamgus ǃoa; sats ge ti ǃoagu ge khâimana ti ǃnaga ge ǃgamǃgâ kai.

⁴⁰Tsîts ge ti khākhoena ti aiǃâ ge ǁhâ kai; tsî ti ǁkhanaon, ǁîna ta ge ge hîkākā.

⁴¹ǁÎn ge ge ǂgai, xawe hui-ao-i ge ǀkhai ge i; ǃKhūb ǃoan ge ǂgai, xawe ǁîb ge ǁîna ǃeream tama ge i.

⁴²ǃNubai ta ge ǁîna tsarab ra ǂoab xa dīhe khami ge ǃgomtoa; daob di ǂgoa-i xase ta ge ǁîna ge ǀnapubē.

⁴³Sats ge ge huiǂui te ǁaes di toroga xu; sats ge tita ǀūben di danase ge ǂnûi; ǁaes, ǀū ta as, ge tita gere ǃoaba.

⁴⁴ǁÎn di ǂgaes ge tita xa ǁnâu; ǃnubain ge ǁnātimîsi ge ǁnâuǀnam te; ǃhaokhoen ge ǁgoasen rase ti ǃnaga ge māsen.

⁴⁵ǃHaokhoen ge ge ǁnā, ǁîn ge ge ǀkhūǂoaxa ǁîn di ǁaposa hâǃkhaide xu.

⁴⁶ǃKhūb ge a ûitsama, ab karehe ti ǃgareǀuiba, ab ǀgapiǀgapihe ti ǃgâiǃōb di Eloba!

⁴⁷ǁNā Elob, tita ǀoasa ǀkhaoba ra māb, tsî ǁaede ti ǃnaga ra ūhâba teb,

⁴⁸ti khākhoena xu ra huiǂui teba. Ā, sats ge tita ti ǃoagu ra khâiman ǂamai ra ǀgapiǀgapi; sats ge ǁgari-aoba xu ra ore te.

⁴⁹ǁNā-amaga ta ge satsa ǀūben ǃnâ nîra kare ǃKhūtse, tsî ta ge sa ǀonsa nîra psalmǁnaeba.

⁵⁰Sats, gao-aob tawa kai dansa ra māts; tsî sa ǂkhauǀkhāsabeba ra ǃgâidītsa, Davib tsî ǁîb di suriba ǀamosib kōse.